01-Jul-2024

ବାଲାଙ୍ଗୀର(ପ୍ରେରଣା ଖବର ): ରାଜେନ୍ଦ୍ର ମହାବିଦ୍ୟାଳୟରୁ ବିଶ୍ୱବିଦ୍ୟାଳୟ ହେଲା । ଗତ ୨୦୨୦ ମସିହା ସେପଟେମ୍ବର ୧ ତାରିଖରୁ ୟୁଜିସିରୁ ବିଶ୍ୱବିଦ୍ୟାଳୟର ମାନ୍ୟତା ମିଳିଲା । କିନ୍ତୁ ଦୁଃଖର ବିଷୟ ଯେ,ଗତ ୪ବର୍ଷ ହେଲା କେବଳ ଅତିଥି ଅଧ୍ୟାପକରେ ଏହି ବିଶ୍ୱବିଦ୍ୟାଳୟ ଚାଲିଛି । ଲୋକଙ୍କର ଆଶାଥିଲା ବିଶ୍ୱବିଦ୍ୟାଳୟ ହେଲାପରେ ଏଠିକାର ଛାତ୍ରଛାତ୍ରୀ ଉନ୍ନତଶିକ୍ଷା ପାଇବା ସହ ଗବେଷଣା ପାଇଁ ସୁଯୋଗ ପାଇବେ । କିନ୍ତୁ ପରିତାପର ବିଷୟ ଯେ, ପ୍ରଧ୍ୟାପକ ନଥାଇ କେବଳ ରାଜେନ୍ଦ୍ର ମହାବିଦ୍ୟାଳୟରେ ଥିବା କିଛି ଅଧ୍ୟାପକ ଓ କର୍ମଚାରୀଙ୍କ ଦ୍ୱାରା ବିଶ୍ୱବିଦ୍ୟାଳୟ ପରିଚାଳିତ ହେଉଛି । ଏହାକୁ ନେଇ ବଲାଙ୍ଗୀରରେ ଛାତ୍ରଛାତ୍ରୀ, ଅଭିଭାବକ ତଥା ଜନସାଧାରଣରେ ଜନଅସନ୍ତୋଷ ପ୍ରକାଶ ପାଉଛି । 
  ବିଶ୍ୱବିଦ୍ୟାଳୟ କାର୍ଯ୍ୟାଳୟ ସୂତ୍ରରୁ ମିଳିଥିବା ତଥ୍ୟ ଅନୁଯାୟୀ ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟରେ ସରକାର ୧୮ଟି ପ୍ରଫେସର,୩୬ଟି ଅସୋସିଏଟ ପ୍ରଫେସର ଓ ୭୨ଟି ଅସିଷ୍ଟାଣ୍ଟ ପ୍ରଫେସର ଏଭଳି ୧୨୬ଟି ପଦବୀକୁ ସ୍ୱିକୃତୀ ଦେଇଛନ୍ତି । କିନ୍ତୁ ଏବେ ସୁଦ୍ଧା କୁଳପତି ଓ ଜଣେ ରେଜିଷ୍ଟାର ନିଯୁକ୍ତ ହୋଇଥିବା ବେଳେ ୧୮ଟି ପ୍ରଫେସର ପଦବୀରେ ଜଣେ ମଧ୍ୟ କେହି ନିଯୁକ୍ତି ହୋଇନାହାଁନ୍ତି ।  ୩୬ଟି ଅସୋସିଏଟ ପ୍ରଫେସର ପଦବୀରୁ ମାତ୍ର ୨ଜଣ ଓ ୭୨ଜଣ ଆସିଷ୍ଟାଣ୍ଟ ପ୍ରଫେସରଙ୍କ ମଧ୍ୟରୁ ୧୮ଜଣ ନିଯୁକ୍ତ ହୋଇଛନ୍ତି । ବିଶ୍ୱବିଦ୍ୟାଳୟ ଘୋଷଣା ହେବାର ୪ବର୍ଷ ଭିତରେ କେବଳ ୨୦ଜଣ ଟିଚିଂଷ୍ଟାଫ ଯୋଗଦେଇଛନ୍ତି । ତେବେ ରାଜେନ୍ଦ୍ର ମହାବିଦ୍ୟାଳୟର ୧୮ଜଣ ଅଧ୍ୟାପକ ଓ ୩୭ଜଣ ଅତିଥି ଅଧ୍ୟାପକଙ୍କୁ ନେଇ ଏହି ବିଶ୍ୱବିଦ୍ୟାଳୟ ପରିଚାଳିତ ହେଉଛି । କିନ୍ତୁ ଏପର୍ଯ୍ୟନ୍ତ ଜଣେ ମଧ୍ୟ ନନଟିଚିଂ ଷ୍ଟାଫ ନିଯୁକ୍ତି ହୋଇ ନାହାଁନ୍ତି । ଫଳରେ ବିଶ୍ୱବିଦ୍ୟାଳୟ ପରିଚାଳନାରେ ସମସ୍ୟା ହେଉଛି । ଗତ ୨୦୧୯ ମସିହାରେ ରାଜେନ୍ଦ୍ର ମହାବିଦ୍ୟାଳୟର ୭୫ବର୍ଷ ପୂର୍ତ୍ତି ଅବସରରେ ହୋଇଥିବା ପ୍ଲାଟିନମ ଜୁବୁଲିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜେନ୍ଦ୍ର ମହାବିଦ୍ୟାଳୟକୁ ଏକ ବିଶ୍ୱବିଦ୍ୟାଳୟରେ ପରିଣତ କରି ଏଜୁକେସନ ଏକ୍ସେନ୍ସ ସେଣ୍ଟର କରାଯିବ ବୋଲି ଘୋଷଣା କରିଥିଲେ । ଏହା ବାଦ ୫୦କୋଟି ଟଙ୍କାର ଅନୁଦାନ ମଧ୍ୟ ଘୋଷଣା କରିଥିଲେ । ସେଥିରୁ ମାତ୍ର ୨୫କୋଟି ଟଙ୍କା ଆସି ବିଶ୍ୱବିଦ୍ୟାଳୟ ପାଇଁ ପ୍ରଶାସନିକ ବିଲଡିଂକାମ ସରିଯାଇଛି । ୧୪କୋଟି ଟଙ୍କାର ଏକ ଅଡିଟୋରିୟମ ମଧ୍ୟ ନିର୍ମାଣ ଚାଲିଛି । ଆହୁରି ବିଡମ୍ବନାର ବିଷୟ ଯେ,୧୯୪୪ ମସିହାରୁ ମହାରାଜା ରାଜେନ୍ଦ୍ର ମହାବିଦ୍ୟାଳୟ ସ୍ଥାପନ କଲାଦିନରୁ ଆଜି ପର୍ଯ୍ୟନ୍ତ ରାଜେନ୍ଦ୍ର କଲେଜ କିମ୍ବା ବିଶ୍ୱବିଦ୍ୟାଳୟର ଜମିସମସ୍ୟାର ସମାଧାନ ହୋଇପାରିଲା ନାହିଁ । ଆଜି ଏହି ଅନୁଷ୍ଠାନର ୮୦ବର୍ଷ ପୂର୍ତ୍ତି ହେଲାଣି କିନ୍ତୁ ଜମିସମସ୍ୟା ସମାଧାନ ହୋଇପାରୁନି । ମହାରାଜା ଏହି ଅନୁଷ୍ଠାନ ପାଇଁ ରିଜର୍ଭ ରଖି ଦାନଦେଇଥିବା ୨୪୮ ଏକର ଜମିରୁ ଏବେ ସରକାର ଦେଇଛନ୍ତି ମାତ୍ର ୬୧ ଏକର ଜମି । ବିଶ୍ୱବିଦ୍ୟାଳୟରେ ଜମିସମସ୍ୟା ସାଙ୍ଗକୁ ଅଧ୍ୟାପକ/କର୍ମଚାରୀ ସମସ୍ୟା ଲାଗିରହିଥିବାରୁ ଛାତ୍ରଛାତ୍ରୀଙ୍କ ଉଚ୍ଚତର ଗବେଷଣା ସ୍ୱପ୍ନ ଫେଲ ମାରୁଛି । ଏବେ ରାଜ୍ୟରେ ସରକାର ବଦଳି ଡବଲ ଇଞ୍ଜିନ ସରକାର ଚାଲିଛି । ତେଣୁ ରାଜ୍ୟସରକାର ସ୍ୱତନ୍ତ୍ର ଧ୍ୟାନଦେଇ ଏହି ଅନୁଷ୍ଠାନର ସମସ୍ୟା ଗୁଡିକୁ ସମାଧାନ କରାଇ ଏକ ଉନ୍ନତ ଶିକ୍ଷାନୁଷ୍ଠାନରେ ପରିଣତ କରିବେ ବୋଲି ବଲାଙ୍ଗୀରବାସୀ ଆଶା ରଖିଛନ୍ତି ।