10-Aug-2024

ବଲାଙ୍ଗୀର(ପ୍ରେରଣା ଖବର)-ସରକାର ସରକାରୀ କର୍ମଚାରୀ ମାନଙ୍କର ସମାନକାମକୁ ସମାନ ଦରମା ଘୋଷଣା କରୁଛନ୍ତି କିନ୍ତୁ ଦରମା ଦେବାର ସମାନ ଦରମା ହାର ଲାଗୁ କରୁନାହାଁନ୍ତି । ମୁଖ୍ୟତଃ ହାଇସ୍କୁଲଗୁଡିକରେ ଦୀର୍ଘବର୍ଷ ହେଲା କାମ କରୁଥିବା ଶିକ୍ଷକ/ଶିକ୍ଷୟିତ୍ରୀ ଓ କର୍ମଚାରୀମାନଙ୍କୁ ସମାନହାରରେ ୭ମ ବେତନ କମିଶନ ହାରରେ ଦରମା ଦେବାରେ ପାତରଅନ୍ତର କରୁଥିବା ଅଭିଯୋଗ ହୋଇଛି । ରାଜ୍ୟରେ ୭ମ ବେତନ କମିଶନ ହାରରୁ ବଞ୍ଚିତ ହୋଇଥିବା ୨୫୩ଜଣ ଶିକ୍ଷକ ଓ କର୍ମଚାରୀଙ୍କୁ ତୁରନ୍ତ ୭ମ ବେତନ କମିଶନ ହାରରେ ଦରମା ଦେବାକୁ ଦାବି କରାଯାଇ କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ଶିକ୍ଷକମାନେ ଚିଠିଲେଖି ଦାବି କରିଥିବା ଜଣା ଯାଇଛି । ଦାବିପତ୍ରରେ ଉଲ୍ଲେଖ କରାଯାଇଛି ଯେ, ଓଡିଶା ସରକାର ୨୦୧୭ ଜିଆଇଏ ନୀୟମ ଅନୁଯାୟୀ ୨୨୬ ଓ ୩୯୯ ବର୍ଗର ଅନୁଦାନପ୍ରାପ୍ତ ବିଦ୍ୟାଳୟରୁ ୩୧.୧୨.୨୦୨୩ ପର୍ଯ୍ୟନ୍ତ କାମ କରୁଥିବା ଶିକ୍ଷକ/ଶିକ୍ଷୟିତ୍ରୀ ଓ କର୍ମଚାରୀଙ୍କୁ ୭ମ ବେତନ କମିଶନ ହାରରେ ଦରମା ଦେବାକୁ ନିଦ୍ଦେଶନାମା ଜାରି କରାଯାଇଥିଲା। ରାଜ୍ୟସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗର ପତ୍ରସଂଖ୍ୟା-୫୨୬୫ ତା.୧୧.୩.୨୦୨୪ ଅନୁଯାୟୀ ସମସ୍ତ ଅନୁଦାନପ୍ରାପ୍ତ ସ୍କୁଲଗୁଡିକର ଶିକ୍ଷକ/କର୍ମଚାରୀମାନେ ୧୦୦% ଜିଆଇଏ ପାଇବେ ଓ ୭ମ ବେତନ କମିଶନ ହାରରେ ଦରମା ପାଇବେ । କିନ୍ତୁ ନୂତନ ଅନୁଦାନ ପ୍ରାପ୍ତ ହାଇସ୍କୁଲ ଗୁଡିକରେ୨୨୬ ଓ ୩୯୯ ବର୍ଗର ପ୍ରାୟ ୨୫୩ ଜଣ ଶିକ୍ଷକ ଓ କର୍ମଚାରୀ ୪୦% ,୬୦%, ୭୫% ଓ ୧୦୦% ଜିଆଇଏ ୬ଷ୍ଠ ବେତନକମିଶନର ପୂର୍ବହାରରେ ଦରମା ପାଉଛନ୍ତି । ସରକାର ତାଙ୍କର ନିର୍ଦ୍ଦେଶନାମାରେ ୩୧.୧୨. ୨୦୨୩ ପର୍ଯ୍ୟନ୍ତ ୧୦୦% ଜିଆଇଏ ପାଉଥିବା ଶିକ୍ଷକ/ଶିକ୍ଷୟିତ୍ରୀ ଓ କର୍ମଚାରୀଙ୍କୁ ୭ମ ବେତନ କମିଶନ ଲାଗୁକଲେ । ଏବେ ସ୍ଥିତି ଯାହା ରହିଛି ସେଥିରେ ସମସ୍ତେ ୧୦୦% ଜିଆଇଏ ପାଇଲା ବେଳକୁ ସେଥିରୁ ଅଧିକାଂଶ ଅବସରଗ୍ରହଣ କରିସାରିଥିବେ । ରାଜ୍ୟରେ ଥିବା ଅନୁଦାନପ୍ରାପ୍ତ ହାଇସ୍କୁଲ ଗୁଡିକର ପ୍ରାୟ ୨୫୩ଜଣ ୧୦୦% ଜିଆଇଏ ପାଉନଥିବାରୁ ଏହି ୭ମ ବେତନକମିଶନ ଦରମାରୁ ବଞ୍ଚିତ ରହିଛନ୍ତି । ଏନେ ଶିକ୍ଷକ/ଶିକ୍ଷୟିତ୍ରୀମାନେ ଅନେକଥର ରାଜ୍ୟ ଶିକ୍ଷାବିଭାଗର ମନ୍ତ୍ରୀ ତଥା ବିଭାଗୀୟ ସଚିବଙ୍କୁ ଭେଟି ଆଲୋଚନା କରିବା ସହିତ ଦାବିପତ୍ର ପ୍ରଦାନ କରିଛନ୍ତି । କିନ୍ତୁ କେହି ଏହି ଦାବିପ୍ରତି କର୍ଣ୍ଣପାତ କରୁନଥିବାରୁ ଶେଷରେ କେନ୍ଦ୍ରର ଶିକ୍ଷାମନ୍ତ୍ରୀଙ୍କୁ ଚିଠିଲେଖି ଶିକ୍ଷକ/ଶିକ୍ଷୟିତ୍ରୀମାନେ ଦାବିପତ୍ର ଦେଇଥିବା ଜଣାଯାଇଛି । ସରକାର ଏ ନେଇ ପଦକ୍ଷେପ ନେଇ ସମସ୍ତଙ୍କ ପାଇଁ ୭ମ ବେତନ କମିଶନ ଲାଗୁ କରିବାକୁ ଦାବି କରାଯାଇଛି ।