11-Jun-2025

ବିନିକା/ଉଲୁଣ୍ଡା(ପ୍ରେରଣା ନିୟୁଜ) ପାତାଳି ଶ୍ରୀକ୍ଷେତ୍ର,ଲୀଳାମୟ ଠାକୁର ଶ୍ରୀଜଗନ୍ନାଥଙ୍କ ଆଦିଲୀଳାସ୍ଥଳୀ । ସୋନପୁର ଜିଲ୍ଲା କୋଟସମଲେଇର ତ୍ରିକୂଟ କନ୍ଦରରେ ପ୍ରଭୁ ଶ୍ରୀଜଗନ୍ନାଥଙ୍କ ସ୍ନାନଯାତ୍ରା ଅନୁଷ୍ଠିତ ହୋଇଯାଇଛି । ଦେବଭୂମି ଦେବଝରଣର ପବିତ୍ର ଜଳରେ ପ୍ରଭୁ ବଳଭଦ୍ର,ସୁଭଦ୍ରା,କାଳିଆ ଓ ଚକ୍ରରାଜ ସୁଦର୍ଶନ ଭଳି ଚତୁର୍ଦ୍ଧାମୂର୍ତ୍ତିଙ୍କ ସହ ଗମ୍ଭୀରାରେ ଥିବା ପ୍ରତ୍ୟେକ ଦେବାଦେବୀ ତଥା ଭକ୍ତଶିରୋମଣି ସନ୍ଥକବି ଚନ୍ଦ୍ରମଣି ଦାସଙ୍କୁ ମଧ୍ୟ ସ୍ନାନ କରାଯାଇଛି । ପାତାଳିକ୍ଷେତ୍ର ବିକାଶ ପରିଷଦ ତରଫରୁ ଅନୁଷ୍ଠିତ ଏଇ ଯାତ୍ରାରେ ପୂଜକ ସେବକ ଭାବରେ ଘୁଣ୍ଡୁଗୋପାଳ ପୁରୋହିତ,ବିକାଶ ପଣ୍ଡା,ଅଶୋକ ପାଢ଼ୀ,ଉଦ୍ଧବ ଦାସ ପ୍ରମୁଖ ଯୋଗଦେଇ ପ୍ରଭୁଙ୍କର ନୀତିକାନ୍ତି ବଢେଇଥିଲେ ।  ଏହି ଯାତ୍ରାରେ ଦୂରଦୂରାନ୍ତରରୁ ଶହ ଶହ ଦର୍ଶକ ରୁଣ୍ଡ ହୋଇ ପ୍ରଭୁଙ୍କ ସ୍ନାନୋତ୍ସବ ଦର୍ଶନ କରି ନିଜକୁ ଧନ୍ୟ ମଣିଥିଲେ । ଏତ ତ୍ସହିତ ଦେବଝରଣ, ପାତାଳି ଗୁମ୍ଫା ମାଧବଗୁମ୍ଫା,ଧ୍ଵନି ଗୁମ୍ଫା,ଯୋଗୀ ଗୁମ୍ଫା,ବାଲିଗୁମ୍ଫା,ଦେବସଭା ମଣ୍ଡଳୀ,ସାତଭଉଣୀ ପୀଠ,ମା କନ୍ଧୁଣିବୁଢ଼ୀ ପୀଠ,ଧ୍ଵଜାବନ୍ଧା, ଯାତ୍ରାପଦାସ୍ଥ କଳ୍ପବଟ ପ୍ରଭୃତି ଦର୍ଶନୀୟ ସ୍ଥଳ ପର୍ଯ୍ୟଟନ କରିଥିଲେ  । ଅନୁଷ୍ଠାନର୍ ସଭାପତି ଗବେଷକ ଶ୍ରୀ କମ୍ଭୁଧର କର୍ଣ୍ଣ କାର୍ଯ୍ୟକ୍ରମକୁ ସଂଯୋଜନା କରିଥିବାବେଳେ ସମ୍ପାଦକ ଗୋପୀନାଥ କୁରୁକୁରିଆ ପରିଚାଳନା କରିଥିଲେ । ଏଇ ଅବସରରେ ସଂସ୍କୃତି ଗବେଷକ ଡକ୍ଟର ଅନିରୁଦ୍ଧ କୁରୁକୁରିଆ ତ୍ରିକୂଟ କନ୍ଦର : କିଛି ଇତିହାସ ଓ କିଛି କିମ୍ବଦନ୍ତୀ ସଂପର୍କରେ କଥା କାର୍ଯ୍ୟକ୍ରମରେ ବକ୍ତବ୍ୟ ରଖିଥିଲେ । ତାପରେ ଆଗାମୀ ରଥଯାତ୍ରା ଉପରେ ଆଲୋଚନା ହୋଇଥିଲା । ସାମୂହିକ ମହାପ୍ରସାଦ ସେବନ ସହ ସମାପନ ହୋଇଥିଲା ଏଇ ମହୋତ୍ସବ । ଅନୁଷ୍ଠିତ ଉତ୍ସବରେ ମିତ୍ରଭାନୁ ବାରିକ,ସୋନୁ ଦଣ୍ଡସେନା,ଅଭୟ, ବସୁ,ବିଷ୍ଣୁଚରଣ,ଲାଲେନ୍ଦ୍ର,ମାଧବ, ହରିଶ୍ଚନ୍ଦ୍ର ଆଦି ଭକ୍ତବିଶେଷ ସହଯୋଗ କରିଥିଲେ ।