07-Jul-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ଚାରଭଟା ଅନୁସୂଚିତ ଜାତି ଓ ଜନଜାତି ଉଚ୍ଚ ମାଧ୍ୟମିକ ସ୍କୁଲରେ ବର୍ଷ ବର୍ଷ ଧରି ବ୍ୟାପକ ଅନିୟମିତତା ଲକ୍ଷ୍ୟ କରାଯାଇ ଆସୁଛି । ଶତାଧିକ ହଷ୍ଟେଲ ଛାତ୍ରଛାତ୍ରୀଙ୍କ ୟୁନିଫର୍ମ , ହଷ୍ଟେଲରେ ମେସ୍ ଖାଦ୍ୟପେୟ ସହିତ ସୌନ୍ଦର୍ଯ୍ୟକରଣ ବା ଉପକରଣଆଦିରେ ଦୁର୍ନୀତି ପ୍ରତି ଗଣମାଧ୍ୟମରେ ଦୃଷ୍ଟିଆକର୍ଷଣ କରାଯାଇଆସୁଥିଲେ ହେଁ  କେହି କର୍ଣ୍ଣପାତ କରୁ ନାହାଁନ୍ତି । ସଂପ୍ରତି ନୂଆ ସରକାରରେ ଏହି ଆଦିବାସୀ ଉନ୍ନୟନ ବିଭାଗର ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଆଗତ ଏଭଳି ଅଭିଯୋଗ ପ୍ରତି କେତେଦୂର ଦୃଷ୍ଟି ଦେବେ, ଅପେକ୍ଷା କରାଯାଉଛି ।

କିଛିଦିନତଳେ ବଲାଙ୍ଗୀରର ଏକ ବଳିଷ୍ଠ ସାମ୍ବାଦିକଦଳ ସୁବର୍ଣ୍ଣପୁର ଜିଲ୍ଲାର ତରଭା ବ୍ଲକ୍ ର ଏକ ଅଭ୍ୟନ୍ତର ଅଞ୍ଚଳରେ ଅବସ୍ଥିତ ଏହି ଚାରଭଟା ଗ୍ରାମର ଆଦିବାସୀ କଲ୍ୟାଣ ବିଭାଗ ର ଉଚ୍ଚଶିକ୍ଷାନୁଷ୍ଠାନକୁ ପରିଦର୍ଶନ କରି  ସେଠାରେ ଚାଲିଥିବା ଅନିୟମିତତା ଓ ଅବ୍ୟବସ୍ଥା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ ।  ଜିଲ୍ଲାର ଏକମାତ୍ର ଏହି କଲେଜ ବନାମ ହାୟର ସେକେଣ୍ଡାରୀ ସ୍କୁଲରେ ଫାଇଭ୍ ଟି ରେ   ତରଭା ବ୍ଲକ୍ ତରଫରୁ ବିଭାଗୀୟ ଭିତ୍ତିକ ସୌନ୍ଦର୍ଯ୍ୟକରଣ , ନିର୍ମାଣ ଓ ମରାମତି ଆଦି ଚାଲୁଥିଲେ ହେଁ , ଏହା ଏତେ ନିଆମାନର ଯେ , ଫାଟିଉଦୁରି ଯାଉଛି । ପାନୀୟ ଜଳ ଟାଙ୍କିର ଟ୍ୟାପ୍ ଉପୁଡି ଯାଉଛି । ଚଟାଣର ପ୍ଲେଟ୍ ଶସ୍ତା ଓ ଯଥେଷ୍ଟ ନିମ୍ନମାନର ।  କିଛିବର୍ଷତଳେ ସୋନପୁର ଡିଆରଡିଏ ଦ୍ବାରା କୋଟି କୋଟି ଟଙ୍କାର ବ୍ୟୟ ଅଟକଳରେ ନିର୍ମିତ ଏହି ସ୍କୁଲର କୋଠା ଫାଟି ଆଁ କରିଛି । ତା ଉପରେ ସିମେଣ୍ଟ ବୋଳାଯାଇଥିଲେ ହେଁ ଚୂନ କିମ୍ବା ରଙ୍ଗ ମରାଯାଇ ନାହିଁ । ଶ୍ରେଣୀଗୃହ , ଲାଇବ୍ରେରୀ , ଛାତ , ପାଚରୀ ,ଲନ୍ ଓ ଅନ୍ୟାନ୍ୟ କୋଠରୀସବୁ ଭଗ୍ନ ଓ ଦଦରା । ଏବେ କିନ୍ତୁ ଭିତରେ ପ୍ଲେଟ୍ ଲଗା ଚାଲିଛି । ପଚାରିବାରୁ ଜଣେ ସ୍ଥାନୀୟ ଠିକାଦାର ପଠାନ୍ ଡାଙ୍ଗ ଏହା କରୁଥିବା କହିଲେ । ସେ କୁଆଡେ ସୋନପୁରର ଜଣେ ଦୀର୍ଘବର୍ଷ ଧରି ଅବସ୍ଥାପିତ ରାଜନେତାଙ୍କ ମୁହିବୋଲା ଭଣଜା ଓ ବିବଦମାନ ବରିଷ୍ଠ ପ୍ରଶାସନିକ ଅଧିକାରୀଙ୍କ ବନ୍ଧୁ ବୋଲି କହି ହାଙ୍କନୀ ମାରୁଥିବାର ଶୁଣିବାକୁ ମିଳିଲା । ତାଙ୍କୁ ଫୋନ୍ ଯୋଗେ ଯୋଗାଯୋଗ କରାଯିବାରୁ ସେ ' ହଁ , କାମ ହେଉଛି । ଏହା ଡିପାର୍ଟମେଣ୍ଟାଲ୍ କାମ । ଏଇ ଜେଇଙ୍କୁ ପଚାରନ୍ତୁ । ମୁଁ କରୁନାହିଁ ବୋଲି ସଫେଇ ଦେଇ ଏଡାଇ ଯାଇଥିଲେ । ବ୍ଲକ୍ ର ଏଇ ଜେଇମାନେ ଧରାଛୁଆଁ ଦେଲେନାହିଁ । ପ୍ରଧାନଶିକ୍ଷୟିତ୍ରୀଙ୍କୁ ପଚାରିଲାରୁ ଦୁଇବର୍ଷ ଭିତରେ କିଛି କଣ୍ଟିଜେନସି ଆସିନାହିଁ । ବିଡିଓଙ୍କୁ ପଚାରନ୍ତୁ । ଦି' ଚାରିଦିନ ତଳେ ବିଡିଓ ଆସିଥିଲେ କହି ମୁକୁଳିଗଲେ ।

ଉଲ୍ଲେଖନୀୟ ଯେ ଦୁଇବର୍ଷ ଧରି କୋରାପୁଟ ଜିଲ୍ଲାରୁ ଆସି ଶର୍ମିଷ୍ଠା କୁମାରୀ ଗୌଡ ଏଠାରେ ପ୍ରଧାନଶିକ୍ଷୟିତ୍ରୀ ରହୁଛନ୍ତି ।

ଏବେ କୁଆଡେ ତାଙ୍କ ନବରଙ୍ଗପୁରର ବିଧାୟକ ବିଭାଗୀୟ ମନ୍ତ୍ରୀ ହେଇଥିବାରୁ ସେ ବଦଳି ହେଇ ଚାଲିଯିବେ !  ତେବେ ଶତାଧିକ ଛାତ୍ରଛାତ୍ରୀଙ୍କୁ ହଷ୍ଟେଲରେ ନିମ୍ନମାନର ଖାଦ୍ୟ , ସ୍କୁଲ୍ ପୋଷାକରେ ହେରଫେର, ପାଠପଢାରେ ଚିରାଚରିତ ଢଙ୍ଗରେ ଶିକ୍ଷାଦାନ ଇତ୍ୟାଦିର ଅନିୟମିତତାର ଅଭିଯୋଗ ଚର୍ଚ୍ଚା ହେଉଛି । ସବୁଥିରୁ ଭାଗ ଖାଇ ବର୍ଷ ବର୍ଷ ଧରି କର୍ତ୍ତୃପକ୍ଷ ପକେଟ୍ ଗରମ କରୁଥିବା ଓ ନିଷ୍ଠାର ସହ ଦାୟିତ୍ୱ ସମ୍ପାଦନ କରୁ ନଥିବା ସହ ଏହି ଉଚ୍ଚଶିକ୍ଷାନୁଷ୍ଠାନକୁ ସରକାର ଓ ପ୍ରଶାସନ ଉପଯୁକ୍ତ ଦୃଷ୍ଟି ଦେଉ ନଥିବା ସ୍ଥାନୀୟଲୋକେ ଅଭିଯୋଗ ପ୍ରକାଶ କରୁଛନ୍ତି ।