09-Apr-2025

କଳାହାଣ୍ଡି,କୋକସରା ( ତ୍ରିନାଥ ବେଶ୍ରା )
କଳାହାଣ୍ଡି ଜିଲ୍ଲା କୋକସରା ବ୍ଲକ ଆମପାଣି ଅଙ୍ଗନବାଡି କେନ୍ଦ୍ରଠାରେ ମହିଳାମାନଙ୍କୁ ନେଇ ଏକ ପ୍ରଶିକ୍ଷଣ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଠାରେ ମୁଖ୍ୟ ଅତିଥି ଭାବରେ  ଓକ୍ସଫାମର ସମାଜ ସେବୀ ଜଗଜୀବନ କୁମାର, ଉମେନ୍ ଫେଡେରେସନର ଜିଲ୍ଲା ପରିଚାଳିକା କଲ୍ୟାଣୀ ଦାସ ନାଗରିକ ବିକାଶ ସଂଗଠନର ଜିଲ୍ଲା ସଂଯୋଜକ ଅନିଲ କୁମାର ଦାସ, ନାଗରିକ ବିକାଶ ସଂଗଠନର ଜିଲ୍ଲା ସଂପାଦିକା କୁନ୍ତି ନାଏକଙ୍କୁ ପୁଷ୍ପ ଗୁଚ୍ଛ ଦେଇ ସ୍ଵାଗତ ସମ୍ବର୍ଦ୍ଧନା କରାଯାଇଥିଲା। ମହାତ୍ମା ଜ୍ୟୋତିରାଓ ଫୁଲେ କହିଥିଲେ, "ଯଦି ଆପଣ ଜଣେ ପୁରୁଷଙ୍କୁ ଶିକ୍ଷିତ କରନ୍ତି, ତେବେ ଆପଣ ଜଣେ ବ୍ୟକ୍ତିଙ୍କୁ ଶିକ୍ଷିତ କରନ୍ତି, କିନ୍ତୁ ଯଦି ଆପଣ ଜଣେ ମହିଳାଙ୍କୁ ଶିକ୍ଷିତ କରନ୍ତି, ତେବେ ଆପଣ ଏକ ସମ୍ପୂର୍ଣ୍ଣ ପରିବାରକୁ ଶିକ୍ଷିତ କରନ୍ତି।" ଏହି ବାଣୀକୁ ଆଧାର କରି ନାଗରିକ ବିକାଶ ସଂଗଠନ ଦୀର୍ଘ 9 ବର୍ଷରୁ ଉର୍ଦ୍ଧ୍ୱ ହେବ ମହିଳାମାନଙ୍କୁ ସଚେତନ କରିବା, ସଂଗଠନ କରିବା, ସଶକ୍ତିକରଣ କରିବା, ଶିକ୍ଷିତ କରିବା ଉଦ୍ଦେଶ୍ୟରେ ଗ୍ରାମଗୁଡିକରେ ମହିଳାମାନଙ୍କୁ ନେଇ ବିଭିନ୍ନ କାର୍ଯ୍ୟକ୍ରମ ମାନ କରିଆସୁଅଛି। ପ୍ରଥମ ପର୍ଯ୍ୟାୟରେ ଆଜି  କୋକସରା ବ୍ଲକର 5 ଗୋଟି ପଞ୍ଚାୟତ ର ନେତୃତ୍ୱ ନେଉଥିବା ମହିଳାମାନେ ଉପସ୍ଥିତ ରହି ମହିଳାମାନଙ୍କ ସାମ୍ବିଧାନିକ ଅଧିକାର, ଘରୋଇ ହିଂସା, ଲିଙ୍ଗ ଭିତ୍ତିକ ହିଂସା, ଯୌତୁକଜନିତ ନିର୍ଯ୍ୟାତନା, ବାଲ୍ୟ ବିବାହ ଉପରେ ସଚେତନତା, ଏହି ସମସ୍ତ ବିଷୟ ଉପରେ ସରକାରଙ୍କ ପକ୍ଷରୁ କେଉଁ ପ୍ରକାରର ସୁବିଧା ସୁଯୋଗ ରହିଛି ତା ଉପରେ ପୁଙ୍ଖାନୁପୁଙ୍ଖ ଭାବରେ ଆଲୋଚନା କରାଯାଇଥିଲା।

ଉକ୍ତ ପ୍ରଶିକ୍ଷଣ କାର୍ଯ୍ୟକ୍ରମରେ ସମାଜ ସେବୀ ଜଗଜୀବନ କୁମାର ମହିଳା ମାନଙ୍କ ସାମ୍ବିଧାନିକ ଅଧିକାର, ଏବଂ ମହିଳା ମାନଙ୍କ ଉପରେ ହେଉଥିବା ଅତ୍ୟାଚାର, ନିର୍ଯାତନା ଉପରେ ବିସ୍ତୃତ ଭାବରେ ବୁଝାଇଥିଲେ । ଆତ୍ମଶକ୍ତିଟ୍ରଷ୍ଟ ମହିଳା ସଂଗଠନର ଜିଲ୍ଲା ପ୍ରଯୋଜକ କଲ୍ୟାଣୀ ଦାସ ୱାନ୍ ଷ୍ଟପ୍ ସେଣ୍ଟର, ସୁଧାର ଗୃହ, ଉମେନ୍ ସପୋର୍ଟ ସେଣ୍ଟରରେ କେଉଁ ପ୍ରକାରର ସୁବିଧା ରହିଛି, କିପରି ଜଣେ ନିର୍ଯ୍ୟାତିତ ମହିଳା ଯୋଗାଯୋଗ କରି ସୁବିଧା ପାଇପାରିବ ସେ ବିଷୟରେ ସମ୍ୟକ ଧାରଣା ପ୍ରଦାନ କରିଥିଲେ। ନାଗରିକ ବିକାଶ ସଂଗଠନର ଜିଲ୍ଲା ସଂଯୋଜକ ଅନିଲ କୁମାର ଦାସ,  କୋକସରା ବ୍ଲକର ପ୍ରତ୍ୟେକ ପଞ୍ଚାୟତରେ ଥିବା ମହିଳାମାନେ ଯେପରି ଏହି ପ୍ରକାର କାର୍ଯ୍ୟକ୍ରମରେ ସାମିଲ ହେବେ ଏବଂ ସମସ୍ୟା ଗୁଡିକ ଚିହ୍ନଟ କରି ପାରିବେ ଏବଂ ସରକାରଙ୍କ ସୁବିଧା ଗୁଡିକ ପାଇପାରିବେ ସେହି ବିଷୟରେ ଉତ୍ସାହିତ କରିଥିଲେ। ଶେଷରେ ସମାଜ ସେବୀ ଜଗଜୀବନ କୁମାର ଉପସ୍ଥିତ ସମସ୍ତ ମହିଳାମାନଙ୍କୁ ପକେଟ ସାମ୍ବିଧାନିକ ପୁସ୍ତକ ପ୍ରଦାନ କରିଥିଲେ। ଉକ୍ତ କାର୍ଯ୍ୟକ୍ରମକୁ କୋକସରା ବ୍ଲକ ସ୍ଥାନୀୟ ସଂଯୋଜକ ଉପେନ୍ଦ୍ର ସୁନାନୀ, ଜନସାଥୀ ତ୍ରିନାଥ ବେଶ୍ରା, ମୁକ୍ତା ଠାକୁର, ଉର୍ମି ଲିଡର ପ୍ରେମଶିଳା ପାଣିଗ୍ରାହୀ, ବୀଣାପାଣି ସୁନାନୀ, ନାଗରିକ ବିକାଶ ସଂଗଠନର ଜିଲ୍ଲା ସଂପାଦିକା କୁନ୍ତି ନାଏକ ସମେତ ବିଭିନ୍ନ ପଞ୍ଚାୟତ ରୁ ଆସି ଥିବା ମହିଳାମାନେ ଉପସ୍ଥିତ ରହି କାର୍ଯ୍ୟକ୍ରମକୁ ସାହାଯ୍ଯ ସହଯୋଗ କରିଥିଲେ।