07-Mar-2025

ଭୁବନେଶ୍ଵର, ତା. ୦୭/୦୩/୨୫  ( ପ୍ରେରଣା ଖବର ) ଭୁବନେଶ୍ଵର ରାଜ ଭବନର ନୂଆ ଅଭିଷେକ ପ୍ରେକ୍ଷାଳୟରେ ଆୟୋଜିତ ରାଜ୍ୟସ୍ତରୀୟ ଯୁବ ରେଡକ୍ରସ୍ ଓ ଜୁନିୟର ରେଡ଼କ୍ରସ ପୁରସ୍କାର ବିତରଣ ଉତ୍ସବରେ ଓଡିଶାର ମହାମହିମ  ରାଜ୍ୟପାଳ ତଥା ଭାରତୀୟ ରେଡକ୍ରସ୍ ସୋସାଇଟି, ଓଡ଼ିଶା ରାଜ୍ୟ ଶାଖାର ସଭାପତି ଡ. ହରିବାବୁ କମ୍ଭମପାଟି ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ : ପରିବର୍ତ୍ତନ ରେ ସାମିଲ ହୁଅ ଓ ପରିବର୍ତ୍ତନ ନିଜ ଠାରୁ ଆରମ୍ଭ କର। ଉକ୍ତ ଉତ୍ସବରେ ସମ୍ମାନିତ ଅତିଥି ଭାବେ ରାଜ୍ୟପାଳଙ୍କ ପ୍ରମୁଖ ସଚିବ ଏନବିଏସ ରାଜପୁତ ମଞ୍ଚାସୀନ ଥିଲେ। ଭାରତୀୟ ରେଡକ୍ରସ୍ ସୋସାଇଟି ଓଡ଼ିଶା ରାଜ୍ୟ ଶାଖାର ଅବୈତନିକ ସଚିବ ଗଣେଶ ଚନ୍ଦ୍ର ପାତ୍ର ସ୍ବାଗତ ଅଭିଭାଷଣ  ରଖିଥିଲେ । ଏହି ପୁରସ୍କାର ବିତରଣ ଉତ୍ସବରେ ୨୦୧୯-୨୦ ରୁ ୨୦୨୩-୨୪ ବର୍ଷ ପର୍ଯ୍ୟନ୍ତ ରାଜ୍ୟର ଯୁବ ରେଡକ୍ରସ୍ ର ୮ଟି ଶ୍ରେଷ୍ଠ ମହାବିଦ୍ୟାଳୟ, ୨୬ ଜଣ ଯୁବ ପରାମର୍ଶଦାତା, ୪୪ଜଣ ଯୁବ ସ୍ବେଚ୍ଛାସେବୀ ଏବଂ କନିଷ୍ଠ ରେଡକ୍ରସ୍ ର ୯ ଜଣ ଶ୍ରେଷ୍ଠ  କନିଷ୍ଠ ପରାମର୍ଶଦାତା , ୬ଜଣ ଶ୍ରେଷ୍ଠ  କନିଷ୍ଠ ସ୍ବେଚ୍ଛାସେବୀ , ୬ ଗୋଟି ଶ୍ରେଷ୍ଠ ବିଦ୍ୟାଳୟ ଓ ୩ ଗୋଟି ଶ୍ରେଷ୍ଠ ଜିଲ୍ଲା ମାନଙ୍କୁ  ସାମାଜିକ ସେବା ଓ ଜରୁରୀକାଳୀନ ସେବା ନିମନ୍ତେ ପୁରସ୍କୃତ କରାଯାଇଥିଲା। ଯୁବ ରେଡକ୍ରସ୍ ଓ କନିଷ୍ଠ ରେଡକ୍ରସ୍ ର କର୍ମଚାରୀ ସୁରେନ୍ଦ୍ର ନାଥ ସାମଲ, ଜ୍ଞାନଦା ପ୍ରସାଦ ସାହୁ, ପ୍ରତାପ ଜେନା ଓ ରମା ରାଣୀ ସେନାପତିଙ୍କୁ ସମ୍ମାନିତ କରାଯାଇଥିଲା। ଏହି ଅବସରରେ  ମହାମହିମ ରାଜ୍ୟପାଳ ତଥା ଓଡ଼ିଶା ରେଡକ୍ରସ୍ ସୋସାଇଟିର ସଭାପତିଙ୍କ ଉପଦେଶ କ୍ରମେ ପିଲାମାନଙ୍କ ଚକ୍ଷୁର ସୁରକ୍ଷା ପାଇଁ ବାଲ୍ୟାବସ୍ଥାରୁ ଦ୍ୱାରା ଚକ୍ଷୁ ସମସ୍ୟା ନିରୂପଣ ନିମନ୍ତେ ୧୦ ଗୋଟି ବିଦ୍ୟାଳୟକୁ ଚକ୍ଷୁ ପରୀକ୍ଷଣ ଯନ୍ତ୍ର ବଣ୍ଟନ କରାଯାଇଥିଲା। ଏହାକୁ ପରିବର୍ତ୍ତୀ ସମୟରେ ରାଜ୍ୟର ସମସ୍ତ ବିଦ୍ୟାଳୟକୁ ବିତରଣ କରିବା ପାଇଁ ମହାମହିମ ରାଜ୍ୟପାଳ ଉପଦେଶ ଦେଇଥିଲେ ।ଏହି ଉତ୍ସବରେ ରାଜ୍ୟର ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟରୁ  ପ୍ରାୟ ୫୦୦ ସ୍ବେଚ୍ଛାସେବୀ ଓ ପରାମର୍ଶଦାତା, ଜିଲ୍ଲା ଅଧିକାରୀ, ଆଜୀବନ ସଦସ୍ୟ ଓ ଅନ୍ୟ ମାନେ ଉପସ୍ଥିତଥିଲେ। ରାଜ୍ୟ ରେଡକ୍ରସ୍ ର କୋଷାଧ୍ୟକ୍ଷ ଲାବଣ୍ୟ ଶବର, ଯୁଗ୍ମ ସଚିବ ଅଶୋକ କୁମାର ମହାନ୍ତି ଉପସ୍ଥିତ ଥିଲେ‌ l ଯୁବ ରେଡକ୍ରସ୍ ଅଧିକାରୀ ଡ଼. ରମେଶ ଚନ୍ଦ୍ର ବେହେରା ଓ କନିଷ୍ଠ ରେଡକ୍ରସ୍ ଅଧିକାରୀ ଲକ୍ଷ୍ମଣ ସ୍ବାଇଁ, ରାଜ୍ୟ ସଂଯୋଜକ ଗୋପାଳ କୃଷ୍ଣ ମିଶ୍ର , ସଂଯୁକ୍ତା ବାରିକ କାର୍ଯ୍ୟକ୍ରମ ପରିଚାଳନା କରିଥିଲେ। ରେଡକ୍ରସ୍ ର ସମସ୍ତ କର୍ମଚାରୀ  ଓ ରାଜ ଭବନର କର୍ମଚାରୀ କାର୍ଯ୍ୟକ୍ରମକୁ ସଫଳ କରିବାରେ ସହଯୋଗ କରିଥିଲେ।