03-Jan-2021

ଦେଓଗାଁ,(ପ୍ରେରଣା ଖବର ବ୍ୟୁରୋ)- “କାନଖୁଲିକରି ସୁନ ସରକାର,ଆମର କ୍ଷେତକେ ପାଏନ ଦରକାର” । ଏଭଳି କିଛି ନାରା ଆଜି ଦେଓଗାଁ ବ୍ଲକର ସିକୁଆଁଠାରେ ଆୟୋଜିତ ଚାଷୀ ସମାବେଶରେ ଶୁଣାଯାଉଥିଲା । ୫୦୦ରୁ ଉର୍ଦ୍ଧ୍ୱ ଚାଷୀ ସମ୍ମିଳିତ ହୋଇ ସୋନଗଡ ନଦୀରେ ବ୍ୟାରେଜ ନିର୍ମାଣ ଦାବି କରିଛନ୍ତି । 
    ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକ ଓ ସଦରବ୍ଲକର ୨୩ ଖଣ୍ଡ ଗ୍ରାମର ଜମିକୁ ଜଳସେଚନ ପାଇଁ ସରକାରଙ୍କ ପ୍ରସ୍ତାବିତ ସୋନଗଡ ନଦୀରେ ବ୍ୟାରେଜ ନିର୍ମାଣ ଦାବିରେ ଆଜି ସିକୁଆଁଠାରେ ଏକ ବିଶାଳ ଚାଷୀ ସମାବେଶ ଅନୁଷ୍ଠିତ ହୋଇଯାଇଛି । ସିକୁଆଁ ମନ୍ଦିର ପ୍ରାଙ୍ଗଣରେ ଆଞ୍ଚଳିକ କୃଷକସଂଘ ଆନୁକୂଲ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ତଥା ବିଡିସିସି ବ୍ୟାଙ୍କର ପୂର୍ବତନ ସଭାପତି ଲକ୍ଷ୍ମଣକୁମାର ମେହେରଙ୍କ ସଭାପତିତ୍ୱ କରିଥିଲେ । ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ଜିଲ୍ଲା କୃଷକମହାସଂଘର ସଂପାଦକ ଚାଷିନେତା ଜତି ପଧାନ,ଦେଓଗାଁ ବ୍ଲକର ଅଧ୍ୟକ୍ଷା ରୀନା ମେହେର,ବଲାଙ୍ଗୀର ସଦର ବ୍ଲକର ଅଧ୍ୟକ୍ଷ ଗୁଲାବ ବାଗ,ଜିଲ୍ଲା ପରିଷଦ ସଭ୍ୟ ସୁଶୀଳ ଚାନ୍ଦ,ସିକୁଆଁ ସରପଞ୍ଚ କବିତା ବିଶି,ଶିବତଳା ସରପଞ୍ଚ ବାଳକୃଷ୍ଣ ବେହେରା, ସାହାଜବାହାଲ ସରପଞ୍ଚ ପ୍ରଦ୍ୟୁମ୍ନ କୁମାର ହୋତା, ଧଣ୍ଡାମାଲ ସରପଞ୍ଚ ଦୟାନିଧି ଖମାରି, ,ସାମାଜିକକର୍ମି ଧରଣୀଧର ନାଏକ,ପୂର୍ବତନ ଜିଲ୍ଲାପରିଷଦ ସଭ୍ୟ ଗୋପାଳ ମିଶ୍ର,ପୂର୍ବତନ ସରପଞ୍ଚ ଅନ୍ତର୍ଯ୍ୟାମୀ ଭୋଇ,ଦେଓଗାଁ ବ୍ଲକ ଯୁବବିଜେଡି ସଭାପତି ଶୈଳେନ୍ଦ୍ର ସାହୁ,ପବିତ୍ର ପଧାନ, ଅବସରପ୍ରାପ୍ତ ଶିକ୍ଷକ ଚାପ ବଗର୍ତ୍ତି ପ୍ରମୁଖ ଯୋଗଦେଇ ରାଜ୍ୟ ସରକାର ତୁରନ୍ତ ସୋନଗଡ ବ୍ୟାରେଜ ପାଇଁ ପଦକ୍ଷେପ ନେବାକୁ ଦାବି କରିଥିଲେ । ଲକ୍ଷ୍ମଣ କୁମାର ମେହେର ତାଙ୍କ ବକ୍ତବ୍ୟରେ ଦେଓଗାଁ ବ୍ଲକ ଅଞ୍ଚଳର ଲୋକେ ଏକତ୍ରୀତ ହୋଇ ଅଞ୍ଚଳର ଦାବିକୁ ଉପସ୍ଥାପନ କରିବାକୁ ପଡିବ ବୋଲି କହିଥିବା ବେଳେ ସୁଶୀଳ ଚାନ୍ଦ ଓ ବଲାଙ୍ଗୀର ବ୍ଲକ ଅଧ୍ୟକ୍ଷ ଗୁଲାବ ବାଗ ତାଙ୍କ ବକ୍ତବ୍ୟରେ କିଛି ସ୍ୱାର୍ଥବାଦୀ ଲୋକପ୍ରତିନିଧି ଲୋକଙ୍କ ଦାବି ଅପେକ୍ଷା ନିଜର ସ୍ୱାର୍ଥପାଇଁ କାମ କରୁଥିବା କହିଥିଲେ । ବଲାଙ୍ଗୀର ଜିଲ୍ଲାର ବିକାଶ ପାଇଁ ନବୀନ ସରକାର ଅନେକ ପ୍ରକଲ୍ପ କରାଉଛନ୍ତି । କିନ୍ତୁ ବିରୋଧି ସେଥିରେ ନିଜର ସ୍ୱାର୍ଥସାଧନ କରିବାକୁ ଲୋକଙ୍କୁ ଭ୍ରମିତ କରୁଛନ୍ତି ବୋଲି କହିଥିଲେ । ଅଧ୍ୟକ୍ଷା ରୀନା ମେହେର,ସରପଞ୍ଚ ଦୟାନିଧି ଖମାରୀ ଓ ପ୍ରଦ୍ୟୁମ୍ନ ହୋତା ଏ ଅଞ୍ଚଳର ଲଢେଇରେ ସେମାନେ ସବୁବେଳେ ରହିଛନ୍ତି ଓ ଆଗକୁ ରହିବେ ବୋଲି କହିଥିଲେ । ସୋନଗଡ ନଦୀରେ ବ୍ୟାରେଜ ନହେବା ପର୍ଯ୍ୟନ୍ତ ଚାଷିମାନେ ସେମାନଙ୍କର ନ୍ୟାର୍ଯ୍ୟଦାବିକୁ ହାସଲ ପାଇଁ ସଂଗ୍ରାମ ଜାରି ରଖିବେ ବୋଲି ଚାଷିଙ୍କ ମଧ୍ୟରେ ମତ ପ୍ରକାଶ ପାଇଥିଲା । ମୁଖ୍ୟ ଅତିଥି ଶ୍ରୀ ପଧାନ ତାଙ୍କ ବକ୍ତବ୍ୟରେ ଚାଷିଙ୍କ ଉନ୍ନତି ପାଇଁ ମହିଳାମାନେ ଆଗେଇ ଆସି ଲଢେଇର ନେତୃତ୍ୱ ନେବାକୁ କହିଥିଲେ । ପ୍ରକାଶ୍ୟ ଯେ,ଗତ ୩୦ବର୍ଷ ପୂର୍ବେ ସୋନଗଡ ନଦୀରେ ବ୍ୟାରେଜ ନିର୍ମାଣ କରିବାକୁ ସର୍ଭେ କରାଯାଇଥିଲା । ଗତ ବର୍ଷ ଜଳସେଚନ ବିଭାଗର ଉଚ୍ଚବୈଷୟୀକ ପରାମର୍ଶଦାତା କମିଟି ବୈଠକରେ ମଧ୍ୟ ଉକ୍ତ ବିଷୟରେ ଆଲୋଚନା କରାଯାଇ ପ୍ରକଲ୍ପକୁ ମଞ୍ଜୁର କରାଯାଇଛି । କିନ୍ତୁ ଜିଲ୍ଲାରେ କିଛି ଅନାବଶ୍ୟକ ପ୍ରକଲ୍ପ ପାଇଁ ସରକାର ଅର୍ଥ ମଞ୍ଜୁର କରିଥିବା ବେଳେ ଏହି ପ୍ରକଲ୍ପକୁ ଅଣଦେଖା କରିଛନ୍ତି । ସିକୁଆଁଠାରେ ବ୍ୟାରେଜ ହେଲେ ଦେଓଗାଁ ବ୍ଲକର ୧୮ଟି ଗ୍ରାମ ଓ ସଦର ବ୍ଲକର ୫ଟି ଗ୍ରାମର ୩୦୦୦ ହେକ୍ଟର ଜମିକୁ ଜଳସେଚନ କରାଯାଇ ପାରିବ । ମରୁଡି ପ୍ରବଣ ଏହି ଅଞ୍ଚଳର ଜଳସେଚନ ପାଇଁ ଏହି ପ୍ରକଲ୍ପକୁ ପ୍ରାଥମିକତା ଭିତ୍ତିରେ ନିର୍ମାଣ କରାଇବାକୁ ଚାଷିମାନେ ଆଜି ମିଳିତ ଭାବରେ ଦାବି କରିଛନ୍ତି ।