30-Mar-2025

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଳକ ସୁବଳୟା  ପଞ୍ଚାୟତ ଅନ୍ତର୍ଗତ ଟିକିରାପଡାକୁ ଏକ ରାଜସ୍ବ ଗ୍ରାମର ମାନ୍ୟତା ପ୍ରଦାନ ପାଇଁ  ସ୍ଥାନୀୟ ବିଧାୟକ ଇଂ ରଘୁନାଥ ଜଗଦଲା ରାଜସ୍ବ ମନ୍ତ୍ରୀ ସୁରେଶ ପୁଜାରୀଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ପ୍ରକାଶ ଥାଉକି ସୁବଳୟା ରାଜସ୍ବ ଗ୍ରାମଠାରୁ ଟିକିରାପଡାଟି ପ୍ରାୟ ଦୁଇ କିଲୋମିଟର ଦୂରରେ ଅବସ୍ଥିତ ଓ ତିନୋଟି ଓ୍ବାର୍ଡ ବିଶିଷ୍ଟ ଏହି ପଡାରେ ପ୍ରାୟ ଛଅ ହଜାର ଲୋକ ବାସ କରନ୍ତି। ଏତେ ଜନସଂଖ୍ୟା ବିଶିଷ୍ଟ ଏହି ପଡାଟି ଆଜି ପର୍ଯ୍ୟନ୍ତ ଏକ ରାଜସ୍ବ ଗ୍ରାମର ମାନ୍ୟତା ପାଇ ନଥିବାରୁ ତଦନୁରୂପ ସରକାରୀ ସହାୟତା ଆଦିରୁ ସବୁବେଳେ ବଞ୍ଚିତ ଓ ଚିର ଅବହେଳିତ ହୋଇ ରହିଛି। ଦୀର୍ଘ ଦିନର ଦାବି ସତ୍ତ୍ବେ ଏହା ଆଜି ପର୍ଯ୍ୟନ୍ତ ଏକ ରାଜସ୍ବ ଗ୍ରାମର ମାନ୍ୟତା ପାଇ ପାରୁନାହିଁ। ଗତ ଶନିବାର ଦିନ ଗ୍ରାମବାସୀଙ୍କ ତରଫରୁ ଧ୍ରୁବ ମେହେର ଓ ମୁରଲି ମେହେରଙ୍କ ନେତୃତ୍ବରେ ଏକ ପ୍ରତିନିଧିଦଳ ଭୁବନେଶ୍ବର ଯାଇ ମାନ୍ୟବର ବିଧାୟକଙ୍କୁ ଏ ସଂପର୍କିତ ଏକ ଦାବିପତ୍ର ଦେଇଥିବା ବେଳେ ଆଜି ମାନ୍ୟବର ବିଧାୟକ ରାଜସ୍ବ ମନ୍ତ୍ରୀଙ୍କୁ ଭେଟି ଟିକିରାପଡାକୁ ଏକ ରାଜସ୍ବ ଗ୍ରାମର ମାନ୍ୟତା ପ୍ରଦାନ କରିବାକୁ ଦାବି କରିଥିଲେ। ଆଗାମୀ ଦିନରେ ଟିକିରାପଡା ନିଶ୍ଚିତ ଏକ ରାଜସ୍ବ ଗ୍ରାମର ମାନ୍ୟତା ପାଇବ ବୋଲି ମନ୍ତ୍ରୀଙ୍କ ଠାରୁ ଦୃଢ ପ୍ରତିଶୃତି ମିଳିବା ପରେ ଟିକିରାପଡା ବାସୀ ବେଶ ଖୁସି ଥିବା ଜଣାଯାଇଛି।