24-Jun-2025

ବଲାଙ୍ଗୀର(ପ୍ରେରଣା ଖବର): କେନ୍ଦ୍ର ଓ ରାଜ୍ୟସରକାର ବିକାଶ ନାମରେ ବିନାଶ କରିବାକୁ ଯାଉଛନ୍ତି। ବିକାଶ ନାମରେ ଲୋକଙ୍କ ବିନା ଅନୁମତିରେ ଅବାରିତ ଖଣିଖନନ ପାଇଁ ଜଙ୍ଗଲ ଓ ଚାଷଜମିଗୁଡିକୁ ଲିଜ ଦିଆଯାଉଛି ଯାହାକି ଆଗାମୀ କିଛି ବର୍ଷ ମଧ୍ୟରେ ରାଜ୍ୟ ଏକ ସମ୍ପଦହୀନ ଅଞ୍ଚଳ ହୋଇଯିବ। ବଲାଙ୍ଗୀର ଜିଲ୍ଲା ପରିପ୍ରେକ୍ଷୀରେ ଜିଲ୍ଲାର ଜଙ୍ଗଲ ଓ ଜମିକୁ ଖଣିଖନନ ପାଇଁ ଲିଜ ଦେଇଦେଲେ ଦାଦନ ସମସ୍ୟା ବଢିବ ବୋଲି ଆଜି ବଲାଙ୍ଗୀର ଗସ୍ତରେ ଆସିଥିବା ଲୋକଶକ୍ତି ଅଭିଯାନର ଆବାହକ ତଥା ଗ୍ରୀନନୋବେଲ ପୁରସ୍କାରବିଜେତା ପରିବେଶବିତ୍ ପ୍ରଫୁଲ୍ଲ ସାମନ୍ତରା ମତବ୍ୟକ୍ତ କରିଛନ୍ତି। ଆମ ପ୍ରତିନିଧିଙ୍କ ସହିତ ଏକ ସୌଜନ୍ୟମୂଳକ ସାକ୍ଷାତରେ ସେ ଏହି ମତ ଦେଇଛନ୍ତି ଯେ,ବଲାଙ୍ଗୀର ଜିଲ୍ଲାର ଗରୀବ ଆଦିବାସୀ ମାନେ ଜଙ୍ଗଲଜାତ ଦ୍ୟବ୍ୟସଂଗ୍ରହ କରିବା ସହିତ କୃଷିକାର୍ଯ୍ୟ କରି ଜୀବିକା ନିର୍ବାହ କରୁଛନ୍ତି। ଯେତେବେଳେ ଜିଲ୍ଲାର ଜଙ୍ଗଲଗୁଡିକୁ ଓ ଜମିକୁ ଖଣିଖନନ ପାଇଁ ଲିଜ ଦେଇଦିଆଯିବ ସେତେବେଳେ କୃଷି ଉପରେ ନିର୍ଭର କରୁଥିବା ଲୋକ ଯିବେ କୁଆଡେ ବୋଲି ସେ ପ୍ରଶ୍ନ କରିଛନ୍ତି। ଚାଷଜମି ଓ ଜଙ୍ଗଲ ଜମି ରେ ଖଣିଖନନ ହେଲେ ୧୦ବର୍ଷ ପରେ ଖଣିଜପଦାର୍ଥ ସରିଯିବ ଓ ସେହି ଅଞ୍ଚଳ ଏକ ପରିବେଶଗତ ପ୍ରଭାବରୁ ଆଉ କୃଷି ଉପଯୋଗୀ ହୋଇପାରିବ ନାହିଁ। ବିସ୍ଥାପନ ସମସ୍ୟା ବଢିବ ଓ ଏହା ଦାଦନ ସମସ୍ୟାକୁ ବଢାଇବ। ଏହି ଅବସରରେ ଲୋୟର ସୁକତେଲ ଜଳସେଚନ ପ୍ରକଲ୍ପ ଉପରେ ମନ୍ତବ୍ୟ ଦେଇ ଶ୍ରୀ ସାମନ୍ତରା କହିଛନ୍ତି ଯେ, ଆମେ ପ୍ରକଲ୍ପ ହେବା ପୂର୍ବରୁ ଯେଉଁ ଆଶଂକା କରୁଥିଲୁ ଆଜି ତାହା ସତ ହୋଇଛି। ବଲାଙ୍ଗୀର ଜିଲ୍ଲାରେ ଜଳସେଚନ ବଦଳରେ ଖଣି ଓ ଶିଳ୍ପ ଜଳ ଯୋଗାଇ ଦେବାକୁ ଏଭଳି ବୃହତ ପ୍ରକଲ୍ପ କରାଯାଇଛି। ଏବେ ଲୋୟର ସୁକତେଲ ପ୍ରକଲ୍ପରୁ ଚାଷୀଙ୍କୁ ଜଳ ଯୋଗାଇବା ତଥା ବିସ୍ଥାପିତ ଙ୍କ ସମସ୍ୟା ସମାଧାନ ପୂର୍ବରୁ ପ୍ରକଲ୍ପରୁ ଖଣିମାନଙ୍କୁ ପାଣି ଯୋଗାଇବାକୁ ସରକାର ବ୍ୟଗ୍ର ହେଲେଣି। ପ୍ରକଳ୍ପ ପାଖ ଜମି ରେ ଯଦି ଖଣିଖନନ କରିବାର ଥିଲା ତାହେଲେ ଜଳସେଚନ ନାଁନେଇ ପ୍ରକଲ୍ପ ନିର୍ମାଣ କରିବାର ଆବଶ୍ୟକତା କଣ ଥିଲା ବୋଲି ସେ ସରକାରଙ୍କୁ ପ୍ରଶ୍ନ କରିଛନ୍ତି। ଏବେ ରାଜ୍ୟରବିଜେପି ସରକାର ପଶ୍ଚିମଓଡିଶାର ଖଣି ଓ ପାଣି ବିକି ରାଜ୍ୟ ଚଳାଇବାକୁ ନୀୟମଗିରୀଠାରୁ ଆରମ୍ଭ କରି ଗନ୍ଧମାର୍ଦ୍ଦନ ପର୍ଯ୍ୟନ୍ତ ସବୁ ଜଙ୍ଗଲ ଓ ପରିବେଶ ନଷ୍ଟକରି ଖଣିଖନନ କାରିବାର ଚକ୍ରାନ୍ତ କରୁଛନ୍ତି । ଖଣି ଓ ପାଣି,ଜଙ୍ଗଲ ଓ ଜମି ବିକ୍ରୀକରି ରାଜ୍ୟସରକାର ଯେଉଁ ବିକାଶର ସ୍ୱପ୍ନ ଦେଖାଉଛନ୍ତି ତାହା ଭବିଷ୍ୟତରେ ବିନାଶ ହିଁ କରିବ ବୋଲି ଶ୍ରୀ ସାମନ୍ତରା କହିଛନ୍ତି । ଆଜି ପାଟଣାଗଡର ସାଲେପାଲି ବ୍ଲକର ଗ୍ରାଫାଇଟ ଖଣିଲିଜକୁ ବିରୋଧ କରି ହୋଇଥିବା ଏକ ବିଶାଲ ଜନ ରାଲିରେ ଶ୍ରୀ ସାମନ୍ତରା ଯୋଗଦେଇ ସିଏଜି ରିପୋର୍ଟରେ ଗ୍ରାମସଭା ଓ ପଲ୍ଲୀସଭା ନକରି ଖଣି ଲିଜଦେବା ସଂପୂର୍ଣ୍ଣ ବେଆଇନ ବୋଲି ଦର୍ଶାଯାଇଛି। ତେଣୁ ଲୋକଙ୍କ ମତ ନନେଇ ଖଣିଲିଜ ଦେବା ସଂପୂର୍ଣ୍ଣ ବେଆଇନ ବୋଲି କହିଛନ୍ତି। ସରକାର ଏପରି ଜନବିରୋଧି କାର୍ଯ୍ୟରୁ ନିବୃତ ରହି ବଲାଙ୍ଗୀର ଜିଲ୍ଲାରେ କୃଷିଭିତ୍ତିକ ଶିଳ୍ପ ସ୍ଥାପନ କରି ଲୋକଙ୍କୁ ଜୀବନ ଜୀବିକା ଯୋଗାଇବାରେ ସହାୟକ ହୁଅନ୍ତୁ ବୋଲି କହିଛନ୍ତି ।