03-Jul-2024

ଭୁବନେଶ୍ବର(ବିଶ୍ୱରଞ୍ଜନ ବିଶ୍ଵାଳଙ୍କ ରିପୋର୍ଟ): ନିର୍ବାଚନ ପୂର୍ବରୁ ଭୁବନେଶ୍ୱର ବିଜେଡିରେ କାଁ ଭାଁ ବିବାଦ ଦେଖିବାକୁ ମିଳୁଥିଲା। ହେଲେ, ନିର୍ବାଚନ ଫଳାଫଳ ଆସିବା ପରେ ବିଜେଡି ବିଦ୍ରୋହ ହାଟରେ ପଡି ଦାଣ୍ଡରେ ଗଡିଲାଣି। ବିଜେଡି ବିଧାୟକ, ପୂର୍ବତନ ମନ୍ତ୍ରୀ ଓ କର୍ପୋରେଟର ନିଜ ନିଜର ସ୍ୱତନ୍ତ୍ର ସଂଗଠନ ଚଳାଇବା ସହ, ସେମାନଙ୍କ ମଧ୍ୟରେ ବାକ୍ ଯୁଦ୍ଧ ଦେଖିବାକୁ ମିଳିଛି।

ବିଜେଡିର ଗୋଷ୍ଠୀ କନ୍ଦଳ ପଦାକୁ ଆସିବା ପରେ, ବିଏମ ମେୟରଙ୍କ ପାଇଁ ଅଡୁଆ ବଢ଼ୁଛି ବୋଲି ଚର୍ଚ୍ଚା ହେଉଛି। ଏଥିସହ ବିଏମସି ନିର୍ବାଚନକୁ ଏହା ଭିତରେ ୨ବର୍ଷ ପୂରି ଯାଇଥିବାରୁ ଆଗକୁ ବିଜେପି କର୍ପୋରେଟର ମେୟରଙ୍କ ବିରୋଧରେ ଅନାନ୍ଥା ପ୍ରସ୍ତାବ ଆଣିପାରନ୍ତି ବୋଲି ଆଲୋଚନା ହେଉଛି।

ବିଏମସିର ସଂଖ୍ୟା ଗଣିତ

ବିଏମସିରେ ମୋଟ ୬୭ କର୍ପୋରେଟର
ବିଜେଡିର ୫୭ କର୍ପୋରେଟର
ବିଜେପିର ୦୯ + ୦୧(ବହିଷ୍କୃତ) କର୍ପୋରେଟର
ଏହି ସଂଖ୍ୟାକୁ ଦେଖିଲେ ସ୍ପଷ୍ଟ ହେଉଛି ବିଏମସିରେ ବିଜେଡି ସଂଖ୍ୟା ଦୃଷ୍ଟିରୁ ବହୁ ଆଗରେ ରହିଛି, ତଥାପି ବିଜେପିର ଗୋଟିଚାଳନା ଆଗକୁ ଭୁବନେଶ୍ୱର ମହାନଗର ନିଗମର ରାଜନୈତିକ ପାଣିପାଗକୁ ବଦଳାଇ ଦେଇ ପାରେ ବୋଲି ରାଜନୀତି ସମୀକ୍ଷକ ଆକଳନ କରିଛନ୍ତି।

ସୂଚନାଯୋଗ୍ୟ ଯେ, ଦୁଇ ଦିନ ତଳେ ଭବାନୀପାଟଣା ପୌରାଧକ୍ଷଙ୍କ ବିରୋଧରେ ବିଜେଡିର କର୍ପୋରେଟରମାନେ ଅନାସ୍ଥା ପ୍ରସ୍ତାବ ଆଣିଛନ୍ତି। ୧୮ଜଣଙ୍କ ମଧ୍ୟରୁ ୧୪ ଜଣ ବିଜେଡି କାଉନସିଲର ହୋଇଥିଲେ ବି ଏବେ ପୌରାଧକ୍ଷଙ୍କ ଆସନ ଟଳମଳ ଅବସ୍ଥାରେ ରହିଛି। ତେଣୁ ଆଗକୁ ବିଏମସିରେ ସମାନ ଅବସ୍ଥା ଦେଖିବାକୁ ମିଳିପାରେ ବୋଲି କୁହାଯାଉଛି।