25-Apr-2025

ବଲାଙ୍ଗୀର(ପ୍ରେରଣା ଖବର)- ଆସନ୍ତା ଅପ୍ରେଲ ୨୯ ତାରିଖରେ ଭଗବାନ ପର୍ଶୁରାମଙ୍କ ଜନୋତ୍ସବ ପାଳିତ ହେବ । ଏହି ଦିନ ସକାଳୁ ନରସିଂହମନ୍ଦିରଠାରେ ପୂଜା ଓ ଯଜ୍ଞର ଆୟୋଜନ କରାଯିବା ସହିତ ସଂଧ୍ୟାରେ ଜିଲ୍ଲା ବ୍ରାହ୍ମଣ ମହାସଂଘ ଓ ପର୍ଶୁରାମ ଜନ୍ମୋତ୍ସବ ପାଳନ କମିଟି ପକ୍ଷରୁ ଏକ ବିଶାଳ ଶୋଭାଯାତ୍ରା କରାଯିବାକୁ ସ୍ଥିର ହୋଇଛି। ଏହି ଶୋଭାଯାତ୍ରାରେ ସହରର ଶତାଧିକ ସଂଗଠନ ସାମିଲ ହେବେ ବୋଲି ଆଜି ସ୍ଥାନୀୟ ନରସିଂହ ମନ୍ଦିରଠାରେ ଆୟୋଜକ କମିଟି ପକ୍ଷରୁ ଆୟୋଜିତ ସାମ୍ବାଦିକ ସମ୍ବିଳନୀରେ ସୂଚନା ଦିଆଯାଇଛି। ଶୋଭାଯାତ୍ରା ୨୯ ତାରିଖ ସଂଧ୍ୟା ୬.୩୦ମିନିଟରୁ ନରସିଂହମନ୍ଦିର ଠାରୁ ବାହାରି ଦୁର୍ଗାମନ୍ଦିର, ମହାଦେବ ମନ୍ଦିର, ପାଟଣେଶ୍ୱରୀ ମନ୍ଦିର, ସମଲେଶ୍ୱରୀ ମନ୍ଦିର, ରାମମନ୍ଦିର ଦେଇ ବିକ୍ରମଛକ, ପିପିଏକାଡେମୀ ଛକ, ଭାଗିରଥି ଛକ, କଚେରୀ ଛକ ଦେଇ ପୁଣି ନରସିଂହ ମନ୍ଦିରକୁ ପହଞ୍ଚିବ । ଶୋଭାଯାତ୍ରାପରେ ଏଠାରେ ସମସ୍ତଙ୍କ ପାଇଁ ପ୍ରସାଦସେବନର ବ୍ୟବସ୍ଥା ମଧ୍ୟ କରାଯାଇଛି ।  ଆୟୋଜକ କମିଟିର ଆବାହକ ସୁଧିର ଚାନ୍ଦଙ୍କ ସଭାପତିତ୍ୱରେ ଅନୁଷ୍ଠିତ ଏହି ସାମ୍ବାଦିକ ସମ୍ବିଳନୀରେ ରାଜ୍ୟ ପର୍ଶୁରାମବାହିନୀର କାର୍ଯ୍ୟକାରୀ ସଭାପତି ନରେନ୍ଦ୍ର ଆଚାର୍ଯ୍ୟ, ବଲାଙ୍ଗୀର ବ୍ରାହ୍ମଣ ମହାସଂଘର ସଭାପତି ଜୟରାମ ମିଶ୍ର ଓ ଶିବଶଙ୍କର ଖୁଆସ ଯୋଗଦେଇ ପର୍ଶୁରାମ ଜନ୍ମୋତ୍ସବ ପାଳନ ଉପରେ ସୂଚନା ଦେଇଥିଲେ । ନରେନ୍ଦ୍ର ଆଚାର୍ଯ୍ୟ ସୂଚନା ଦେଇଥିଲେ ଯେ, ଯେତେବେଳେ ସମାଜରେ ଦୁର୍ନୀତି, ଅତ୍ୟାଚାର ବଢିଥାଏ ସେତେବେଳେ ଖୋଦ ଭଗବାନ ଅବତାରି ପୁରୁଷ ଭାବରେ ଜନ୍ମନେଇ ଅତ୍ୟାଚାରୀଙ୍କୁ ଦମନ କରିଥାନ୍ତି । ସେହିକ୍ରମରେ ଭଗବାନ ବିଷ୍ଣୁଙ୍କର ଷଷ୍ଠ ଅବତାର ଭାବରେ ଭଗବାନ ପର୍ଶୁରାମ ଜନ୍ମନେଇ ସହସ୍ରବାହୁ ଭଳି ଦୂରାଚାରୀଙ୍କୁ ଦମନ କରିଥିଲେ । ମହାଦେବଙ୍କ ପର୍ଶୁପ୍ରାପ୍ତ ହୋଇ ମହାବଳି ହୋଇପାରିଥିବା ଭଗବାନ ପର୍ଶୁରାମଙ୍କ ଜନ୍ମୋତ୍ସବକୁ ଧୁମଧାମରେ ପାଳନ କରାଯିବାକୁ ସ୍ଥିର କରା ଯାଇଛି । ସେଥିପାଇଁ ସବୁବର୍ଗର ସଂଗଠନମାନେ ସାମିଲ ହେବାକୁ ଅନୁରୋଧ କରାଯାଇଛି । ସଂପ୍ରତି ଦେଶରେ ହିନ୍ଦୁ ମାନଙ୍କୁ ଟାର୍ଗେଟ କରାଯାଉଛି । ଜମ୍ମୁୁକାଶ୍ମିରର ପେହେଲଗାମ ଠାରେ ୨୬ଜଣ ନୀରିହ ପର୍ଯ୍ୟଟକଙ୍କୁ ଆତଙ୍କବାଦୀ ହତ୍ୟା କରିଦେଲେ । ମୁର୍ସିଦାବାଦରେ ମଧ୍ୟ ହିନ୍ଦୁଙ୍କ ଉପରେ ଟାର୍ଗେଟ କରାଯାଇଛି । ତେଣୁ ଆଗକୁ ହିନ୍ଦୁଙ୍କ ସୁରକ୍ଷା ପାଇଁ ହିନ୍ଦୁମାନେ ହିଁ ଏକତ୍ରୀତ ହେବାକୁ ଆହ୍ୱାନ ଦିଆଯାଇଛ ଓ ଶୋଭାଯାତ୍ରାରେ ୫ହଜାର ଲୋକ ସାମିଲ ହେବେ ବୋଲି କମିଟି ପକ୍ଷରୁ ସୂଚନା ଦିଆ ଯାଇଛି । ସହରର ସମସ୍ତ ସଂଗଠନ ଓ ହିନ୍ଦୁଜାତି ସମାଜ ଏଥିରେ ସାମିଲ ହେବାକୁ ଅନୁରୋଧ କରାଯାଇଛି । ଆଜିର ଏହି ସମ୍ବାଦିକ ସମ୍ବିଳନୀରେ ଅନ୍ୟମାନଙ୍କ ମଧ୍ୟରେ ବ୍ରାହ୍ମଣ ମହାସଂଘର ସୁଧିର ତ୍ରୀପାଠୀ, କିଶୋର ପୁରୋହିତ, ପର୍ଶୁରାମ ନାୟକ, ଶିବନାରାୟଣ ରଥ, ସୁଭାଷ ଶତପଥି ପ୍ରମୁଖ ଉପସ୍ଥିତ ରହିଥିଲେ ।