02-Sep-2024

ବରଗଡ଼/ଭଟଲି:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ଭଟଲି ଅମ୍ବାଭୋନା ରାସ୍ତାରେ ଉନ୍ନତି କରଣ କାର୍ଯ୍ୟ ପାଇଁ ରାଜ୍ୟ ନିର୍ମାଣ ବିଭାଗ ଦ୍ଵାରା ୪୦କୋଟି ୨୧ଲକ୍ଷ ଟଙ୍କା ମଞ୍ଜୁର ହୋଇ କାର୍ଯ୍ଯ ଚାଲୁରହିଛି। ସିଦ୍ଧି ବିନାୟକ କନଷ୍ଟ୍ରକସନ୍ ପ୍ରାଇଭେଟ୍ ଲିମିଟେଡ଼ ଦ୍ଵାରା ଏହିକାର୍ଯ୍ୟ ୩୧.୧୦.୨୦୨୪ ମଧ୍ୟରେ ସମ୍ପନ୍ନ ହେବାର ସମୟ ଧାର୍ଯ୍ୟ କରାଯାଇଛି। ବରଗଡ ଠାରୁ ଭଟଲି ଦେଇ ଛତିଶଗଡ ରାୟଗଡକୁ ସଂଯୋଗ କରୁଥିବା ଏହି ଏକମାତ୍ର ମୂଖ୍ୟ ରାସ୍ତା । ଯେଉଁ ରାସ୍ତାରେ ପ୍ରତ୍ୟହ ହଜାର ହଜାର ଭାରି ଯାନ, ଟ୍ରଲର, ଟ୍ରକ୍‌, ବସ ସହିତ ଚାରିଚକିଆ ଏବଂ ଦୁଇ ଚକିଆ ଯାନ ଗମନାଗମନ କରେ । ଭଟଲିର ବସଷ୍ଟାଣ୍ଡ ଛକ ନିକଟରେ ବଡବଡ ଗାତ ଖାଲ ମାନ ସୃଷ୍ଟି ହୋଇଅଛି ଯଦ୍ୱାରା ବାରମ୍ବାର ସେହି ସ୍ଥାନରେ ଦୁର୍ଘଟଣାର ସମ୍ମୁଖିନ ହେଉଥିବା ଦେଖାଯାଉଛି। ଏହି ଖବର ଗଣମାଧ୍ୟମରେ ବାରମ୍ବାର ପ୍ରକାଶିତ ହେବାପରେ ରଥଯାତ୍ରା ପୂର୍ବରୁ ରାତାରାତି ତରବରିଆ ଭାବେ ବସଷ୍ଟାଣ୍ଡ ଛକ ଯାଏଁ ଅଧାପନ୍ତରିଆ ରାସ୍ତା କାମ କରି ଦେଇ ବର୍ତ୍ତମାନ ପର୍ଯ୍ୟନ୍ତ ସ୍ଥଗିତ ରଖାଯାଇଛି। କୌଣସି କାରଣରୁ ବର୍ତ୍ତମାନ ରାସ୍ତା ନିର୍ମାଣ କାର୍ଯ୍ୟ  ଦେଢ଼ ମାସରୁ ଉର୍ଦ୍ଧ୍ବ ହେବ ପଡି ରହିଛି  । ବସଷ୍ଟାଣ୍ଡ ଛକଠାରୁ ବରଗଡ଼ ରାସ୍ତା ପଟକୁ ଛକ ନିକଟରେ ରାସ୍ତାରେ ହୋଇଥିବା ଗାତ ମାନ ବର୍ଷା ପାଣିରେ ଜଣା ପଡୁନଥିବା ବେଳେ ବିଶେଷ କରି ବାଇକ ଆରୋହୀ ମାନେ ଭାରସାମ୍ୟ ହରାଇ ଦୁର୍ଘଟଣାର ସମ୍ମୁଖୀନ ହେଉଛନ୍ତି । ଖାଲି ଏତିକି ନୁହଁ ଏହି ରାସ୍ତାରେ ପ୍ରଶାସନିକ ଉଚ୍ଚ ପଦାଧିକାରୀ ମାନେ ବାରମ୍ବାର ଯାତାୟତ କରୁଥିଲେ ମଧ୍ୟ ଅଣଦେଖା କରୁଥିବାର ଦେଖିବାକୁ ମିଳୁଛି । ଏହି ରାସ୍ତା ନିର୍ମାଣ କିପରି ଭାବରେ ସମ୍ପୂର୍ଣ ହେବ ସେଥିପ୍ରତି ପ୍ରଶାସନ ଦୃଷ୍ଟି ଦେବାକୁ ସ୍ଥାନୀୟ ଲୋକେ ଦାବୀ କରିଛନ୍ତି।