21-Dec-2024

ଅତାବିରା(ଆକାଶ ମିଶ୍ର): ଅତାବିରା ଦେଇ ଯାଇଥିବା  ଜତୀୟ ରାଜପଥ (୫୩) ରେ ସଡକ ଦୁର୍ଘଟଣା ନିତିଦିନିଆ ଭାବରେ ଘଟି ଚାଲିବା ସହ ଅମୂଲ୍ୟ ଜୀବନ  ଅନାୟସରେ ଚାଲିଯାଉଛି । ତ୍ରୁଟିପୂର୍ଣ୍ଣ ରାସ୍ତା ନିର୍ମାଣ, କୌଣସି ଛକରେ  ଟ୍ରାଫିକ ବ୍ୟବସ୍ଥା  ନ ଥିବା, ଯାନ ବାହନ ଗୁଡ଼ିକର ଦୃତଗତି ନିୟନ୍ତ୍ରଣ  ଯାଞ୍ଚ ଆଦି ପାଇଁ କୌଣସି  ପଦକ୍ଷେପ ନିଆଯାଉ ନଥିବାରୁ 

 ଦୁର୍ଘଟଣା ଗୋଟିଏ ପରେ ଗୋଟିଏ ଘଟିଚlଳିଛି । ଆଜି ପୁଣି ଗୋଟିଏ ଅମୂଲ୍ୟ ଜୀବନ ଗଡିଯାଇଛି । ଅତାବିରା ବସଷ୍ଟାଣ୍ଡ ଛକରେ ଏକ ପିକଅପ ଧକ୍କାରେ ଜଣେ ବାଇକ ଚାଳକର ମୃତ୍ୟୁ ଘଟିଛି । ଖବର ପାଇ ଅତାବିରା ପୋଲିସ ଘଟଣାସ୍ଥଳରେ ପହଞ୍ଚି ମୃତ ବ୍ୟକ୍ତିଙ୍କୁ ଉଦ୍ଧାର କରି ଅତାବିରା ହସ୍ପିଟାଲକୁ ନେଇ ଥିଲେ।  ସେଠାରେ ଡାକ୍ତର ମଧ୍ୟ ତାଙ୍କର ମୃତ୍ୟୁ  ଘୋଷଣା କରି ଥିଲେ। ଦୁର୍ଘଟଣାରେ ମୃତ୍ୟୁବରଣ କରିଥିବା ବ୍ୟକ୍ତି ଜଣକ ହେଲେ ଅତାବିରା ଥାନା ଲସ୍ତଲା ଗ୍ରାମର ରାମଚନ୍ଦ୍ର ମେହେର(୭୨) ବୋଲି ଜଣାପଡିଛି।

ସୂଚନାଯୋଗ୍ୟ ଯେ ସେ କୌଣସି କାମରେ ଅତାବିରା ଆସି ବସଷ୍ଟାଣ୍ଡ ଛକ ଦେଇ ବାଇକ  ନଂ ଓ  ଡି  ୧୭ଏ ଏ ୪୬୧୮ରେ ଅତିକ୍ରମ କରୁଥିବା ବେଳେ ବରଗଡ ପଟରୁ ଆସୁଥିବା ମାଲ ବୋଝେଇ ପିକଅପ ଭେନ ଓଡ଼ି-୧୭-ଏମ-୪୪୨୯ ଧକ୍କା ଦେଇଥିଲା।ଫଳରେ ବାଇକ ଚାଳକ ପିକପ ଭେନ ତଳେ ଚାପି ହୋଇ ଯାଇଥିଲେ।ଭେନଟିକୁ ଥାନାରେ ଅଟକ ରଖି ତଦନ୍ତ ଜାରି ରହିଛି ।