11-Jul-2024

ବିନିକା(ହିମାଂଶୁ ଶେଖର ପୁଟେଲ)ଚଳିତ ସାଧାରଣ ନିର୍ବାଚନରେ ରାଜ୍ୟରେ ବିଜେପି ସରକାର ଗଠନ ହେବାପରେ ବଲାଙ୍ଗୀର ଜିଲ୍ଲାରୁ ଉପ ମୁଖ୍ୟମନ୍ତ୍ରୀ ହୋଇଥିବା ମହାରାଜ କନକ ବର୍ଦ୍ଧନ ସିଂହଦେଓ ଙ୍କ ପ୍ରଥମ ବିନିକା ଗସ୍ତ ଅବସରରେ ତାଙ୍କୁ ଅଞ୍ଚଳବାସୀଙ୍କ ତରଫରୁ ବିପୁଳ ସମ୍ବର୍ଦ୍ଧନା ଜ୍ଞାପନ କରାଯାଇଛି ।ସୂଚନା ଯୋଗ୍ୟ ଯେ ମାନ୍ୟବର ଉପ ମୁଖ୍ୟମନ୍ତ୍ରୀ ବଲାଙ୍ଗୀର ଜିଲ୍ଲାର ବିଭିନ୍ନ ସ୍ଥାନ ପରିଦର୍ଶନ ସାରି ବୁଧବାର ରାତି ପ୍ରାୟ ୧୦ଘଣ୍ଟା ସମୟରେ ବିନିକା ପହଞ୍ଚିଥିଲେ ।ଅପେକ୍ଷାରତ ବିଜେପି କର୍ମୀ ଓ ଅଞ୍ଚଳବାସୀ ତାଙ୍କୁ ସ୍ବାଗତ ଜଣାଇ ସ୍ଥାନୀୟ ଟାଉନ ହଲ ସଭା ସ୍ଥଳକୁ ପାଛୋଟି ନେଇଥିଲେ ।ଜିଲ୍ଲା ବିଜେପି ଉପ ସଭାପତି ଅଶୋକ ପୃଷ୍ଟିଙ୍କ ସଂଯୋଜନାରେ ଅନୁଷ୍ଠିତ ସମ୍ବର୍ଦ୍ଧନା ସଭାରେ ମୁଖ୍ୟ ଅତିଥି ମାନ୍ୟବର ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ,ସମ୍ମାନିତ ଅତିଥି ଭାବେ ବଲାଙ୍ଗୀର ସାଂସଦ ସଂଗୀତା କୁମାରୀ ସିଂଦେଓ,ବୀରମହାରାଜପୁର ବିଧାୟକ ରଘୁନାଥ ଜଗଦଳା,ଜିଲ୍ଲା ସଭାପତି ପ୍ରମୋଦ ମହାପାତ୍ର,କାର୍ଯ୍ୟକାରୀ ସଭାପତି ବିଜୟ କୁମାର ମହାକୁର ଉପସ୍ଥିତ ଥିଲେ।ଏହି ପରିପ୍ରେକ୍ଷୀରେ ଦଳୀୟ କର୍ମକର୍ତ୍ତା ଏବଂ ଅଞ୍ଚଳର ବିଭିନ୍ନ ଅନୁଷ୍ଠାନ ପକ୍ଷରୁ ମାନ୍ୟବର ଉପ ମୁଖ୍ୟମନ୍ତ୍ରୀ,ସାଂସଦ ଓ ବିଧାୟକଙ୍କୁ ପୁଷ୍ପ ଗୁଛ ପ୍ରଦାନ ସହ ଉପଢୋକନ ଦେଇ ସମ୍ବର୍ଦ୍ଧିତ କରାଯାଇଥିଲା ।ମୁଖ୍ୟ ଅତିଥି ମାନ୍ୟବର ଉପ ମୁଖ୍ୟମନ୍ତ୍ରୀ ତାଙ୍କ ଭାଷଣରେ ଅଞ୍ଚଳବାସୀଙ୍କ ସମର୍ଥନ ଓ ସ୍ନେହ ଯୋଗୁଁ ଆଜି ରାଜ୍ୟରେ ବିଜେପି ସରକାର ଗଠନ ହୋଇପାରିଥିବାରୁ ଉପସ୍ଥିତ ଅଞ୍ଚଳର ଜନସାଧାରଣଙ୍କୁ ଧନ୍ୟବାଦ ଜଣାଇବା ସହ ନିର୍ବାଚନ ସମୟରେ ଦିଆଯାଇଥିବା ପ୍ରତିଶ୍ରୁତି ଆଗାମୀ ଦିନରେ ନିଶ୍ଚିତ ପୂରଣ ହେଵ ବୋଲି କହିଥିଲେ ।ଏହା ବ୍ୟତୀତ ପୂର୍ବରୁ ସାରା ରାଜ୍ୟରେ ପିଏମ କିସାନ ଯୋଜନାରେ କେବଳ ଗ୍ରାମାଞ୍ଚଳ ଲୋକେ ସାମିଲ ହେଉଥିଲେ l ଏବେ କିନ୍ତୁ ସାରା ରାଜ୍ୟର ଗ୍ରାମାଞ୍ଚଳ, ସହରାଞ୍ଚଲର ସମସ୍ତ ଚାଷୀଙ୍କୁ ଏହି ଯୋଜନାରେ ସାମିଲ କରିବା ପାଇଁ କ୍ୟାବିନେଟ ବୈଠକରେ ନିଷ୍ପତ୍ତି ନିଆଯାଇଥିବା ପ୍ରକାଶ କରିଥିଲେ । ସମ୍ବର୍ଦ୍ଧନା ସଭା ଶେଷରେ ଜିଲ୍ଲା ସାଧାରଣ ସମ୍ପାଦକ ବିଶ୍ବମ୍ବର ମିଶ୍ର ଧନ୍ୟବାଦ ଅର୍ପଣ କରିଥିଲେ।ଅନୁଷ୍ଟିତ ଏହି କାର୍ଯ୍ୟକ୍ରମରେ ବିଜେପିର ଉସତ କର,ଭୁବନେଶ୍ୱର ପାତ୍ର,ଜନାର୍ଦ୍ଦନ ଖମାରୀଙ୍କ ସମେତ ମଣ୍ଡଳ ସ୍ତରୀୟ ପଦାଧିକାରୀ,କର୍ମୀ,ଅଞ୍ଚଳବାସୀ ସାମିଲ ହୋଇଥିଲେ।