28-Feb-2025

ବରଗଡ଼ ଜିଲ୍ଲା ଭଟଲି ବ୍ଲକ କାଶିପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଠାରେ ଗଣିତ ମେଳା ଏବଂ ଜାତୀୟ ବିଜ୍ଞାନ ଦିବସ ମିଳିତ  ଭାବେ ପାଳିତ ହୋଇ ଯାଇଛି। ପ୍ରଥମ ପର୍ଯ୍ୟାୟରେ ଗଣିତ ମେଳା/ହାଟକୁ ସ୍କୁଲ ପରିଚାଳନା କମିଟି ସଭାପତି ପବିତ୍ର ମହାପାତ୍ର ଉଦଘାଟନ କରିଥିଲେ। ଏଥିରେ  ସ୍ଥାନୀୟ ବିଶିଷ୍ଟ ବ୍ୟକ୍ତି ଗ୍ରାମ୍ୟ ଶାନ୍ତି କମିଟିର ସମ୍ପାଦକ ବିଦ୍ୟା ଧର ମହାପାତ୍ର, ଶିକ୍ଷାବିତ୍ ସରୋଜ କୁମାର ମହାପାତ୍ର ଓ ରାମକୃଷ୍ଣ ଦାଶ ସାମିଲ ହୋଇ ଛାତ୍ରଛାତ୍ରୀ ମାନଙ୍କୁ ଉତ୍ସାହିତ କରିଥଲେ। ଗଣିତ ମେଳା/ହାଟରେ  ଛାତ୍ରଛାତ୍ରୀ ମାନେ ବିଭିନ୍ନ ପନିପରିବା, ଜଳଖିଆ, ଘରୋଇ ସାମଗ୍ରୀ ଇତ୍ୟାଦି ବିକ୍ରି  କରି ବଜାର ତଥା ଗାଣିତିକ ହିସାବ କିତାବର ପ୍ରତ୍ୟକ୍ଷ ଜ୍ଞାନ ଆହରଣ କରିଥିଲେ।  ଦ୍ଵିତୀୟ ପର୍ଯ୍ୟାୟରେ ପ୍ରଧାନ  ଶିକ୍ଷକ ସୁଦାମ ସେଟ ଜାତୀୟ ବିଜ୍ଞାନ ଦିବସ ପାଳନର ଗୁରୁତ୍ୱ ଉପରେ ଆଲୋକପାତ କରିଥିଲେ l ଏହା କିମ୍ବଦନ୍ତୀ ଭାରତୀୟ ବୈଜ୍ଞାନିକ ସି.ଭି. ରମଣ ଏବଂ ପଦାର୍ଥ ବିଜ୍ଞାନ କ୍ଷେତ୍ରରେ ତାଙ୍କ ଅବଦାନକୁ ସମ୍ମାନିତ କରିବା ପାଇଁ ଉତ୍ସର୍ଗୀକୃତ ଏକ ଦିନ ଅଟେ। ଚଳିତ ବର୍ଷର ବିଷୟବସ୍ତୁ, "ନିରନ୍ତର ବିକାଶ ପାଇଁ ବିଜ୍ଞାନ" ଛାତ୍ରଛାତ୍ରୀ ମାନଙ୍କୁ ଭବିଷ୍ୟତ ପାଇଁ ଅଭିନବ ସମାଧାନ ଚିନ୍ତା କରିବାକୁ ଆହ୍ବାନ  ଦେଇଥିଲେ। ଏହି ବୈଠକରେ ବିଦ୍ୟାଳୟ ପରିଚାଳନା କମିଟିର ସଭାପତି ପବିତ୍ର ମହାପାତ୍ର ସଭାପତିତ୍ବ କରିଥିଲେ।ମୁଖ୍ୟବକ୍ତା ଭାବେ  ସାନ ଅମଲିପାଳି  ଉଚ୍ଚ ପ୍ରାଥମିକ ବିଦ୍ୟାଳୟର  ପ୍ରଧାନଶିକ୍ଷକ ପ୍ରତାପ କୁମାର ଜେନା  ଯୋଗଦେଇ ଛାତ୍ରଛାତ୍ରୀ ମାନଙ୍କୁ ଦିଗଦର୍ଶନ ଦେବା ସଙ୍ଗେ ସଙ୍ଗେ ବିଜ୍ଞାନର ଅବଦାନ ଏବଂ ତାର ସଦବିନିଯୋଗ ସମ୍ବନ୍ଧେ ଗୁରୁତ୍ୱାରୋପ କରିଥିଲେ। ସମ୍ମାନିତ ଅତିଥି ଭାବେ ବରିଷ୍ଠ ଶିକ୍ଷକ ନେହେରୁ ପାଇକ ମଞ୍ଚାସୀନ ଥିଲେ। ଏହି କାର୍ଯ୍ୟକ୍ରମରେ ଗଣିତ ପ୍ରଦର୍ଶନୀ ମଧ୍ୟ ଅନ୍ତର୍ଭୁକ୍ତ ଥିଲା ଯାହା ଦୈନନ୍ଦିନ ଜୀବନରେ ଗାଣିତିକ ଧାରଣାର ବ୍ୟବହାରିକ ପ୍ରୟୋଗ ପ୍ରଦର୍ଶନ କରିଥିଲା।ଛାତ୍ରଛାତ୍ରୀମାନେ ଗଣିତ ପଜଲ୍, କୁଇଜରେ ଅଂଶଗ୍ରହଣ କରିଥିଲେ ।
କୃତୀ ଛାତ୍ରଛାତ୍ରୀମାନଙ୍କୁ  ପ୍ରମାଣପତ୍ର ଦେଇ ପୁରସ୍କୃତ କରା ଯାଇଥିଲା । ସମଗ୍ର କାର୍ଯ୍ୟକ୍ରମକୁ ବିଦ୍ୟାଳୟର ସହକାରୀ ଶିକ୍ଷକ ପ୍ରଦୀପ କୁମାର ପଧାନ  ପରିଚାଳନା କରିଥିବା ବେଳେ ଶିକ୍ଷକ ଶ୍ରୀଯୁକ୍ତ ଦେବପ୍ରସାଦ ବାଗ, ଦୟାନିଧି ମହାପାତ୍ର ଓ ଶିକ୍ଷୟିତ୍ରୀ ସୁନୀତା ମହାପାତ୍ର ସହଯୋଗ କରିଥିଲେ। ପରିଶେଷରେ ସହକାରୀ ଶିକ୍ଷକ ଗୋବିନ୍ଦ ବାଗ ଧନ୍ୟବାଦ୍ ଦେଇଥିଲେ।