28-Jul-2025

ବଲାଙ୍ଗୀର (ପ୍ରେରଣା ଖବର) ଗତ ୨୬ ତାରିଖ ଶନିବାରରୁ ୨୭ ତାରିଖ ରବିବାର ପର୍ଯ୍ୟନ୍ତ ବଲାଙ୍ଗିର କଲେଜ ଛକ ସରସ୍ଵତୀ ଶିଶୁମନ୍ଦିରରେ  ବିଶ୍ଵହିନ୍ଦୁ ପରିଷଦ ଓଡିଶା ପଶ୍ଚିମ ପ୍ରାନ୍ତର ପ୍ରାନ୍ତୀୟ  ପ୍ରବନ୍ଧ ସମିତି ବୈଠକ ଅନୁଷ୍ଠିତ ହୋଇ ଯାଇଛି । ଏହି ବୈଠକ ରେ ପରିଷଦର ଅଖିଳ ଭାରତୀୟ ସହ ସଂଗଠନ ମନ୍ତ୍ରୀ ଶ୍ରୀ ବିନାୟକ ରାଓ ଦେଶପାଣ୍ଡେ  ଯୋଗଦେଇ ପ୍ରଦୀପ  ପ୍ରଜ୍ବଳନ କରି କାର୍ଯ୍ୟକ୍ରମକୁ ଉଦଘାଟନ  କରିଥିଲେ । ସେ ନିଜ ବକ୍ତବ୍ୟରେ ହିନ୍ଦୁ ସମାଜକୁ ସଂଗଠିତ କରିବା ଲାଗି ପରିଷଦର କାର୍ଯ୍ଯକର୍ତ୍ତାଙ୍କ ଭୂମିକା ସମ୍ବନ୍ଧେ ଆଲୋଚନା କରି ଥିଲେ । ପ୍ରତ୍ୟେକ ଗ୍ରାମ ପର୍ଯ୍ୟନ୍ତ କାର୍ଯ୍ଯକର୍ତ୍ତା ଯାଇ  ସତସଙ୍ଗ ଆରମ୍ଭ କରିବା ଏବଂ ସତସଙ୍ଗ ଓ ସେବା ମାଧ୍ୟମରେ ସମାଜରେ ସମରସତା ର ବାର୍ତ୍ତା ଦ୍ବାରାପ୍ରତ୍ୟେକ ବ୍ଯକ୍ତିକୁ ସଂଗଠନ ସହିତ ଯୋଡିବାକୁ ଆହ୍ବାନ କରିଥିଲେ ।ଦ୍ବିତିୟ ଦିନ ଅଖିଳ ଭାରତୀୟ ସତସଙ୍ଗ  ପ୍ରମୁଖ ବସନ୍ତ ରଥ ଯୋଗ ଦେଇ  ପର୍ଯ୍ୟାବରଣ ସଂରକ୍ଷଣ ଉପରେ ଗୁରୁତ୍ଵାରୋପ କରି ଥିଲେ । ପ୍ଲାଷ୍ଟିକ ବର୍ଜନ ଓ ଜୈବିକ କୃଷି ଦ୍ବାରା ସମାଜ କିପରି ସୁସ୍ଥ ଜୀବନ ବଞ୍ଚି ପାରିବ ସେ ଉପରେ ଆଲୋକପାତ କରିଥିଲେ । ଏହି କାର୍ଯ୍ୟକ୍ରମ ରେ ପ୍ରାନ୍ତ ସଭାପତି ଡାକ୍ତର  ରାଜକୁମାର ବଡପଣ୍ଡା, ଉପସଭାପତି ଭକ୍ତ ଚରଣ ସାହୁ, ସଂପାଦକ ଯୋଗେନ୍ଦ୍ର ଦାଶ, ସଂଗଠନ ମନ୍ତ୍ରୀ ସତ୍ଯ ନାରାୟଣ ଥନାପତି ତଥା ପରିଷଦର ଅନେକ କାର୍ଯ୍ଯକର୍ତ୍ତା ପୂର୍ଣ୍ଣ ସମୟ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ ।