24-Jan-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକ ଅନ୍ତର୍ଗତ ବିଲେଇସର୍ଡା ମିନି ଷ୍ଟାଡିୟମ ଠାରେ ତୃତୀୟ ବିମଲେଇ ମହୋତ୍ସବର ଦ୍ବିତୀୟ ଦିବସର ସାଂଧ୍ଯ ଅଧିବେଶନ ମହୋତ୍ସବର ସଭାପତି ଭରତଭୂଷଣ ପ୍ରଧାନଙ୍କ ସଭାପତିତ୍ବରେ ଅନୁଷ୍ଠିତ ହୋଇଯାଇଛି। ସଭାରେ ମୁଖ୍ୟଅତିଥି ଭାବେ ଚାଷୀ ନେତା ଅରୁଣ ମିଶ୍ର  ଯୋଗଦେଇ ଆମର ଲୋକ ସଂସ୍କୃତି ହିଁ ଆମର ପ୍ରଧାନ ପଥ ପ୍ରଦର୍ଶକ ବୋଲି କହିବା ସହ ଶିଷ୍ଟ ପରଂପରା ପଛରେ ଲୋକ ସଂସ୍କୃତିର ବଳିଷ୍ଠ ଭୂମୀକା ରହିଛି ଏବଂ ସମାଜ ହିଁ ଲୋକ ସଂସ୍କୃତିର ଆଶ୍ରୟ ସ୍ଥଳ ବୋଲି ନିଜ ବକ୍ତବ୍ଯରେ  କହିବା ସହ ବିମଲେଇ ମହୋତ୍ସବ ର ଆୟୋଜକ ବଂଧୁ ମାନଙ୍କ ଉଦ୍ୟମକୁ ପ୍ରଶଂସା କରିଥିଲେ। ମୁଖ୍ୟବକ୍ତା ଭାବେ ଶିକ୍ଷାବିତ ମଧୁସୂଦନ ପ୍ରଧାନ ଯୋଗଦେଇ ମାନବ ସମାଜର ସମଷ୍ଟିଗତ ଆତ୍ମପ୍ରକାଶ ହେଉଛି ଲୋକସଂସ୍କୃତି ବୋଲି କହିବା ସହ ଏଭଳି ମହୋତ୍ସବ ଲୋକମାନଙ୍କୁ ଭାତୃତ୍ବ ବନ୍ଧନରେ ବାନ୍ଧି ରଖିଛି ବୋଲି  କହିଥିଲେ । ସମ୍ମାନୀତ ଅତିଥି ଭାବେ ବିଲେଇସର୍ଡା ସରପଞ୍ଚ ସୁଶାନ୍ତ ଛତ୍ରିଆ,ଅଭିନେତା ରାଜକିଶୋର ପାଇକ,ଶୁଶୀଲ ପଧାନ ପ୍ରମୁଖ ଯୋଗଦେଇ ନିଜ ବକ୍ତବ୍ଯରେ  ଆମ ପରଂପରା ଓ ସଂସ୍କୃତି କୁ ବଂଚାଇ ରଖି ବିକାଶ ପଥରେ ଆଗେଇବା ହିଁ ଆମ ଲକ୍ଷ୍ୟ ହେବା ଉଚିତ ବୋଲି କହିଥିଲେ । ଜ୍ୟୋତିପ୍ରକାଶ ସାହୁ କାର୍ଯ୍ଯକ୍ରମ ର ସଂଯୋଜନା ଓ ଅନିଲ ପଣ୍ଡା ଧନ୍ୟବାଦ ଦେଇଥିଲେ। ସଭାପରେ  କଂସ ଦରବାର ରେ  ସ୍ବୟମ ଏକାଡେମୀ ଡ୍ଯାନ୍ସ ସମ୍ବଲପୁର ର କଳାକାର ମାନଙ୍କ ଦ୍ବାରା ଦଳଗତ ନୃତ୍ଯ , ଶ୍ରୀୟା ସାହୁଙ୍କ ଏକକ ନୃତ୍ଯ,ପ୍ରୀନ୍ସ ସାଇ ଗୃପ ଙ୍କ ଦଳଗତ ନୃତ୍ଯ ପ୍ରଦର୍ଶନ ହୋଇଥିଲା। ମହୋତ୍ସବ କମିଟୀର ସମସ୍ତ କର୍ମକର୍ତ୍ତା ତଥା ଗ୍ରାମବାସୀ ସକ୍ରୀୟ ସହଯୋଗ କରିଥିଲେ।