12-Jul-2024

ବଲାଙ୍ଗୀର(ପ୍ରେରଣା ଖବର): ଆଜି ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓଙ୍କ ନିର୍ବାଚନମଣ୍ଡଳିସ୍ତରୀୟ ଏସିଡିସି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ସରକାର  ତରଫରୁ ନିର୍ବାଚନମଣ୍ଡଳି ଅଞ୍ଚଳର ବିକାଶ ପାଇଁ ବିଭିନ୍ନ ପ୍ରକଲ୍ପ ପାଇଁ ଦେଇଥିବା ଅନୁଦାନ ଅର୍ଥର ସଠିକ ବିନିଯୋଗ ତଥା କାମଗୁଡିକୁ ତ୍ୱରାନ୍ୱିତ କରି ସରିବାକୁବି ଧାୟକ ଶ୍ରୀ ସିଂଦେଓ ନିର୍ଦ୍ଦେଶ ଦେଇଛନ୍ତି । ଏହି ବୈଠକରେ ଅତିରିକ୍ତ ଜିଲ୍ଲାପାଳ ଡ.ବିଜୟକୁମାର ସେଠୀ,ଜିଲ୍ଲା ଉନ୍ନୟନ ଅଧିକାରୀ ପ୍ରଭାତ କୁମାର ମହାପାତ୍ରଙ୍କ ସମେତ ବିଭିନ୍ନ ବିଭାଗର ଜିଲ୍ଲାସ୍ତରୀୟ ଅଧିକାରୀଗଣ ଯୋଗଦେଇଥିଲେ । ବୈଠକରେ ବଲାଙ୍ଗୀର ନିର୍ବାଚନମଣ୍ଡଳି ଅଞ୍ଚଳରେ ଥିବା ସ୍କୁଲ, କଲେଜ ଗୁଡିକର ଭିତ୍ତିଭୂମୀର ସ୍ଥିତି ବିଷୟରେ ଆଲୋଚନା ହୋଇଥିଲା l କସ୍ତୁରବାଗାନ୍ଧୀ ବିଦ୍ୟାଳୟ, ପ୍ରାଥମିକ ବିଦ୍ୟାଳୟ ଇତ୍ୟାଦି ଗୁଡିକରେ ଅନେକ ସମସ୍ୟା ରହିଥିବା ବିଧାୟକଙ୍କ ନଜରକୁ ଆସିଥିଲା । ମୁଖ୍ୟତଃ ଛାତ୍ରୀମାନେ ରହୁଥିବା ଛାତ୍ରୀନିବାସରେ ଓ ସ୍କୁଲରେ ଶୌଚାଳୟ,ପାନୀୟଜଳ ଇତ୍ୟାଦିର ବ୍ୟବସ୍ଥା କରାଇବାକୁ ବିଧାୟକ ନିର୍ଦ୍ଦେଶ କରିଥିଲେ । ସେହିପରି ବଲାଙ୍ଗୀର ସହର ଭିତରେ ଯେଉଁଠି ଡ୍ରେନଗୁଡିକ ଜବରଦଖଲ ହୋଇ ପାଣିଯିବାରେ ବାଧାସୃଷ୍ଟି କରୁଛି ସେଠି ଉପଜିଲ୍ଲାପାଳ ତୁରନ୍ତ ପଦକ୍ଷେପ ନେଇ ଜବରଦଖଲ ହଟାଇବାକୁ ମଧ୍ୟ ନିର୍ଦ୍ଦେଶ କରିଥିଲେ । ବୈଠକରେ ଦେଓଗାଁ ବ୍ଲକ ଉପରଝର ପଞ୍ଚାୟତର କୁହିମୁଣ୍ଡାକୁ ଆଜି ପର୍ଯ୍ୟନ୍ତ ରାସ୍ତା ନିର୍ମାଣ ହୋଇ ନଥିବା ଓ ଅର୍ଜୁନପୁରଛକରୁ ବ୍ରାହ୍ମଣୀପଲା ପର୍ଯ୍ୟନ୍ତ ରାସ୍ତାର ଅବସ୍ଥା ଖରାପ ଥିବାରୁ ପ୍ରଶାସନ ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ କରାଯାଇଥିଲା । ଠିକ ସେହିପରି ବଲାଙ୍ଗୀର ପୌରାଞ୍ଚଳରେ ଡ୍ରେନସମସ୍ୟା, ଟ୍ରାଫିକଲାଇଟ ବ୍ୟବସ୍ଥା, ସିସିଟିଭି ଲଗାଇବା, ଜିଲ୍ଲା ଯୋଗାଣ ବିଭାଗରେ ଖାଲିଥିବା ଖାଉଟି କାର୍ଡକୁ ଭରଣା କରିବା ବିଷୟରେ ଆଲୋଚନା ହୋଇ ଥିଲା । ଏହି ବୈଠକରେ କ୍ଷୁଦ୍ରଜଳସେଚନ, ଜଳସେଚନ, ଶିକ୍ଷାବିଭାଗ, ଗ୍ରାମ୍ୟଉନ୍ନୟନ ବିଭାଗ,ପୂର୍ତ୍ତବିଭାଗ,କୃଷିବିଭାଗର ଅଧିକାରୀ ମାନେ ଉପସ୍ଥିତ ଥିଲେ