16-Mar-2025

ପାଟଣାଗଡ଼(ପୂର୍ଣ୍ଣ ଶଶୀ ଶେଖର ରାଓ): ଓଡ଼ିଶା ରାଜ୍ୟ ସାରା ଭାରତରେ ଏକ ସୁପ୍ରତିଷ୍ଠିତ ରାଜ୍ୟ ଭାବେ ପରିଗଣିତ। ଏହି ଓଡ଼ିଶାରେ ଭରି ରହିଛି ଅନେକ ମନୋରଞ୍ଜନ ସ୍ଥାନ ଓ ଜଙ୍ଗଲ ଘେରା ଦୁର୍ଗମ ପାହାଡିଆ ଅଞ୍ଚଳ‌ ତତ୍ ସଙ୍ଗେ ସଙ୍ଗେ ଅନେକ ଗୁଡ଼ିଏ ଖଣିଜ ସମ୍ପଦରେ ଭରପୁର ରହିଛି। ସେଥିପାଇଁ ଓଡ଼ିଶା କୁ ସବୁବେଳେ ଲୋଲୁପ ଦୃଷ୍ଟି ରେ ଦେଖି ଆସୁଅଛନ୍ତି ଅନେକ ଖଣି ମାଫିଆ । ପୂର୍ବରୁ ଅନେକ ଗୁଡ଼ିଏ ଖଣିଜ ପଦାର୍ଥ ଲୁଟି ନେଇଥିବା ବେଳେ ଆଜି ମଧ୍ୟ ଏହି ରାଜ୍ୟ ର ଖଣିଜ ପଦାର୍ଥ ଉପରେ ନଜର ରଖିଛନ୍ତି। ଗତ କିଛି ଦିନ ତଳେ ପଶ୍ଚିମ‌ ଓଡ଼ିଶା ର ପ୍ରସିଦ୍ଧ ଶୈବପୀଠ ହରିଶଙ୍କର ପାହାଡ଼ ପାଦଦେଶରେ ଆଦାନୀ କମ୍ପାନୀ ଜମି କିଣିବା ପରେ ଅଞ୍ଚଳର ଲୋକ ଙ୍କ ମନରେ ଆଶଙ୍କା ହୋଇଥିଲା ଯେ ହରିଶଙ୍କର ପାହାଡ଼ ର ଧ୍ବଂସ ହେବାକୁ ଯାଉଛି ଏହାର ପ୍ରତିବାଦରେ ୫୭ ଦିନ ଧରି ଲୋକ ଆନ୍ଦୋଳନ କରିଥିବାରୁ ଖନନ କାର୍ଯ୍ୟକୁ ସ୍ଥଗିତ ରଖିଛନ୍ତି ରାଜ୍ୟ ସରକାର ହେଲେ ତାର ସ୍ପଷ୍ଟୀକରଣ କରିନାହାନ୍ତି। ବର୍ତ୍ତମାନ ଚର୍ଚ୍ଚା ହେଉଛି ଯେ ପାଟଣାଗଡ଼ ନିର୍ବାଚନ ମଣ୍ଡଳୀର ପାଟଣାଗଡ଼ ବ୍ଳକ ଓ ବେଲପଡା ବ୍ଳକ ର ୨୧ ଟି ଗାଁ ରେ ଗ୍ରାଫାଇଟ ଖଣି ରହିଥିବା ଯୋଗୁଁ ସେହି ଗାଁ ମାନଙ୍କୁ ବିସ୍ଥାପିତ କରିବାକୁ ଚାହୁଁଛନ୍ତି ପ୍ରଶାସନ ଓ ଆଦାନୀ କମ୍ପାନୀ। ଯାହାକି ପାଟଣାଗଡ଼ ନିର୍ବାଚନ ମଣ୍ଡଳୀର ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ତାର ପ୍ରତିବାଦରେ ଗତ କିଛି ଦିନ ଏକ ବିରାଟ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା ପାଟଣାଗଡ଼ ବ୍ଳକ ସାଲେପାଲି ଗ୍ରାମ ପଞ୍ଚାୟତ ଚକାମାଲ ଆମ୍ବ ତୋଟା ଠାରେ ପୁଣି ଆଜି ୨୧ ଖଣ୍ଡ ଗାଁ ଲୋକେ ରୁଣ୍ଡ ହୋଇ ଆଗାମୀ ଦିନରେ ପାଟଣାଗଡ଼ ଠାରେ ବିରାଟ ଶୋଭାଯାତ୍ରା କରିବା ପାଇଁ ପ୍ରସ୍ତୁତି ବୈଠକ କରିଥିଲେ। ଆଦିବାସୀ ସଂଘ ବ୍ଳକ ସଭାପତି ଭୁବନେଶ୍ୱର କୁଅଁର ଙ୍କ ସଭାପତିତ୍ବରେ ସଭା କାର୍ଯ୍ୟ ଆରମ୍ଭ ହୋଇଥିବା ବେଳେ ଆଦିବାସୀ ସଂଘ ଯୁଗ୍ମ ସମ୍ପାଦକ

ଗିରିରାଜ ଭୋଇ ମଞ୍ଚ ପରିଚାଳନା କରିଥିଲେ। ବଲାଙ୍ଗିର ଜିଲ୍ଲା ହେଉଛି ଦାଦନ ପ୍ରବଣ ଜିଲ୍ଲା ଭାବେ ବେଶ ପରିଚିତ ଥିବାବେଳେ ଦାଦନ ମୁକ୍ତ କରିବାକୁ ହେଲେ ଏହି ଅଞ୍ଚଳ ରେ ଖଣି ଖନନ ନିତାନ୍ତ ଆବଶ୍ୟକ ବୋଲି ଗତ କିଛି ଦିନ ଲୋକସଭା ସାଂସଦ ସଙ୍ଗୀତା କୁମାରୀ ସିଂଦେଓ  ନିଜର ପ୍ରତିକ୍ରିୟା ରଖିଥିବା ବେଳେ ଜନସମର୍ଥନ ଲୋଡ଼ିଥିଲେ।
ଆନ୍ଦୋଳନକାରୀ ମାନଙ୍କ ଠାରୁ ଶୁଣିବାକୁ ଆଜି ମିଳିଛି ଯେ ଯଦିଓ ଏଠାକାର ନେତା ମନ୍ତ୍ରୀ ମାନେ ଲୋକଙ୍କ ପାଇଁ ସତରେ ଅଞ୍ଚଳର ବିକାଶ ଚାହୁଁଛନ୍ତି ତାହେଲେ ଏଠାରେ ପ୍ରଯୁକ୍ତି ବିଦ୍ୟା ର ପ୍ରୟୋଗ କରି ଅନେକ କଲକାରଖାନା ତିଆରି କରିବା ସହ ଚିନିକଳକୁ ପୁନଃ ଉଦ୍ଧାର କରନ୍ତୁ। ଏଭଳି ଦରଦ ଆମକୁ ଦରକାର ନାହିଁ "ଯିବୁ ପଛେ ଦାଦନ ଖଟି, ଛାଡ଼ିବୁ ନାହିଁ ନିଜ ମାଁ ମାଟି"ବୋଲି ସ୍ଳୋଗାନ ଦେଇଥିଲେ। ଆଗାମୀ ଦିନରେ ପାଟଣାଗଡ଼ ଠାରେ ବିରାଟ ଶୋଭାଯାତ୍ରା କରିବା ପାଇଁ ପ୍ରସ୍ତୁତି ହେଉଥିବା ଜଣାପଡିଛି।