05-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ସୋହେଲା ବ୍ଳକ ଅନ୍ତର୍ଗତ ସରକଣ୍ଡା ଉଚ୍ଚ ବିଦ୍ୟାଳୟର ନବମ ଶ୍ରେଣୀର ଛାତ୍ରୀ ଟିକେଶ୍ବରୀ ଭୁଏ ।  ସରକଣ୍ଡା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ସପ୍ତମ ଶ୍ରେଣୀରେ ପଢୁଥିବା ସମୟରେ ଟିକେଶ୍ବରୀ ଭୁଏଙ୍କ ଇନସ୍ପାୟାର ମାନକ ବିଜ୍ଞାନ ପ୍ରକଳ୍ପ ରାଜ୍ଯ ସ୍ତରରୁ ଜାତୀୟସ୍ତରକୁ ମନୋନୀତ ହୋଇଥିଲା । ବୁଣାକାର ମାନଙ୍କ ଦ୍ଵାରା କରାଯାଉଥିବା ଏକ କାମ ସହଜରେ  ସୁତା ଗୁଡାଇବା ପାଇଁ ସେ 'ସ୍ମାର୍ଟ ଅରଟ ଯନ୍ତ୍ର' ପ୍ରସ୍ତୁତ କରିଛନ୍ତି । ବିଦ୍ୟୁତ ଦ୍ବାରା ଚାଲୁଥିବା ଏହି ଯନ୍ତ୍ରଟି ପ୍ରସ୍ତୁତ କରିବାରେ ବିଦ୍ୟାଳୟର ବିଜ୍ଞାନ ଶିକ୍ଷକ ହରି ବାରିକ ମାର୍ଗଦର୍ଶନ କରିଥିଲେ ।  ବିଗତ ସମୟରେ  ସେ ଆମ ରାଜ୍ୟର ୨୫ ଜଣ କୁନୀ ବୈଜ୍ଞାନିକଙ୍କ ସହ  ଜାତୀୟସ୍ତରରେ ଭାଗ ନେଇ ନିଜର ପ୍ରକଳ୍ପ ପ୍ରଦର୍ଶନ କରିଥିଲେ । ଗତ ମାର୍ଚ୍ଚ ୧ ତାରିଖ ଦିନ ରାଜ୍ୟ ପ୍ରକଳ୍ପ ନିର୍ଦ୍ଦେଶିକା ଙ୍କ ଚିଠି ଅନୁସାରେ  ସେ ଓଡିଶାର  ୧୦ ଜଣ ଛାତ୍ରଛାତ୍ରୀଙ୍କ ମଧ୍ଯରେ ଜାପାନ ଯିବାକୁ ମନୋନୀତ ହୋଇଛନ୍ତି । ସେ ସାକୁରା ସାଇନ୍ସ୍ ହାଇସ୍କୁଲ ପ୍ରୋଗ୍ରାମ ଜାପାନ ୨୦୨୫ ରେ ଭାଗ ନେବେ ।  ଏହି ଖବର ଜାଣିବା ପରେ ଭଟଲୀ ବିଧାୟକ ଇରାସିସ ଆଚାର୍ଯ୍ଯ ଆଜି ସରକଣ୍ଡା ଉଚ୍ଚ ବିଦ୍ୟାଳୟ ଏବଂ ଉଚ୍ଚ ପ୍ରାଥମିକ ବିଦ୍ୟାଳୟ ଯାଇ ଛାତ୍ରୀ, ଛାତ୍ରୀର ପିତା ଏବଂ  ମାର୍ଗଦର୍ଶକ ଶିକ୍ଷକ  ହରି ବାରିକଙ୍କୁ ଉପଢୌକନ ଉପହାର ପ୍ରଦାନ କରି ଶୁଭେଚ୍ଛା ଜଣାଇଥିଲେ ।  ସୋହେଲା ବିଇଓ ଅମୃତା ସାହୁଙ୍କ ଅଧ୍ୟକ୍ଷତାରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇ ଥିଲା । ସଂପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ, ସହକାରୀ ଶିକ୍ଷକ ଶିକ୍ଷୟିତ୍ରୀ ଉପସ୍ଥିତ ଥିଲେ । ଏହି ସଫଳତା ପାଇଁ  ବରଗଡ ଡିଇଓ ବିଶ୍ବନାଥ ସାହୁ, ଏଡିଇଓ ଜ୍ଯୋତିକାନ୍ତ ସାହୁ, ଜିଲ୍ଲା ବିଜ୍ଞାନ ପରିଦର୍ଶକ ଧୀରଜ ପଟ୍ଟନାୟକ, ଏବିଇଓ ମନୋହର ଉଟୀ , ମୋତିଲାଲ ନନ୍ଦଙ୍କ ସହ ସମସ୍ତ  ସିଆରସିସି, ବିଦ୍ୟାଳୟର ପ୍ରଧାନଶିକ୍ଷକ, ଶିକ୍ଷକ, ଶିକ୍ଷୟିତ୍ରୀ ତଥା ବିଜ୍ଞାନ ପ୍ରେମୀ ଅଭିଭାବକ ଅଭିଭାବିକା  ଶୁଭେଚ୍ଛା ଜଣାଇଛନ୍ତି ।