08-Nov-2024

ବରଗଡ଼:(ନିରଞ୍ଜନ ତ୍ରିପାଠୀ)  ବରଗଡ଼ ଜିଲ୍ଲା ର ଉପାନ୍ତ ତଥା  ଅବହେଳିତ  ଝାରବନ୍ଧ ବ୍ଲକ ରେ ଚଳିତ ବର୍ଷ ନିଅଣ୍ଟିଆ ବର୍ଷା ଯୋଗୁଁ ଚାଷର ଅନ୍ତିମ ପର୍ଯ୍ୟାୟରେ ଦେଖାଦେଇଥିବା ଭୟଙ୍କର ମରୁଡି ପରିସ୍ଥିତି କୁ ନେଇ ଆଞ୍ଚଳିକ କୃଷକ ସଂଗଠନ, ଝାରବନ୍ଧ ତରଫରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟର ଛଅ ଦଫା ଦାବି ସମ୍ବଳିତ ଏକ ସ୍ମାରକ ପତ୍ର  ପ୍ରଦାନ କରାଯାଇଛି। ତହସିଲଦାରଙ୍କ ଅନୁପସ୍ଥିତରେ ସୁପରଭାଇଜର ନବୀନ ରାଉତ ଦାବି ପତ୍ର ଗ୍ରହଣ କରିଥିଲେ। ଆଞ୍ଚଳିକ କୃଷକ ସଂଗଠନ ଝାରବନ୍ଧ ତରଫରୁ ସ୍ଥାନୀୟ ଦୁର୍ଗା ମଣ୍ଡପରୁ ଚାଷୀମାନଙ୍କ ଏକ ଶୋଭାଯାତ୍ରା  ବିଭିନ୍ନ ସ୍ଳୋଗାନ ଦେଇ କାର୍ଯ୍ୟାଳୟ ପର୍ଯ୍ୟନ୍ତ ପହଞ୍ଚିଥିଲା। ସଂଗଠନର ବ୍ଳକ ସଭାପତି କ୍ଷମାନିଧି ସାହୁଙ୍କ ସଭାପତିତ୍ବରେ ସେଠାରେ ଏକ ପ୍ରତିବାଦ ସଭା କରାଯାଇଥିଲା। ଚଳିତ ଖରିଫ ଋତୁରେ ଅନ୍ତିମ ପର୍ଯ୍ୟାୟରେ ବର୍ଷା ନହେବା କାରଣରୁ ଧାନ ଫସଲ ନଷ୍ଟ ହୋଇଗଲାଣି କିନ୍ତୁ ସରକାର ଓ ପ୍ରଶାସନ ସେ ଦିଗରେ କୌଣସି ପଦକ୍ଷେପ ନେଇ ନାହାଁନ୍ତି କି କ୍ଷୟକ୍ଷତିର ଆକଳନ ମଧ୍ୟ ଅଦ୍ୟାବଧି କରୁନାହାନ୍ତି। ଏ ଦିଗରେ ଉପଯୁକ୍ତ ପଦକ୍ଷେପ ଗ୍ରହଣ କରିବା ପାଇଁ ବକ୍ତାମାନେ ମତପ୍ରଦାନ କରିଥିଲେ। ଝାରବନ୍ଧ ବ୍ଲକକୁ ସଂପୂର୍ଣ୍ଣ ମରୁଡ଼ି ଘୋଷଣା,  ଜଳସେଚନର ସ୍ଥାୟୀ ବ୍ଯବସ୍ଥା, କୃଷି କାର୍ଯ୍ଯ ପାଇଁ ବ୍ୟବହୃତ ବିଜୁଳି ସଂପୂର୍ଣ୍ଣ ଛାଡ, ପ୍ରତ୍ଯେକ ପରିବାର କୁ ୩୦୦ ୟୁନିଟ ବିଜୁଳି ବିଲ ଛାଡ, ସ୍କୁଲ କଲେଜ ପିଲାଙ୍କ ଫିଜ ଛାଡ, ଖଜଣା ଛାଡ, ଘରୋଇ ବିମା କଂପାନି ରିଲେସନ୍ସ ର ମନମୁଖୀ କାର୍ଯ୍ୟ ବନ୍ଦ କରି ସବୁ ଆବେଦନକୁ ମଞ୍ଜୁରୀ ଦେବା ଏବଂ ସ୍ଵାମିନାଥନ୍ କମିସନ୍ ଲାଗୁ କରିବା ନେଇ ଏମିତି ଛଅ ଦଫା ଦାବିକୁ ନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବି ପତ୍ର ଦିଆଯାଇଛି।ଏହି ଆନ୍ଦୋଳନ କାର୍ଯ୍ୟକ୍ରମ ରେ ଅନ୍ଯମାନଙ୍କ ମଧ୍ୟରେ ସନ୍ତୋଷ ବେହେରା, ଡୋଲାମଣି ଚୌଧୁରୀ, ବିଶ୍ବନାଥ ରଣା, ରସବିହାରୀ ସାହୁ, ଜୟ କିସାନ ଆନ୍ଦୋଳନ ର ଜିଲ୍ଲା ସାଧାରଣ ସଂପାଦକ ହର ବଣିଆଁ, ସଭାପତି ସୁଶୀଲ କୁମାର ସାହୁ ଯୋଗଦେଇ ଚାଷୀ ମାନଙ୍କ ସମସ୍ୟା ଓ ତାର ସମାଧାନ ଦିଗରେ ସରକାର ଏବଂ ପ୍ରଶାସନ ର ଦୃଷ୍ଟି ଆକର୍ଷଣ କରିଥିଲେ  । ଏହି ପ୍ରତିବାଦ ସଭାରେ କିଶୋର ସାହୁ  ପ୍ରାରମ୍ଭିକ ସଂଗୀତ ଗାନ କରିଥିଲେ ଓ ସଂଗଠକର ସମ୍ପାଦକ ରୋହିତ ମହାନନ୍ଦ ଦାବିପତ୍ର ପଠନ କରିଥିଲେ।