03-Jul-2024

ବାଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ସହର ସମେତ ଜିଲ୍ଲାରେ ଖରାଦିନେ ପ୍ରବଳ ଗ୍ରୀଷ୍ମପ୍ରବାହ ଲାଗିରହୁଛି । ତାପମାତ୍ରା ପ୍ରାୟ ୪୮ଡିଗ୍ରୀ ପର୍ଯ୍ୟନ୍ତ ପହଞ୍ଚି ଜୀବନ ଦୁର୍ବିସହ ହୋଇଯାଉଛି । ତେଣୁ ପରିବେଶ ପ୍ରତି ଜନସଚେତନତା ସୃଷ୍ଟି ତଥା ବନୀକରଣ ପାଇଁ ବଲାଙ୍ଗୀରର ବିଭିନ୍ନ ସଂଗଠନ ଆଗେଇ ଆସୁଛନ୍ତି । କିଛି ସ୍ୱେଚ୍ଛାସେବୀ ନିଜେ ନିଜେ ଜଙ୍ଗଲବିଭାଗଠାରୁ ଚାରା ଆଣି ନିଜଘରେ,ଘରପାଖରେ ତଥା ଜଙ୍ଗଲର ତଳିଅଞ୍ଚଳରେ ଲଗାଉଛନ୍ତି । ଏହି ଧାରା କିଛିବର୍ଷ ଧରି ଚାଲିଆସିଛି । କିନ୍ତୁ ଚଳିତବର୍ଷ ପ୍ରାୟ ସାମାଜିକ ଓ ସାଂସ୍କୃତିକ  ସଂଗଠନ ପକ୍ଷରୁ ବ୍ୟାପକ ଭାବରେ ବନୀକରଣକୁ ଧ୍ୟାନ ଦିଆଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନରେ “ଏକପେଡ ମାଁ କେ ନାମ” ଯୋଗୁଁ ଲୋକମାନେ ଆହୁରି ଆଗ୍ରହ ପ୍ରକାଶ କରୁଛନ୍ତି। ବଲାଙ୍ଗୀରର କିଛି ବୁଦ୍ଧିଜୀବୀ ସବୁଜ ବଲାଙ୍ଗୀର ଗ୍ରୁପ କରି ଦୁଇ ଦିନ ହେଲା ସଦେଇପାଲି ସ୍ଥିତ ଲୋୟର ସୁକତେଲ ବିସ୍ଥାପିତଙ୍କ କଲୋନୀରେ ସ୍ଥାନୀୟ ଲୋକଙ୍କୁ ନେଇ ବୃକ୍ଷରୋପଣ କରାଯାଇଛି । ଏଠାରେ ବଲାଙ୍ଗୀର ବନବିଭାଗର ଡିଏଫଓ ସୁଦର୍ଶନ ବେହେରାଙ୍କ ଉପସ୍ଥିତିରେ ୭୫ତମ ବନମହୋତ୍ସବ ପାଳିତ ହୋଇଛି । ମୁଖ୍ୟତଃ ମହିଳାମାନେ ଆଗ୍ରହର ସହିତ ବୃକ୍ଷରୋପଣ କରୁଥିବା ଦେଖାଯାଇଛି । ଏଠାରେ ପ୍ରାୟ ୨୦୦ଗଛ ରୋପଣ କରାଯାଇ ସାରିଛି ଓ ଏହାର ସଂରକ୍ଷଣ ଦାୟୀତ୍ୱ ନିଜେ ବିସ୍ଥାପିତ କଲୋନୀର ଲୋକେ ନେବାକୁ ସମ୍ମତି ଦେଇଛନ୍ତି । ଏଠାରେ ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ,ବଲାଙ୍ଗୀର ରେଞ୍ଜର ନବୀନ ପଣ୍ଡା,ସବୁଜ ବଲାଙ୍ଗୀର ଗ୍ରୁପର ହେମନ୍ତ ପଣ୍ଡା, ପ୍ରଦୀପ ମହାନ୍ତି, ଜୟପ୍ରକାଶ ପୁରୋହିତ, ନାଗରିକ କମିଟିର ସଭାପତି ଡ.ଶ୍ରୀକର ମିଶ୍ର, ରାଧାକାନ୍ତ ମହାପାତ୍ର, ନୂତନ ଦାସଙ୍କ ସହ ଶତାଧିକ ବ୍ୟକ୍ତି ଉପସ୍ଥିତ ଥିଲେ l

ସେହିପରି ଗନ୍ଧରେଲ ସ୍ଥିତ ଆଶ୍ରମରେ ବରିଷ୍ଠନାଗରିକ ନବକୃଷ୍ଣ ସାହୁଙ୍କ ନେତତ୍ୱରେ ପ୍ରୀୟରଂଜନ ବହିଦାର ଓ ଅନ୍ୟମାନେ ବୃକ୍ଷରୋପଣ କରିଛନ୍ତି । ସ୍ଥାନୀୟ ଜିଲ୍ଲା ପର୍ଯ୍ୟଟନ କାର୍ଯ୍ୟାଳୟ ପରିସରରେ ମଧ୍ୟ ଜିଲ୍ଲା ପର୍ଯ୍ୟଟନ ଅଧିକାରୀ ଆର.କେ ଦଳାଇଙ୍କ ନେତୃତ୍ୱରେ ବୃକ୍ଷରୋପଣ କାର୍ଯ୍ୟକ୍ରମ ହୋଇଥିଲା । ଏଥିରେ ମୁଖ୍ୟଅତିଥି ଭାବରେ ଅତିରିକ୍ତ ଜିଲ୍ଲାପାଳ ଡ.ବିଜୟକୁମାର ସେଠୀ ଓ ସମ୍ମାନୀତ ଅତିଥି ଭାବରେ ଡିଏସଏସଓ ମଦନଜିତ ହୋତା,ଏସଆଇଏଚଏମର ଅଧ୍ୟକ୍ଷ ଡ.ସୁରେଶ ଏକନାଥ, ଜିଲ୍ଲା ଯୋଜନା ଅଧିକାରୀ ସଂଜୟ ଦୀପ ପ୍ରମୁଖ ଯୋଗଦେଇ ବୃକ୍ଷରୋପଣ କରିଥିଲେ ।