03-Aug-2025

କାଲିମେଳା(ସନ୍ତୋଷ କୁମାର ପଣ୍ଡା)କୁମ୍ଭୀର ଖୋଜିବାରେ ନା କେଦମ ହେଲେଣି ବନ ବିଭାଗ । ଡ୍ରୋନ କ୍ୟାମେରାରେ କୁମ୍ଭୀର ଦୃଶ୍ୟ ଦେଖିବା ପରେ ପୋଖରୀରେ ଜାଲ ପକାଇ କୁମ୍ଭୀର ଧରିବା ପାଇଁ ବନ ବିଭାଗ ଉଦ୍ୟମ ଜାରି ରଖିଛି ।ମାଲକାନଗିରି ଜିଲ୍ଲା ମୋଟୁ ବନାଞ୍ଚଳ ଅନ୍ତର୍ଗତ ଏମ.ପି.ଭି ୮୩ ଗ୍ରାମରେ ଥିବା ଏକ ବଡ଼ ପୋଖରୀ ଗତ କିଛି ଦିନ ହେବ କୁମ୍ଭୀର ବୁଲୁଥିବା ଦେଖି ଗ୍ରାମବାସୀ ଭୟଭୀତ ହୋଇ ବନ ବିଭାଗକୁ ଜଣାଇଥିଲେ। ବନବିଭାଗ କର୍ମଚାରୀ ଘଟଣା ସ୍ଥଳରେ ପହଁଚି କୁମ୍ଭୀର ଧରିବା ପାଇଁ ଉଦ୍ୟମ କରି ବିଫଳ ହେବା ପରେ ପୋଖରୀ ପାଖରେ ଏକ ବ୍ୟାନର ଲଗାଇ ପୋଖରୀରେ ସ୍ନାନ ନ କିମ୍ବା କିଛି କାରବାର ନ କରିବା ପାଇଁ ଜନ ସଚେତନତା କରାଯାଇଛି। ଏହା ବ୍ୟତିତ ଡାକବାଜି ଯନ୍ତ୍ର ସହାୟତାରେ ଗ୍ରାମର ସର୍ବ ସାଧାରଣ ଜନତାଙ୍କୁ କୁମ୍ଭୀର ପୁଷ୍କରିଣୀରେ ଥିବା ସତର୍କ ସୂଚନା ପ୍ରଦାନ କରାଯାଇଛି। ଗତ ଦୁଇ ଦିନ ହେବ ଏହି କୁମ୍ଭୀର ଗତିବିଧିକୁ ଡ୍ରୋନ୍ କ୍ୟାମେରା ଦ୍ବାରା ଫଟୋ ଚିତ୍ର ଉତ୍ତୋଳନ କରାଯାଇ ଜୋର ଦାର ଜାଲ ପକାଇ ଖୋଜା ଚାଲୁଛି । ହେଲେ ପୋଖରୀରେ ଅଧିକ ପାଣି ଥିବାରୁ କୁମ୍ଭୀରଟି ଧରାପଡ଼ୁ ନାହିଁ ।
ଏମପିଭି-୮୩ ଗ୍ରାମରେ ଥିବା ପୋଖରୀ ଟି ୨୦୦ ମିଟର ପ୍ରସ୍ଥ ଓ ଦୈର୍ଘ୍ୟ ୫୦୦ ମିଟର ବିଶିଷ୍ଟ ଅଟେ। ଏଠାରେ ଗୋଟିଏ କୁମ୍ଭୀର ଆସି ରହିଯାଇଛି ବୋଲି ମୋଟୁ ବନାଞ୍ଚଳ ଅଧିକାରୀ ରଶ୍ମୀରଂଜନ ସ୍ବାଇଁ କହିଛନ୍ତି । ଗତ ଦୁଇ ଦିନ ହେଲା କୁମ୍ଭୀର ଟିକୁ ଉଦ୍ଧାର ଲାଗି ପ୍ରୟାସ ଜାରି ରହିଛି । ପୋଖରୀଟି ବଡ଼ ଥିବାରୁ ତାକୁ ଜାଲରେ ଧରିବା ସହଜ ହୋଇ ପାରୁ ନାହିଁ। ଲୋକକୁ ଦେଖିବା ପରେ କୁମ୍ଭୀରଟି ଜଳ ମଧ୍ୟରେ ଆତ୍ମ ଗୋପନ କରୁଛି । ସ୍ୱତନ୍ତ୍ର ଭାବେ ଉଦ୍ଧାର କାରି ଟିମ ଗଠନ କରାଯାଇ ବନ ବିଭାଗ ଅଧିକାରୀ ଓ କର୍ମଚାରୀମାନେ ପୋଖରୀ ନିକଟରେ କ୍ୟାମ୍ପ କରି ରହି କୁମ୍ଭୀର ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଖୁବଶୀଘ୍ର କୁମ୍ଭୀରଟି ଧରା ପଡିଯିବ ବୋଲି ସହକାରି ବନ ସଂରକ୍ଷକ (ଏସିଏଫ ) ମୁନସୁନ ଖେମୁଣ୍ଡୁ ସୂଚନା ଦେଇଛନ୍ତି ।