22-May-2025

ବରଗଡ଼:(ନିରଞ୍ଜନ ତ୍ରିପାଠୀ) -ବରଗଡ଼ ଜିଲ୍ଲା ପଦ୍ମପୁର ରେଞ୍ଜ ଅଧିନରେ ଯାଉଛି,ପାଇକମାଲ ବ୍ଲକର ଲଖମରା ଗ୍ରାମ ପଞ୍ଚାୟତ।ଏଇ ଗ୍ରାମପଞ୍ଚାୟତ ଅନ୍ତର୍ଗତ ଧୂମାଭଟା ଗ୍ରାମର ପୁନିତରାମ ଡନସନା ୭୩ ବର୍ଷରେ ପରଲୋକ ଗମନ କରିଛନ୍ତି।ଏହା ସ୍ୱାଭାବିକ ମୃତ୍ୟୁ ନୁହେଁ।ଗତ କିଛି ଦିନ ତଳେ ଜଙ୍ଗଲରୁ ଧୂମାଭଟା ଗ୍ରାମକୁ ଏକ ବଣ ମଈଷି ଚାଲି ଆସିଥିଲା।ବଣ ମଈଷି ର ଉପଦ୍ରବରେ ସ୍ୱର୍ଗତ ପୁନିତରାମ ଡନସନାଙ୍କ ଆଜି ମୃତ୍ୟୁ ହୋଇଛି ବୋଲି ଧୂମାଭଟା ଗ୍ରାମବାସୀଙ୍କ ଠାରୁ ପ୍ରକାଶ।ବଣ ମଈଷି ଆକ୍ରମଣରେ ପୁନିତରାମ ସାଙ୍ଘାତିକ ଭାବେ ଅସୁସ୍ଥ ହୋଇ ପଡ଼ିଥିଲେ। ତାଙ୍କୁ ବିଭିନ୍ନ ସରକାରୀ, ବେସରକାରୀ ହସ୍ପିଟାଲ କୁ ନେଇ ପୁଅ ଚତୁର୍ଭୁଜ ଡନସନା ବିଭିନ୍ନ ଲୋକଙ୍କ ଠାରୁ ଧାର ଉଧାର ଆଣି ବାପାଙ୍କୁ ଭଲ କରିବାକୁ ଚେଷ୍ଟାରତ ଥିଲେ।ଏ ସମ୍ପର୍କରେ ପୁଅ ବିଭାଗୀୟ ବନଖଣ୍ଡ ଅଧିକାରୀଙ୍କ ସହ ଯୋଗାଯୋଗ କଲେ ମଧ୍ୟ ଚିକିତ୍ସା ପାଇଁ କୈାଣସି ପ୍ରକାରର ସାହାଯ୍ୟ ମିଳି ପାରିନଥିଲା।ଏ ସମ୍ପର୍କରେ ବିଶ୍ୱବାଣୀ ସମ୍ବାଦପତ୍ର ଜରିଆରେ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ସମ୍ବାଦ ମଧ୍ୟ ପ୍ରକାଶିତ ହୋଇଥିଲା।ହେଲେ ରାଜ୍ୟ ସରକାର ତଥା ବିଭାଗୀୟ ଅଧିକାରୀମାନଙ୍କ ସୁଦୃଷ୍ଟି ପୁନିତରାମ ଡନସନାଙ୍କ ଉପରେ ପଡ଼ିନଥିଲା। ଏଠାରେ ଉଲ୍ଲେଖଯୋଗ୍ୟ ଯେ, ଯଦି କୈାଣସି ବନ୍ୟଜନ୍ତୁଙ୍କୁ କେହି ଶିକାର କରେ ତେବେ ତାଙ୍କୁ ବିଭାଗ ତରଫରୁ ଜେଲଦଣ୍ଡ,ଅର୍ଥ ଦଣ୍ଡ ଭୋଗିବାକୁ ପଡ଼ିଥାଏ।କିନ୍ତୁ ବନ୍ୟଜନ୍ତୁ ଯଦି ମଣିଷ ମାରେ ତା ପାଇଁ କଣ ବନ ବିଭାଗକୁ ଦଣ୍ଡ ବିଧାନ ନାହିଁକି ବୋଲି ଜନସାଧାରଣ ପ୍ରଶ୍ନ କରନ୍ତି। ଏଭଳି ଘଟଣା ସାରା ରାଜ୍ୟରେ ଦେଖିବାକୁ ମିଳୁଥିବା ବେଳେ ପୁନିଆ ରାମଙ୍କ ଅକାଳ ମୃତ୍ୟୁ ପାଇଁ ବିଭାଗୀୟ ବନଖଣ୍ଡ ଅଧିକାରୀ ସମ୍ପୂର୍ଣ୍ଣ ରୂପେ ଦାୟୀ ବୋଲି ଜନମତ ପ୍ରକାଶ ପାଇଛି।ଏପରିକି,ପାଇକମାଲ ବ୍ଲକ ଅଧିନସ୍ଥ ଟୁଇଟର ଗାର୍ଲ ଦୀପା ବାରିକ ବଣ ମଈଷି ଆକ୍ରମଣରେ ଶିକାର ହୋଇ ମୃତ୍ୟୁ ସହ ସଂଗ୍ରାମ କରୁଥିବା ପୁନିତରାମ ଡନସନାଙ୍କ ସମ୍ପର୍କରେ ସ୍ଥାନୀୟ ପ୍ରଶାସନ ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦୃଷ୍ଟି ଆକର୍ଷଣ କରିଥିଲେ।ତଥାପି ଜୀବନର ଦୀପ ସବୁଦିନ ପାଇଁ ଲିଭିଗଲା।