26-Dec-2024

ନୂଆପଡ଼ା ଜିଲ୍ଳାରେ ଶିକ୍ଷା ବିଭାଗରେ ଏଫ୍ ଏଲ୍‌ ଏନ୍‌ କାର୍ଯ୍ୟକ୍ରମର ଚାରି କୋଟି ଟଙ୍କାର ଦୁର୍ନୀତିକୁ ଘଣ୍ଟ ଘୋଡାଇବା ଭଳି ୨୧ ଦଫା ଦାବି ନେଇ ଆଜି ଜିଲ୍ଳା ଆଦିବାସୀ କଲ୍ଯାଣ ସଂଘ ଜିଲ୍ଲାପାଳ କାର୍ଯ୍ୟାଳୟ ଘେରାଉ କରିଥିଲା। ଆଦିବାସୀ ସଂଘ ଜିଲା ସଭାପତି ଭାନୁ ପ୍ରତାପ ସିଂ ମାଝିଙ୍କ ନେତୃତ୍ୱରେ ଶତାଧିକ ଆଦିବାସୀ ମହିଳାପୁରୁଷ ପାରମ୍ପରିକ ବେଶଭୂଷା, ହାତ ହତିଆର ଓ ବାଦ୍ୟଯନ୍ତ୍ର ସହ ସ୍ଥାନୀୟ ପୋଲିସ ପଡିଆରୁ ଏକ ଶୋଭାଯାତ୍ରାରେ ବାହାରି ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲା। ଜିଲ୍ଲାପାଳଙ୍କ କାର୍ଯ୍ୟାଳୟକୁ ଧସେଇ ପଶିବାକୁ ଉଦ୍ୟମ କରୁଥିବାବେଳେ ପୋଲିସ ସହ ଧସ୍ତାଧସ୍ତି ହୋଇଥିଲା। ଦୀର୍ଘ ସମୟ ପର୍ଯ୍ୟନ୍ତ ପୋଲିସ ଓ ଧାରଣାକାରୀ ଧସ୍ତାଧସ୍ତି ହୋଇଥିଲେ। ପରେ ଆଦିବାସୀ ମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ୩୫୩ ନମ୍ବର ଜାତୀୟ ରାଜପଥ ଅବରୋଧ କରି ଧାରଣାରେ ବସିଥିଲେ। କେବଳ ଜରୁରିକାଳୀନ ସେବାକୁ ବାଦଦେଇ ଅନ୍ୟ ଯାନବାହନ ଚଳାଚଳ ବନ୍ଦ ରହିଥିଲା। ଫଳରେ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଦୀର୍ଘ ୬ ଘଣ୍ଟା ପରେ ଅତିରିକ୍ତ ଜିଲାପାଳ ଭୀମସେନ ଶବର ଓ ଉପଜିଲାପାଳ ଯୋଗେନ୍ଦ୍ର ମାଝି ଧାରଣା ସ୍ଥଳରେ ପହଞ୍ଚି ଆଲୋଚନା କରିଥିଲେ। ଜିଲ୍ଳା ଭିତରେ ଯାହା ସମ୍ଭବ ପୂରଣ କରିବା ସହ ଅନ୍ୟ ଦାବିଗୁଡିକୁ ସରକାରଙ୍କୁ ଜଣାଇବୁ ବୋଲି ପ୍ରତିଶ୍ରୁତି ଦେଲା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା । ଏହି ସମୟରେ ସେମାନେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ୨୧ଦଫା ସମ୍ବଳିତ ଦାବିପତ୍ର ପ୍ରଦାନ କରିଥିଲେ। ଦାବି ପୂରଣ ନ ହେଲେ ଆନ୍ଦୋଳନ ଭୟାବହ ହେବ ବୋଲି ଚେତାବନୀ ଦେଇଛନ୍ତି। ଏହି ସମୟରେ ରାଜ୍ୟ ଆଦିବାସୀ କଲ୍ୟାଣ ସଂଘର ସଭାପତି ବାଳକୃଷ୍ଣ ଶବର, ଦଳିତ ଆଦିବାସୀ କଲ୍ୟାଣ ମହାସଂଘ ଭବାନୀପାଟଣା ପରମାନନ୍ଦ ମାଝି, ବିଂଝାଲ ସମାଜ ରାଷ୍ଟ୍ରୀୟ ଅଧ୍ୟକ୍ଷ ହୃଷୀକେଶ ବରିହା, ହୋମ ସିଂ ମାଝି, ସରୋଜିନୀ ମାଝି, କମଲେଶ ଠାକୁର, ନୁଆପଡ଼ା ବ୍ଲକ ସଭାପତି ଭକ୍ତବନ୍ଧୁ ଧରୁଆ, କୋମନା ବ୍ଲକ୍ ସଭାପତି ଜ୍ଞାନେଶ୍ବର ମାଝୀ, ଭୁବନେଶ୍ଵର ମାଝୀ, ସୁଜନ ମାଝୀ, ଯମୁନା ଧରୁଆ ପ୍ରମୁଖ ଉପସ୍ଥିତ ଥିଲେ।

[ନୁଆପଡା ଜିଲ୍ଲାରୁ ପରମେଶ୍ୱର ମେହେରଙ୍କ ରିପୋର୍ଟ]