26-Jul-2025

ମାଲକାନଗିରି(କେଶବ ଚନ୍ଦ୍ର ନାୟକ): ମାଲକାନଗିରି ଜିଲ୍ଲାରେ ଲଘୁଚାପ ଜନିତ ଲଗାଣ ବର୍ଷା ଆଜକୁ ପାଞ୍ଚ ଦିନ ହେଲା ଲାଗି ରହିଛି। ଦିନ ରାତି ବର୍ଷା ହିଁ ବର୍ଷା। ବାହାରକୁ ଗଲେ ଓଦା ସରସର ଦେହ। ଏଣୁ ମାଲକାନଗିରି ଜିଲ୍ଲାରେ ଥିବା ବିଭିନ୍ନ ନଈ ନାଳରେ ଜଳ ପତ୍ତନ ବୃଦ୍ଧି ପାଇବା ଯୋଗୁଁ ବିଭିନ୍ନ ଜାଗାରେ ଯୋଗାଯୋଗ ବିଚ୍ଛିନ୍ନ ହୋଇ ପଡ଼ିଛି।
ଫଳରେ କାଲିମେଳା କନ୍ୟାଶ୍ରମ ପୋଲଟି ବୁଡ଼ି ଯାଇଛି। ପୋଲ ଉପରେ ୨ଫୁଟ ବନ୍ୟାଜଳ ପ୍ରବାହିତ ହେବା ଫଳରେ ଯାନବାହାନ ଚଳାଚଳ ବ୍ୟାହତ ଘଟିଛି । କାଲିମେଳା ବ୍ଲକ ସହିତ ପଡିଆ ବ୍ଲକକୁ ଯୋଗାଯୋଗ ବିଛିନ୍ନ ହୋଇପଡ଼ିଛି । ପୋଲ ବୁଡ଼ି ଯିବା ଯୋଗୁଁ ଯାତ୍ରୀବାହୀ ବସ୍ ସହ ଅନେକ ଯାନବାହାନ ଉଭୟ ପଟେ ଅଟକି ରହିଥିବା ଦେଖିବାକୁ ମିଳିଛି । ଲଗାଣ ବର୍ଷା ଲାଗି ରହିଥିବା ବେଳେ ଆଜି ସକାଳ ୯ଟାରେ ଏହି ପୋଲଟି ବୁଡ଼ି ଯାଇଥିଲା । ସେହିପରି ମାଲକାନଗିରି କାଲିମେଳା ୩୨୬ନମ୍ବର ଜାତୀୟ ରାଜପଥ ପୋଟେରୁ ବ୍ରିଜ, ଏମଭି- ୯୬ ବ୍ରିଜ ଉପରକୁ ପାଣି ଲାଗି ଯାଇଛି। ବର୍ଷା ଅଧିକ ହେଲେ ଏହି ଦୁଇଟି ପୋଲ ବୁଡ଼ିଯିବାର  ସମ୍ଭବନା ରହିଛି ।            
ଠିକ ସେହିପରି ମାଲକାନଗିରି- ମୋଟୁ ୩୨୬ ଜାତୀୟ ରାଜପଥର କାଙ୍ଗୁରୁକୋଣ୍ଡା ନାଳ ଉପରକୁ ମଧ୍ୟ ପାଣି ଲାଗି ଯାଇଛି । ଲଗାଣ ବର୍ଷା ଯୋଗୁଁ ଜିଲ୍ଲାର ସାବେରୀ, ସିଲେରୁ, ତମସା, ପାଙ୍ଗମ ବିଭିନ୍ନ ନଦୀ ନାଳର ଜଳସ୍ତର ବୃଦ୍ଧି ପାଇଛି। ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ଯେପରି କୌଣସି ଧନ ଜୀବନ ହାନି ନ ହେବ ସେଥିପ୍ରତି ସତର୍କ ଦୃଷ୍ଟି ରଖା ଯାଇଛି । ଗତ ୨୪ଘଣ୍ଟା ମଧ୍ୟରେ ଚିତ୍ରକୋଣ୍ଡା ବ୍ଲକରେ ସର୍ବାଧିକ ୧୧୯ ମି.ମି, ମାଲକାନଗିରି ବ୍ଲକରେ ୯୫ ମି.ମି, ମାଥିଲି ବ୍ଲକରେ ୬୫ମି.ମି, କାଲିମେଳା ବ୍ଲକରେ ୩୩ ମି.ମି ଖଇରପୁଟ ବ୍ଲକରେ ୯୫ ମି.ମି କୋରୁକୋଣ୍ଡା ବ୍ଲକରେ ୭୨ ମି.ମି ଓ ପଡିଆ ବ୍ଲକରେ ୪୫. ୩ ମି.ମିବର୍ଷା ହୋଇଥିବା ଜଣାପଡିଛି । ସେହିପରି ମାଲକାନଗିରି ଜିଲ୍ଲାରେ ସର୍ବ ମୋଟ  ହାରାହାରି ୭୪.୯୬ ପ୍ରତିଶତ ମି.ମି ବର୍ଷା ହୋଇଛି ।