20-Jul-2025

ଭୁବନେଶ୍ୱର(ପ୍ରେରଣା ଖବର): ନୃତ୍ୟ ପ୍ରଜ୍ଞା ପବ୍ଲିକ ଚାରି ଟେବୁଲ ଟ୍ରଷ୍ଟ ଦ୍ୱାରା “ନୃତ୍ୟ ପ୍ରଜ୍ଞା ଉତ୍ସବ” ଭୁବନେଶ୍ୱର ଭଞ୍ଜକଳା   ମଣ୍ଡପରେ ଶନିବାର ସଂଧ୍ୟାରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ପଦ୍ମଶ୍ରୀ ଗୁରୁ ଶ୍ରୀମତୀ କୁମ୍‌କୁମ୍ ମହାନ୍ତି ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଅନ୍ୟାନ୍ୟ ଅତିଥି ଭାବେ ସାହିତ୍ୟ ଏବଂ ସଙ୍ଗୀତ ନାଟକ ଏକାଡେମୀ ସଚିବ ଡ.ଚନ୍ଦ୍ର ଶେଖର ହୋତା, ଶିକ୍ଷାବିତ୍ ରବିନ୍ଦ୍ର ନାଥ ମହାନ୍ତି, ବରିଷ୍ଠ ସମ୍ବାଦିକ ଶ୍ରୀରାମ ଦାସ,  ଅବସରପ୍ରାପ୍ତ ଲେଫ୍ଟନେଣ୍ଟ କର୍ଣ୍ଣେଲ ଶ୍ରୀମତୀ ସୋନାଲୀ ରଥଏବଂ କମ୍ପାନୀ ସେକ୍ରେଟାରୀ ଜିତେନ୍ଦ୍ରୀୟ ମହାନ୍ତି ଯୋଗ ଦେଇଥିଲେ ।
ଏହି ନୃତ୍ୟ ଉତ୍ସବରେ ଶ୍ରୀ ଲକି ପ୍ରଜ୍ଞା ପ୍ରତିଷ୍ଠିତ ମହାନ୍ତିଙ୍କ ନୃତ୍ୟ ବିଶେଷ ଆକର୍ଷଣୀୟ ହୋଇଥିଲା । ସେ ଓଡ଼ିଶୀର ପଲ୍ଲବୀ ନୃତ୍ୟ ପରିବେଷଣ କରିଥିଲେ । ଯାହା କଳାବତୀ ରାଗରେ ପର୍ଯ୍ୟବେଶିତ ଥିଲା । ଏହାର ନୃତ୍ୟ ନିର୍ଦ୍ଦେଶନା ଦେଇଥିଲେ ପଦ୍ମଶ୍ରୀ ଗୁରୁ କୁମ୍‌କୁମ୍ ମହାନ୍ତି ।  
ଏହା ପରେ ଶ୍ରୀମତୀ ସୁହାଗ ନଳିନୀ ଦାସ, ବିପାଞ୍ଚୀ ଦାସ, ପ୍ରୀତିସା ମହାପାତ୍ରଙ୍କ ଏକକ ନୃତ୍ୟ ଦର୍ଶକଙ୍କ ମନ ମୋହିଥିଲା । ଏହା ଛଡ଼ା ନୃତ୍ୟ ପ୍ରଜ୍ଞା ଅନୁଷ୍ଠାନର ଛାତ୍ରୀମାନେ ମଙ୍ଗଳାଚରଣ ଏବଂ ‘ଆହେ ନୀଳ ଶଇଳ’ ନୃତ୍ୟ ପରିବଷେଣ କରିଥିଲେ ।
 ଏହା ପରେ ବିଦ୍ୟା ଇନ୍‌ଷ୍ଟିଚ୍ୟୁଟ୍‌ର ନୃତ୍ୟ ଶିଳ୍ପୀମାନେ ‘ନାଗେନ୍ଦ୍ର ହାରାୟ’ ନୃତ୍ୟ ପରିବେଷଣ କରିଥିଲେ । ଅନ୍ତିମରେ ନୃତ୍ୟ ପ୍ରଜ୍ଞା ପବ୍ଲିକ୍ ଚାରିଟେବୁଲ ଟ୍ରଷ୍ଟର ଚେୟାମ୍ୟାନ ଲକି ପ୍ରଜ୍ଞା ପ୍ରତିଷ୍ଠିତ ମହାନ୍ତି ଏବଂ ସେକ୍ରେଟାରୀ ସସ୍ମିତା ପରିଡ଼ା ଧନ୍ୟବାଦ ଅର୍ପଣ କରିଥିଲେ ।
ଆଜିର ଏହି ସାଂସ୍କୃତିକ ଉତ୍ସବରେ ଦର୍ଶକଙ୍କ ଭରପୂର ଉପସ୍ଥିତି ବେଶ୍ ଉଲ୍ଲେଖନୀୟ ଥିଲା । ସେମାନଙ୍କ କରତାଳି ଓ ଉଚ୍ଛ୍ୱସିତ ପ୍ରେରଣା ନୃତ୍ୟଶିଳ୍ପୀମାନଙ୍କୁ ଶ୍ରେଷ୍ଠ ପଦର୍ଶନ ଦେବା ପାଇଁ ପ୍ରେରଣା ଯୋଗାଇଥିଲା ।