05-Aug-2024

ବଲାଙ୍ଗୀର(ପ୍ରେରଣା ନିଉଜ୍ )  ବଲାଙ୍ଗୀରର ନିଷ୍ଠାପର କୋଶଳୀ କବି ତଥା ଗବେଷକ ନିମେଇଁ ଚରଣ ପାଣିଗ୍ରାହୀ ( ୬୭)ଙ୍କର ଆଜି ପୂର୍ବାହ୍ନରେ ପରଲୋକ ହୋଇଯାଇଛି । ସେ ମଧୁମେହ ଓ ଉଚ୍ଚ ରକ୍ତଚାପ ରୋଗରେ ପୀଡିତ ଥିଲେ । ସେ କୋଶଳୀଭାଷା ଓ ସଂସ୍କୃତିର ଜଣେ ନିଷ୍ଠାପର ସାଧକ , ପଶ୍ଚିମଓଡିଶାର ପୁରାତନ ଲୁପ୍ତପ୍ରାୟ ବିଭିନ୍ନ ସାଂସ୍କୃତିକ ବିରଳ ସାମଗ୍ରୀର ସଂଗ୍ରହାଳୟ ଖୋଲି ସେ ସବୁ ସହିତ ଢଗଢମାଳୀ ବା ଦାଏକା ଛଟକା ଆଦିର ସଂଗ୍ରାହକ , କୋଶଳୀ ପ୍ରାବନ୍ଧିକ , ଗାଳ୍ପିକ ଓ ଭାଷାବିତ୍ ଥିଲେ । ସେ ତାଙ୍କ ଗାଁ' ସିନ୍ଦୁରବାହାଲରେ ଏକ କୋଶଳୀ ସଂଗ୍ରହାଳୟ ଓ କୋଶଳୀ ମନ୍ଦିର ଖୋଲିବାକୁ ଆରମ୍ଭ କରିଥିଲେ । ତାଙ୍କର ଗବେଷଣାତ୍ମକ ପ୍ରବନ୍ଧ , ସଂଗ୍ରହ , କବିତା ଓ ଗଳ୍ପାଦି ସହିତ ବିଭିନ୍ନ ପୁରାତନ ମହାକାବ୍ୟ ରାମାୟଣ , ଶ୍ରୀମଦ୍ ଭଗବତ୍ ଗୀତାର କୋଶଳୀ ଅନୁବାଦ କରୁଥିଲେ । ପଶ୍ଚିମଓଡିଶାର କେତେକ ବିରଳ ସାମଗ୍ରୀ ସମ୍ପର୍କରେ ତାଙ୍କର ଏକ ପୁସ୍ତିକା ସହ ବିଭିନ୍ନ ପତ୍ରପତ୍ରିକା ଓ ସ୍ମରଣିକାରେ ତାଙ୍କର ଲେଖାସବୁ ପ୍ରକାଶ ପାଇଛି  । ତାଙ୍କ ବିୟୋଗରେ କୋଶଳୀ ସାହିତ୍ୟ ଓ ସଂସ୍କୃତିର ଏକ ଶୂନ୍ୟସ୍ଥାନ ସୃଷ୍ଟି ହୋଇଗଲା ।  ସେ ତାଙ୍କର ଚାରିଝିଅଙ୍କର ବିବାହ ସାରିଦେଇଥିଲା ବେଳେ ତାଙ୍କର ବିଧବାପତ୍ନୀଙ୍କୁ ଶୋକସାଗରରେ ଭସାଇ ଚାଲିଯାଇଛନ୍ତି । ତାଙ୍କ ପରଲୋକ ଗମନରେ ବଲାଙ୍ଗୀରରେ ଶୋକର ଛାୟା ଖେଳି ଯାଇଛି । ଈଶ୍ବର ତାଙ୍କର ଶୋକବିଦଗ୍ଧ ପରିବାରକୁ ଶାନ୍ତି ପ୍ରଦାନ କରିବା ସହିତ ତାଙ୍କର ଅମର ଆତ୍ମାକୁ ସଦଗତି ଦିଅନ୍ତୁ ।