26-Dec-2024

ବରୀ ବ୍ଲକରେ ବାତ୍ୟା ‘ଦାନା’ ରେ ରନ୍ଧାଖାଦ୍ୟ ଦୁର୍ନୀତିକୁ ନେଇ ଚର୍ଚ୍ଚା ଜୋର ଧରିଛି। ପୂର୍ବ ବାତ୍ୟା ମାନଙ୍କ ଠାରୁ ଚଳିତ ବାତ୍ୟାରେ ଏଠାରେ ପ୍ରଭାବ ସମ୍ପୂର୍ଣ କମ୍ ହୋଇଥିଲା ବେଳେ ୧୯ ଲକ୍ଷ ଟଙ୍କା ବିଲ୍ ହେବା ଘଟଣାକୁ ସାଧାରଣରେ ନାପସନ୍ଦ କରାଯାଇଛି। ଯାହାକୁ ନବନିର୍ମାଣ କୃଷକ ସଙ୍ଗଠନ ବିରୋଧ କରି ଜିଲାପାଳଙ୍କୁ ଅଭିଯୋଗ କଲାପରେ ମଙ୍ଗଳବାର ଦିନ ତହସିଲ ସମ୍ମୁଖରେ ଧାରଣା ଦିଆ ଯାଇଥିଲା। ସଂଗଠନର ରାଜ୍ୟ ସଂଯୋଜକ ନିମାଇ ରାୟଙ୍କ ନେତୃତ୍ଵରେ ବ୍ଲକ ସଂଯୋଜକ ମାଧବାନନ୍ଦ ଶାନ୍ତି, ବଲ୍ଲଭ ଜେନା, ଅରୁଣ ସାମଲ, ନରହରି ଦାସ, ଅଭିରାମ ଦାସ, ମୃତ୍ୟୁଞ୍ଜୟ ପାତ୍ର, ଶ୍ରୀଧର ମହଲ, ଜୀବନ ଜେନା, ପ୍ରଫୁଲ ମହାନ୍ତିଙ୍କ ସମେତ ବହୁ ଚାଷୀ ଏହି ଧାରଣାରେ ବସି ରହିଥିଲେ। ମାତ୍ର ସନ୍ଧ୍ୟା ପର୍ଯ୍ୟନ୍ତ କୌଣସି ସରକାରୀ ଅଧିକାରୀ ଧାରଣା ସ୍ଥଳରେ ପହଞ୍ଚି ନଥିଲେ। ସମସ୍ତ ସରକାରୀ କର୍ମଚାରୀ ପଞ୍ଚାୟତ ପ୍ରତିନିଧିଙ୍କ ସହିତଏହି ମିଥ୍ୟା ବିଲ୍‌ରେ ସାମିଲ ଥିବାରୁ ସେମାନେ ଧାରଣା ସ୍ଥଳକୁ ଆସି ପାରୁନାହାନ୍ତି ବୋଲି ସଂଗଠନ ପକ୍ଷରୁ କୁହାଯାଇଛି। ସେହିପରି ଭିଜିଲାନ୍ସ ତଦନ୍ତ ଦାବି କରାଯାଇଥିବା ବେଳେ ଜିଲାପାଳ ଗ୍ରାମ୍ୟ ଉନ୍ନୟନ ସଂସ୍ଥାର କାର୍ଯ୍ୟ ନିର୍ବାହୀଙ୍କୁ ଘଟଣାର ତଦନ୍ତ ପାଇଁ ଦାୟିତ୍ଵ ଦେବାକଥା ଚୋର ହାତରେ ଚାବିକାଠି ଭଳି ରାଜ୍ୟ ସଂଯୋଜକ ଶ୍ରୀ ରାୟ କହିଛନ୍ତି । କାରଣ ବାତ୍ୟା ସମୟରେ ବରୀର ନୋଡାଲ ଅଧିକାରୀ ଭାବେ ଏହି କାର୍ଯ୍ୟ  ଦାୟିତ୍ଵରେ ଥିଲେ। ତାଙ୍କରି କାର୍ଯ୍ୟ ଧାରାରେ ହୋଇଥିବା ଦୁର୍ନୀତିକୁ ସେ କିପରି ତଦନ୍ତ କରିବେ ତାହା ପ୍ରଶ୍ନବାଚୀ ସୃଷ୍ଟି କରିଛି। ବୁଧବାର ବଡ଼ଦିନ ଛୁଟି ଥ‌ିବାରୁ ପରଦିନ ଅର୍ଥାତ ଗୁରୁବାର ୨୬ ତାରିଖ ଠାରୁ ଏହି ଧାରଣା ଚାଲୁ ରହିବ ବୋଲି ସଂଗଠନ ସୂଚନା ଦେଇଛି।

(ବରୀ ରୁ ରଞ୍ଜିତ ମହାନ୍ତିଙ୍କ ରିପୋର୍ଟ)