30-Oct-2024

ତୁଷୁରା (ପଞ୍ଚାନନ ନାଏକ) ବଲାଙ୍ଗୀର ଜିଲ୍ଲା ଗୁଡଭେଲା ବ୍ଲକ  କୃଷି ପରାମର୍ଶ ଓ ସୂଚନା କେନ୍ଦ୍ର ଠାରେ କୃଷି ଓ କୃଷକ ସଶକ୍ତି କାରଣ ବିଭାଗ ତଥା ଏଫ୍.ଇ.ଏସ୍. ସଂସ୍ଥା ପକ୍ଷରୁ କୃଷକ ମାନଙ୍କ ନିମନ୍ତେ ଫସଲ ଜଳ ଆକଳନ ତାଲିମ ଶିବିର ମଙ୍ଗଳବାର ଅନୁଷ୍ଠିତ ହୋଇ ଯାଇଛି । ବ୍ଲକ ସହକାରୀ କୃଷି ଅଧିକାରୀ ପ୍ରୀତିସ ପଟ୍ଟନାୟକଙ୍କ ପରିଚାଳନାରେ ଅନୁଷ୍ଠିତ ଶିବିରରେ ମୁଖ୍ୟ ଅତିଥି ଭାବେ ସହକାରୀ ଜିଲ୍ଲା କୃଷି ଅଧିକାରୀ ପ୍ରମୋଦ କୁମାର ବଡପଣ୍ଡା, ସମ୍ମାନିତ ଅତିଥି ଭାବେ ବ୍ଲକ କୃଷି ଅଧିକାରୀ ସ୍ଵସ୍ତିକ କୁମାର ପଣ୍ଡା, ଏଫ୍. ଇ. ଏସ୍. ର ଜିଲ୍ଲା ସଂଯୋଜକ ସୁଜିତ୍ କୁମାର ଶତପଥୀ ପ୍ରମୁଖ ଯୋଗଦେଇ ବର୍ତ୍ତମାନ ସମୟରେ ଫସଲ ଜଳ ଆକଳନ ନିତାନ୍ତ ଜରୁରୀ ବୋଲି ମତପ୍ରକାଶ କରିବା ସହ ଜଳବାୟୁ ପରିବର୍ତ୍ତନ ଏକ ମୁଖ୍ୟ ସମସ୍ୟା ହୋଇଛି  ବୋଲି କହିଥିଲେ । ଏଣୁ, ଗଚ୍ଛିତ ଜଳ ଅନୁସାରେ ଫସଲ ଚୟନ କରିବା ଚାଷୀ ମାନଙ୍କ ନିମନ୍ତେ ଜରୁରୀ ବୋଲି ଗୁରୁତ୍ୱାରୋପ କରିଥିଲେ । ଏହା ସହ ବର୍ତ୍ତମାନ ପରିପ୍ରେକ୍ଷୀରେ ଜୈବିକ ପଦ୍ଧତି ରେ ଚାଷ ପାଇଁ ସମସ୍ତ ଚାଷୀ ସଚେତନ ହେବା ଜରୁରୀ ବୋଲି ସହକାରୀ ଜିଲ୍ଲା କୃଷି ଅଧିକାରୀ ବଡ଼ପଣ୍ଡା ମତବ୍ୟକ୍ତ କରିଥିଲେ । ଏହି ଅବସରରେ ପ୍ରଶିକ୍ଷକ ଭାବେ ସ୍ଥାନୀୟ ବ୍ଲକ ଏଫ୍.ଇ.ଏସ. ର  ମାଷ୍ଟର ଟ୍ରେନର ଭାଗବତ ନାହାକ ଓ ଦେଓଗାଁ ବ୍ଲକ ମାଷ୍ଟର ଟ୍ରେନର କୃଷ୍ଣ ପ୍ରସାଦ ପାଣିଗ୍ରାହୀ ପ୍ରମୁଖ ଯୋଗଦେଇ ଫସଲ ଜଳ ଆକଳନ ଉପରେ ଜଳ ଖେଳ ପ୍ରଦର୍ଶିତ କରିବା ସହ ସି.ଡବ୍ଲୁ.ବି. ଆପ ଉପରେ ଉପସ୍ଥିତ ସମସ୍ତ ପଞ୍ଚାୟତ ରୁ ଆସିଥିବା କୃଷକ ସାଥୀ, ଏମ.ବି.କେ., ସି.ଆର.ପି. ସି.ଏମ. ତଥା ଭି.ଏ.ଡବ୍ଲୁ. ମାନଙ୍କୁ ତାଲିମ ପ୍ରଦାନ କରିଥିଲେ । ପରିଶେଷ ରେ ସ୍ଥାନୀୟ ମାଷ୍ଟର ଟ୍ରେନର ଶ୍ରୀ ନାହାକ ଧନ୍ୟବାଦ୍ ଅର୍ପଣ କରିଥିଲେ । କାର୍ଯ୍ୟକ୍ରମକୁ ସମସ୍ତ କୃଷି ବିଭାଗର କର୍ମଚାରୀ ମାନେ ସହଯୋଗ କରିଥିଲେ ।