27-May-2025

ବଲାଙ୍ଗୀର(ପ୍ରେରଣାଖବର): ବଲାଙ୍ଗୀର ଜିଲ୍ଲା ପୁଇଁତଳା ଥାନା ଅନ୍ତର୍ଗତ କୁଲଥିପାଲି ଗାଁରେ ବଡଖବର ବୈଦ୍ୟୁତିକ ଚେନେଲା ର ସାମ୍ବାଦିକ ବିଜୟକୁମାର ପଧାନଙ୍କୁ ଗତ ଶୁକ୍ରବାର ଠିକଦାର ଗଜେନ୍ଦ୍ର ଦଳେଇଙ୍କ ପ୍ରରୋଚନାରେ ହାତଗୋଡବାନ୍ଧି ମାଡମାରି ହତ୍ୟା ଉଦ୍ୟମ କରିଥିଲେ । ସେହି ଘଟଣାରେ ଗତକାଲି ୪ଜଣ ଅଭିଯୁକ୍ତ ଗିରଫ ହୋଇଥିବା ବେଳେ ଆଜି ମୁଖ୍ୟ ଅଭିଯୁକ୍ତ ଗଜେନ୍ଦ୍ର ଦଳେଇକୁ ପୁଇଁତଳା ପୋଲିସ ଗିରଫ କରିବାରେ ସଫଳ ହୋଇଛି । ଗତ ୪ଦିନ ହେଲା ଗଜେନ୍ଦ୍ର ଫେରାର ରହିଥିଲା । ଆଜି ବଲାଙ୍ଗୀର-ସୋନପୁର ସୀମାନ୍ତରେ ତାକୁ ଧରାଯାଇଛି । ଘଟଣାପରେ ଗଜେନ୍ଦ୍ର ଝାରସୁଗୁଡାକୁ ଚାଲି ଯାଇଥିଲା । ଆଜି ତାକୁ ପୋଲିସଟିମ ଧରିବାକୁ ତାର ଗାଡିକୁ ଟ୍ରାକ କରୁଥିଲା । ଶେଷରେ ରାସ୍ତାରେ ସୋନପୁର ସୀମାନ୍ତରେ ଧରାପଡିଥିବା ଅତିରିକ୍ତ ଏସପି ଅଲୋକ ଜେନା ଗଣମାଧ୍ୟମକୁ ସୂଚନା ଦେଇଛନ୍ତି । ପୂର୍ବରୁ ପୁଇଁତଳା ଥାନାରେ ରୁଜୁ ହୋଇ ଥିବା ମାମଲା ନମ୍ବର ୧୬୫/୨୦୨୫ର ତଦନ୍ତ କରି ସେହି ଘଟଣାରେ ପୁଇଁତଳା ପୋଲିସ ଜଣେ ନାବାଳକ ସମେତ ୪ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ସମେତ ଠିକାଦାର ଗଜେନ୍ଦ୍ର ଦଳେଇଙ୍କ ପୁତୁରା କୁଲଥିପାଲିର ଅବିନାଶ ଦଳେଇ(୨୫),ଗୁମର ନାଏକ(୪୦),ବଲାଙ୍ଗୀର ବରପାଲିପଡାର ଅଦିତ୍ୟକୁମାର ଜେନା(୩୧) ରହିଥିଲେ ।  ଅଭିଯୁକ୍ତ ଅବିନାଶ ଦଳେଇ ଓ ଅଦିତ୍ୟ ଜେନା ନାମରେ ପୂର୍ବରୁ ଅନେକ ଅପରାଧିକ ମାମଲା ରହିଛି ।
କୁଲଥିପାଲିରେ ଚାଲିଥିବା ଏକ ଗାର୍ଡୱାଲକାମର ନ୍ୟୁଜ କରିଥିବା ସାମ୍ବାଦିକ ବିଜୟ ପଧାନଙ୍କୁ ସେହି ଗାଁର ଠିକାଦାର ଗଜେନ୍ଦ୍ର ଦଳେଇଙ୍କ ପ୍ରରୋଚନାରେ ମାଡମରାଯାଇଥିଲା । ଏପରିକି ଖବର ସଂଗ୍ରହ କରିବାକୁ ଯାଇଥିବା ସାମ୍ବାଦିକ ବିଜୟଙ୍କୁ ଗାଁକୁ ନେଇ ଗଛରେ ହାତବାନ୍ଧି କଙ୍ଗାରୁକୋର୍ଟରେ ନିର୍ଯ୍ୟାତନା ଦେଇ ହତ୍ୟା ଉଦ୍ୟମ କରାଯାଇଥିଲା । ଏହି ଘଟଣା ପରେ ବଲାଙ୍ଗୀରରୁ ନେଇ ରାଜ୍ୟର ରାଜଧାନୀ ଭୁବନେଶ୍ୱର ପର୍ଯ୍ୟନ୍ତ ସାମ୍ବାଦିକମାନେ ପ୍ରତିକ୍ରୀୟା ପ୍ରକାଶ କରିଥିଲେ । ମୁଖ୍ୟମନ୍ତ୍ରୀ ନିଜେ ଏହି ଘଟଣାରେ ହସ୍ତକ୍ଷେପ କରନ୍ତୁ ବୋଲି ଓଡିଶା ୟୁନିୟନ ଅଫ ଜର୍ଣ୍ଣାଲିଷ୍ଟ ସଂଘର ରାଜ୍ୟ ସଭାପତି ପ୍ରସନ୍ନ ମହାନ୍ତି ଟ୍ୱିଟକରିଥିଲେ । ଠିକସେହିପରି ରୁବେନ ବାନାର୍ଜିଙ୍କ ଭଳି ବରିଷ୍ଠ ସାମ୍ବାଦିକମାନେ ସରକାର ସାମ୍ବାଦିକ ସୁରକ୍ଷାନେଇ ପଦକ୍ଷେପ ନିଅନ୍ତୁ ବୋଲି ଦାବି କରିଥିଲେ । ବଲାଙ୍ଗୀର ଜିଲ୍ଲା ସାମ୍ବାଦିକ ସଂଘ, ଓୟୁଜେ, ଏସୟୁଜେ ସମେତ ବ୍ଲକମାନଙ୍କଠାରୁ ଆରମ୍ଭ କରି ରାଜ୍ୟର ବିଭିନ୍ନ ଜିଲ୍ଲାରେ ବିକ୍ଷୋଭ ପ୍ରଦର୍ଶନ କରାଯାଇ ମୁଖ୍ୟଅଭିଯୁକ୍ତ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଥିଲେ । ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ଓ ବଲାଙ୍ଗୀର ଏସପି ଅଭିଲାଷ ଜୀ ମୁଖ୍ୟଅଭିଯୁକ୍ତ ଗଜେନ୍ଦ୍ର ଦଳେଇକୁ ଖୁବଶୀଘ୍ର ଗିରଫ କରାଯିବ ବୋଲ ପ୍ରତିଶୃତି ଦେଇଥିଲେ । ଆଜି ଶେଷରେ ଗଜେନ୍ଦ୍ର ଦଳେଇକୁ ଗିରଫ କରାଯାଇଛି ।