06-Jan-2021

ବଲାଙ୍ଗୀର,(ପ୍ରେରଣା ଖବର)- ବଲାଙ୍ଗୀର ଜିଲ୍ଲାରେ ଦୁର୍ନୀତି ବିଭାଗ ଦିନକୁ ଦିନ ତାର କାୟା ମେଲାଇ ଚାଲିଛି । ଇତି ମଧ୍ୟରେ ଅନେକ ଦୁର୍ନୀତିଖୋର କିରାଣୀ ଓ ଅଫିସର ମାନଙ୍କୁ ଛନ୍ଦି ଉଚିତ ଶିକ୍ଷା ଦେଇସାରିଛି । ଧନ୍ୟବାଦ ଦୁର୍ନୀତି ବିଭାଗର ସମସ୍ତ ଅଧିକାରୀ ତଥା ଅଧସ୍ଥନ କର୍ମଚାରୀ ଯେଉଁ ମାନେ ରାତି ଦିନ ଅକ୍ଲାନ୍ତ ପରିଶ୍ରମ କରି ଦୁର୍ନୀତିର ମୂଳପୋଛ କରିବା ପାଇଁ ଅଂଟା ଭିଡିଛନ୍ତି । 
  ଇତି ମଧ୍ୟରେ ବଲାଙ୍ଗୀର ଜିଲ୍ଲାରେ ଶିକ୍ଷା ବିଭାଗ, ସମବାୟ ବ୍ୟାଙ୍କ, ଟାଉନ ପ୍ଲାନିଙ୍ଗ ଅଫିସ, ବିଦ୍ୟୁତ ବିଭାଗ ତଥା ବ୍ଲକରେ କାର୍ଯ୍ୟରତ ପିଇଓଙ୍କୁ ଭିଜିଲାନ୍ସ ବିଭାଗ ପକ୍ଷରୁ ଅତର୍କିତ ଭାବରେ ଧରାଯାଇ ଠୁଳ କରିଥିବା ଆୟବର୍ହିଭୁତ ସଂପତ୍ତି ଆକଳନ କରି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେଇଥିବା ଯୋଗୁଁ ଜିଲ୍ଲାରେ ଦୁର୍ନୀତିଖୋରଙ୍କ ମନରେ ଆତଙ୍କ ଖେଳିଯାଇଛି । 
    ପ୍ରକାଶ ଥାଉକି, ଗତ ୨ଠଠ୮-ଠ୯ ମସିହାରେ ଦୁର୍ନୀତି ନିବାରଣ ବିଭାଗ ଜିଲ୍ଲା ପ୍ରକଳ୍ପ କାର୍ଯ୍ୟାଳୟ, ସର୍ବ ଶିକ୍ଷା ଅଭିଯାନ କୁ ଆସି ଗଣଶିକ୍ଷକ ନିଯୁକ୍ତି ସଂକ୍ରାନ୍ତୀୟ ସମସ୍ତ କାଗଜପତ୍ର ନେଇ ଚାଲିଯାଇଥିଲେ । ସେହି ଦିନ ଠାରୁ ଆଜି ପର୍ଯ୍ୟନ୍ତ ନିଯୁକ୍ତିର ତଦନ୍ତ କେଉଁ ଦିଗକୁ ଯାଇଛି, ତାହାକୁ ନେଇ ସମସ୍ତେ ସନ୍ଦିହାନ । ସୂଚନାମତେ ସରକାରଙ୍କ ଗାଇଡଲାଇନ୍ ଅନୁଯାୟୀ ସେହି ସମୟରେ ଇଜିଏସ୍ ଶିକ୍ଷକ ମାନଙ୍କୁ ଗଣଶିକ୍ଷକ ଭାବରେ ରୂପାନ୍ତରିତ କରାଯାଇଥିଲା । ତେବେ ଏଠାରେ ପ୍ରଶ୍ନ ଉଠେ, ଯେତେ ଇଜିଏସ୍ ଶିକ୍ଷକ ଶିକ୍ଷୟିତ୍ରୀ ଥିଲେ ତାଠାରୁ ଅଧିକ ସଂଖ୍ୟାରେ ଗଣଶିକ୍ଷକ ଶିକ୍ଷୟିତ୍ରୀ ନିଯୁକ୍ତି ପାଇଲେ କିପରି?  ପରେ ପରେ  ଭିଜିିଲାନ୍ସ ବିଭାଗ  ତତ୍ପର ହୋଇ ଡିପିସି ଅଫିସକୁ ଆସି ଏ ସଂକ୍ରାନ୍ତୀୟ ସମସ୍ତ କାଗଜପତ୍ର ନେଇ ତାଙ୍କର କାମ ସାରି ଦେଇଥିଲେ । ଏହାର ସୁଯୋଗ ନେଇ ଏଥିରେ ସଂପୃକ୍ତ କିରାଣୀ ବର୍ତ୍ତମାନ ପର୍ଯ୍ୟନ୍ତ ନିଯୁକ୍ତି ପ୍ରକ୍ରିୟା ଚାଲୁ ରଖିଥିବା ଚର୍ଚ୍ଚା ଜୋର ଧରିଛି । ପୂର୍ବରୁ ଉପରୋକ୍ତ କିରାଣୀଙ୍କ ନାମରେ ନିଯୁକ୍ତି ପ୍ରକ୍ରିୟାକୁ ନେଇ ଅନେକ ପ୍ରଶ୍ନ ଉଠିଥିବା ତଥା ଭିଜିଲାନ୍ସ ବିଭାଗ ତତ୍ତ୍ୱାବଧାନରେ କେଶ ବିଚାରାଧୀନ ଥିବା ବେଳେ ତାଙ୍କୁ ବର୍ତ୍ତମାନ ପର୍ଯ୍ୟନ୍ତ ନିଯୁକ୍ତି ସଂପର୍କିତ କାର୍ଯ୍ୟ ନ୍ୟସ୍ତ କରାଯାଇଛି କିପରି , ତାହା ଏକ ବଡ ପ୍ରଶ୍ନ ।   ବିଭାଗୀୟ ବାବୁ ମାନେ ଏହି କରିତକର୍ମା କିରାଣୀଙ୍କୁ ଉତ୍ସାହିତ କରୁଥିବା ଜଣାପଡିଛି । କିରାଣୀଙ୍କ ନାମରେ ଏକାଧିକ ଅଭିଯୋଗ ଥିବା ସତ୍ତ୍ୱେ ତାଙ୍କୁ କେଉଁ ଭରଷାରେ ପୁଣି ନିଯୁକ୍ତି ପ୍ରକ୍ରିୟାର ମଙ୍ଗ ଧରାଇ ଦିଆଯାଇଛି, ଏହା ଡିପିସି ମାନଙ୍କ ସ୍ୱଚ୍ଛତା ଉପରେ ଅଙ୍ଗୁଳି ନିର୍ଦ୍ଦେଶ କରୁଛି । ଦୁର୍ନୀତି ନିବାରଣ ବିଭାଗ ଏଥିପ୍ରତି ଦୃଷ୍ଟି ଦେଇ ଦଶନ୍ଧି ଧରି ସରକାରୀ ନାଲି ଫିତା ତଳେ ପଡିରହିଥିବା ଫାଇଲ୍ ର ତଦନ୍ତ କରି ଯଥାଶୀଘ୍ର ଦୋଷୀ ଉପରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କଲେ ଆଗାମୀ ଦିନରେ ଶିକ୍ଷାବିଭାଗ   ଦୁର୍ନୀତିର କଳଙ୍କରୁ ମୁକ୍ତ ହୋଇ ପାରନ୍ତା ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି ।