18-Oct-2024

ନବରଙ୍ଗପୁର(ମିହିର ଶଙ୍କର ପାତ୍ର): ସାମ୍ବାଦିକ ମାନଙ୍କ ଏକ ସ୍ବତନ୍ତ୍ର ଟିମ୍ କୋଷାଗୁମୁଡା ଥାନା ଅଧିକାରୀଙ୍କୁ ସାକ୍ଷାତ କରି ସାମ୍ବାଦିକ ମାନଙ୍କ ସୁରକ୍ଷା ପାଇଁ ଦାବି ଜଣାଇଛନ୍ତି। ଗତ  ବୁଧବାର ୧୬ ତାରିଖ ଘୋଡାଖୁଣ୍ଟା ଦଶହରା ଦେଖି ରାତିରେ ଘରକୁ ଫେରୁଥିବା ସମୟରେ ଜଣେ ସାମ୍ବାଦିକଙ୍କୁ ଦୁଇଜଣ ବ୍ୟକ୍ତି ଆକ୍ରମଣ କରିବା ଏବଂ କୋଷାଗୁମୁଡା ବ୍ଲକର ଦିବାକର ବିଷୟୀଙ୍କ ବାଲି ନ୍ୟୁଜ୍ ଖବରକାଗଜରେ ବାହାରିଲେ ଜୀବନରେ ମାରିଦେବାକୁ ଧମକ ଦେବା ଘଟଣାକୁ କେନ୍ଦ୍ର କରି ଏକ ଏତଲା ପ୍ରଦାନ କରାଯାଇଛି। ଘଟଣାର ତଦନ୍ତ କରି ଦୋଷୀ ବ୍ୟକ୍ତି ମାନଙ୍କ ପ୍ରତି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାମ୍ବାଦିକ ମାନେ କୋଷାଗୁମୁଡା ଥାନା ଅଧିକାରୀଙ୍କୁ ଦାବି କରିଥିଲେ। ପ୍ରକାଶ ଥାଉକି କୋଷାଗୁମୁଡା ବ୍ଲକ ଅଞ୍ଚଳରେ ଦିନକୁ ଦିନ ବାଲି ମାଫିଆଙ୍କ ପ୍ରାଦୁର୍ଭାବ ବୃଦ୍ଧି ପାଉଛି ଏବଂ ଅବହେଳା ଯୋଗୁଁ ଅନେକ ପରିମାଣରେ ରାଜସ୍ୱ ହାନି ହେଉଛି।  କୋଷାଗୁମୁଡା ଅଞ୍ଚଳ ର ବାଲି ଅନ୍ୟ ରାଜ୍ୟକୁ ଚାଲାଣ ହେଉଥିବା ମଧ୍ୟ ସଂଦେହ କରା ଯାଉଛି।  ବିଭିନ୍ନ ଗଣମାଧ୍ୟମରେ ସତ୍ୟ କଥା ପ୍ରକାଶିତ ହେବା ପରେ ବାଲି ମାଫିଆ ମାନେ ଅଧୈର୍ଯ୍ୟ ହୋଇ ସାମ୍ବାଦିକ ମାନଙ୍କ ଉପରେ ଆକ୍ରମଣ କରୁଥିବା ବିଷୟ ବୁଦ୍ଧିଜୀବୀ ମାନେ ଆଲୋଚନା କରୁଛନ୍ତି।  କୋଷାଗୁମୁଡା ଅଞ୍ଚଳର ବାଲି ଚାଲାଣକୁ ରୋକିବା ପାଇଁ ପ୍ରଶାସନ ତତ୍ପର ହୁଅନ୍ତୁ ବୋଲି ଜନସାଧାରଣରେ ଦାବି ହେଉଛି।