01-Jul-2024

ବାଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ସହର ମଧ୍ୟଦେଇ ବହିଯାଇଥିବା ଲକ୍ଷ୍ମୀଯୋର ନାଳକୁ ଶେଷରେ କ୍ଷୁଦ୍ରଜଳସେଚନ ବିଭାଗ ସଫେଇ ଆରମ୍ଭ କରିଛି। ଗତ ଦୁଇଦିନ ହେଲା ଜଣେ ଠିକଦାର ଜରିଆରେ ଚେନମାଉଣ୍ଟିଂ ମେସିନ ଲଗାଇ ଲକ୍ଷ୍ମୀ ଯୋରନାଳ ଭିତରେ ଥିବା ଅନାବନାଗଛ ଓ ପୋତିହୋଇଥିବା ବାଲିକୁ କଢାଯାଉଛି। ଗତ ଜୁନ ୧୨ ତାରିଖରେ ବଲାଙ୍ଗୀରର ନବନିର୍ବାଚିତ ବିଧାୟକ କଳିକେଶ ନାରାୟଣ ସିଂଦେଓ ପୌରାପାଳିକା କାର୍ଯ୍ୟାଳୟରେ ସମୀକ୍ଷା ବେଳେ କ୍ଷୁଦ୍ର ଜଳସେଚନ ବିଭାଗକୁ ଲକ୍ଷ୍ମୀ ଯୋରନାଳର ସଫେଇ ନେଇ ନିର୍ଦ୍ଦେଶ କରିଥିଲେ। କିନ୍ତୁ ବିଭାଗୀୟ ଅଧିକାରୀ ନୀରବ ରହିଥିଲେ । ଏନେଇ କିଛି ଖବରକାଗଜରେ ଖବର ପ୍ରକାଶିତ ହୋଇଥିଲା । ଫଳରେ ଶେଷରେ ଚାପଗ୍ରସ୍ତ ହୋଇ କ୍ଷୁଦ୍ରଜଳସେଚନ ବିଭାଗ୍ ଲକ୍ଷ୍ମୀ ଯୋରନାଳ ସଫେଇ କାମ ଆରମ୍ଭ କରିଛି l ପ୍ରଥମେ ଠିକଦାରପଡା ବ୍ରିଜର ଉପରମୁଣ୍ଡକୁ ସଫେଇ କରାଯାଉଛି। ଆଜି ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ୨୧ନମ୍ବର ୱାର୍ଡ କାଉନସିଲର ଶତୃଘ୍ନ ନାଗ କ୍ଷୁଦ୍ରଜଳସେଚନ ବିଭାଗର କନିଷ୍ଠଯନ୍ତ୍ରୀ ଇଂ.ଓଝାଙ୍କୁ ଡାକି କାମର ପରିଦର୍ଶନ କରିଛନ୍ତି । ବର୍ଷା ବଢିବା ପୂର୍ବରୁ ଅଧିକ ମେସିନ ଲଗାଇ ସଫେଇ କାମକୁ ସାରିବାକୁ ପୌରାଧ୍ୟକ୍ଷା ଲିକା ସାହୁ କ୍ଷୁଦ୍ରଜଳସେଚନ ବିଭାଗକୁ ଅନୁରୋଧ କରିଛନ୍ତି । 
   ପ୍ରକାଶ୍ୟ ଯେ,ବଲାଙ୍ଗୀର ସହର ମଧ୍ୟଦେଇ ବହିଯାଇଛି ଲକ୍ଷ୍ମୀଯୋର ନାଳ। ଗୋଟିଏ ସମୟରେ ଏହି ନାଳରେ ଲୋକେ ଗାଧୁଆପାଧୁଆ ମଧ୍ୟ କରୁଥିଲେ । ଗାଈଗୋରୁ ନାଳଖଣ୍ଡିର ଘାସଖାଇ ପାଣି ପିଉଥିଲେ । କିନ୍ତୁ ଏବେ ସରକାର ଏହାର ବିକାଶ କରାଇ ବଲାଙ୍ଗୀର ପାଇଁ ବିପତ୍ତିକୁ ଡାକି ଆଣିଛନ୍ତି । ବନ୍ୟାନୀୟନ୍ତ୍ରଣ ନାମରେ ଆସିଥିବା ୧୭କୋଟି ଟଙ୍କାର ଅନୁଦାନରେ ନାଳର ଉଭୟକଡେ ଉଚ୍ଚ ଗାର୍ଡୱାଲ ଓ ୫ ଟି ସ୍ଥାନରେ ଚେକନିର୍ମାଣ କରାଯାଇଛି। ନିର୍ମାଣଗତ ତୃଟିରୁ ଶେଷରେ ଏହି ପ୍ରକଲ୍ପ ପାଇଁ ବଲାଙ୍ଗୀର ସହରରେ ବନ୍ୟା ହୋଇ ଲୋକମାନେ ହଇରାଣ ହେଉଛି। ତେବେ ଲକ୍ଷ୍ମୀଯୋର ପ୍ରକଜଲ୍ପକୁ କ୍ଷୁଦ୍ରଜଳସେଚନ ବିଭାଗ କରାଇଥିବା ବେଳେ ଏବେ ସଫେଇ ବେଳେ ମୁହଁ ମୋଡୁଥିଲେ । ଯାହାକୁ ନେଇ ଜନଅସନ୍ତୋଷ ଦେଖାଦେଇଥିଲା । ବଲାଙ୍ଗୀରର ନିବନିର୍ବାଚିତ ବିଧାୟକ କଳିକେଶନାରାୟଣ ସିଂଦେଓ ସମୀକ୍ଷା ବୈଠକରେ ତୁରନ୍ତ ଲକ୍ଷ୍ମୀ ଯୋରନାଳକୁ ସଫେଇ କରିବାକୁ ନିର୍ଦ୍ଦେଶ କରିଥିଲେ । ବଲାଙ୍ଗୀର ସହରର ଉପରମୁଣ୍ଡରେ ଥିବା ଗନ୍ଧରେଲ ଜଳପ୍ରକଲ୍ପରୁ ଲକ୍ଷ୍ମୀଯୋରଦେଇ ବନ୍ୟାଜଳ ଆସିଥାଏ। ଲକ୍ଷ୍ମୀ ଯୋର ଗନ୍ଧରେଲ ପ୍ରକଲ୍ପଠାରୁ ଆରମ୍ଭ ହୋଇ ବଲାଙ୍ଗୀର ସହର,ପୁଇଁତଳା ବ୍ଲକ ଓ ସୋନପୁର ଜିଲ୍ଲାର ତରଭା ବ୍ଲକଅଞ୍ଚଳର ପୁଆ ଦେଇ ଯାଇ ସୁକତେଲନଦୀରେ ମିଶିଛି । ବଲାଙ୍ଗୀର ସହରରେ ପ୍ରାୟ ୮କିମି ଅଞ୍ଚଳରେ ଏହା ବହିଯାଇଛି । ବଲାଙ୍ଗୀର ମଧ୍ୟଦେଇ ବହିଯାଇଥିବାରୁ ବେଶି ବର୍ଷା ସମୟରେ ସାମାନ୍ୟ କୂଳଲଙ୍ଘି ବନ୍ୟାଜଳ ଯୋରଖଣ୍ଡିରେ ଥିବା କିଛି ଘରକୁ ପାଣି ପଶୁଥିଲା । ସେଥିପାଇଁ ଲକ୍ଷ୍ମୀ ଯୋରରେ ବନ୍ୟାନୀୟନ୍ତ୍ରଣ ପାଇଁ ରାଜ୍ୟର ସ୍ୱତନ୍ତ୍ର ରିଲିଫ କମିଶନରଙ୍କ ଅନୁଦାନ ଆସିଥିଲା । ଆସିଥିବା ୨୦କୋଟି ଟଙ୍କାର ଅନୁଦାନରୁ ୧୭କୋଟି ଖର୍ଚ୍ଚ କରାଯାଇ ଯୋରର ଉଭୟକଡେ କଂକ୍ରୀଟର ଉଚ୍ଚଗାର୍ଡୱାଲ ସହ ୫ ଟି ସ୍ଥାନରେ ଚେକଡ୍ର‌୍ୟାମ ନିର୍ମାଣ କରାଗଲା । କିନ୍ତୁ ନିର୍ମାଣରେ ତୃଟି କାରଣରୁ ଗତ ୨୦୧୯ ମସିହାରେ ଲକ୍ଷ୍ମୀଯୋର ପ୍ରବଳ ବନ୍ୟାଜଳ ଆସି ବଲାଙ୍ଗୀର ସହରର ଅନେକପଡାରେ ବନ୍ୟାପାଣି ପଶିଗଲା ଓ ବ୍ୟାପ କ୍ଷୟକ୍ଷତି ହୋଇଥିଲା । ଲକ୍ଷ୍ମୀଯୋର ପ୍ରକଲ୍ପରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ କରି ଖୋଦ ଶାସକଦଳ ତୁମ୍ବିତୁଫାନ କରି ତଦନ୍ତ ଦାବି କରିଥିଲେ । ସେଥିପାଇଁ ପରେ ପୁଣି ୧୪ କୋଟି ଟଙ୍କାର ଅନୁଦାନ ଆସି ପଡିରହିଛି । ଏହି ଅନୁଦାନ କ୍ଷୁଦ୍ରଜଳସେଚନ ବିଭାଗ ବଦଳରେ ଜଳସେଚନ ଡିଭିଜନ କରିବାକୁ ସରକାର ନିର୍ଦ୍ଦେଶ କରିଥିଲେ । ଜଳସେଚନ ବିଭାଗ ଟେଣ୍ଡର ପ୍ରକ୍ରୀୟା ଆରମ୍ଭ କଲା କିନ୍ତୁ ଯୋରଖଣ୍ଡିରେ ଥିବା ଘରଗୁଡିକୁ ଉଚ୍ଛେଦ କରା ନ ଯିବାରୁ ସେହି କାମ ଆରମ୍ଭ କରାଯାଇ ପାରିଲା ନାହିଁ । ଇତି ମଧ୍ୟରେ ଲକ୍ଷ୍ମୀଯୋରରେ ପାଣି ସାଙ୍ଗରେ ବାଲି ଓ ମାଟି ଆସି ପୋତିହୋଇଗଲାଣି । ଏହା ସହିତ ଅନାବନା ଗଛସବୁ ଭର୍ତ୍ତି ହୋଇଯାଇଛି । ଜଳନିସ୍କାସନ ଠିକରେ ହେଉନଥିବାରୁ ଯୋରରେ ପାଣିଜମି ରହି ମଶାବଂଶ ବୃଦ୍ଧି ହେଉଛି । ଲକ୍ଷ୍ମୀ ଯୋର ପାଇଁ କେତେବେଳେ ବଲାଙ୍ଗୀର ସହରରେ ଡେଙ୍ଗୁ ମଧ୍ୟ ବ୍ୟାପିବାର ଆଂଶଙ୍କା ରହିଛି । ଗତ ୧୨ ତାରିଖରେ ବଲାଙ୍ଗୀରର ନବନିର୍ବାଚିତ ବିଧାୟକ କଳିକେଶ ନାରାୟଣ ସିଂଦେଓ ପୌରପାଳିକା ସଭାକକ୍ଷରେ ଏକ ସମୀକ୍ଷା ବୈଠକ କରି ବର୍ଷା ପୂର୍ବରୁ ଲକ୍ଷ୍ମୀଯୋର ଭିତରେ ଥିବା ଅନାବନା ଗଛ ସହ ପୋତିହୋଇଥିବା ମାଟିକୁ ସଫେଇ କରିବାକୁ ପ୍ରଶାସନକୁ ନିର୍ଦ୍ଦେଶ କରିଥିଲେ। ଏବେ ବିଭାଗ ସେହି ସଫେଇକାମ ଆରମ୍ଭ କରିଛି ।