03-Jun-2024

ବଲାଙ୍ଗୀର(ଚିତ୍ରସେନ ବେହେରା)- ଟାଟା ପାୱାର ଲଗାଉଥିବା ସ୍ମାଟ ମିଟର କୁ ବିରୋଧ କରି ବଲାଙ୍ଗିର ନାଗରିକ କମିଟି ସ୍ଥାନୀୟ ବିଦ୍ୟୁତ ବିଭାଗ ଅଧିକ୍ଷଣ ଯନ୍ତ୍ରୀଙ୍କ କାର୍ଯ୍ୟାଳୟ ସମ୍ମୁଖରେ ସକାଳ ଘ.୯ ରୁ ଘ.୧୧ ପର୍ଯ୍ୟନ୍ତ ଗଣଧାରଣା ଦେଇଥିଲା । ପ୍ରଥମେ ଅନୁପ କୁମାର ସିଂହ ଯିଏ କି ବିଦ୍ୟୁତ ବିଭାଗରେ ଅସ୍ଥାୟୀ ଲାଇନମେନ ଥିଲେ ଓ ଗତ କାଲି କାର୍ଯ୍ୟରତ ଥିବା ସମୟରେ ବିଦ୍ୟୁତ ଖୁଣ୍ଟରେ ବିଦ୍ୟୁତ ଆଘାତରେ ମୃତ୍ୟୁବରଣ କରିଛନ୍ତି ତାଙ୍କର ଆତ୍ମାର ସଦ୍‌ଗତି ନିମନ୍ତେ ଉପସ୍ଥିତ ସମସ୍ତେ ଦୁଇ ମିନିଟ ନିରବ ପ୍ରାର୍ଥନା କରିଥିଲେ । ନାଗରିକ କମିଟି ସାଧାରଣ ସଂପାଦକ ମଧୁସୂଦନ ନାୟକ ସମସ୍ତଙ୍କୁ ସ୍ୱାଗତ କରିବା ସହିତ ଏହି ଧାରଣା ଦେବା ଉଦ୍ଦେଶ୍ୟ ସଂପର୍କରେ ଅବଗତ କରାଇଥିଲେ । ସଭାପତି ଡ. ଶ୍ରୀକର ମିଶ୍ର ପୁଙ୍ଖାନୁପୁଙ୍ଖ ବକ୍ତବ୍ୟ ରଖିଥିଲେ । ଅଧିକ୍ଷଣ ଯନ୍ତ୍ରୀଙ୍କୁ ଦିଆଯାଉଥିବା ଦାବିପତ୍ର ରେ ଉଲ୍ଲିଖିତ ତିନୋଟି ବିଷୟ ଉପରେ ଡ. ମିଶ୍ର ବିଶେଷ ଗୁରୁତ୍ୱ ଆରୋପ କରିଥିଲେ । ପରେ ପରେ ବିଦ୍ୟୁତ ବିଭାଗର ପରିଚାଳନା ଗତ ତୃଟି ଓ ଦୁର୍ବଳ ସେବା ପ୍ରଦାନ ସମ୍ପର୍କରେ ନାଗରିକ କମିଟିର ସଦସ୍ୟମାନେ ନିଜସ୍ୱ ମତ ପୋଷଣ କରିଥିଲେ । ବିଦ୍ୟୁତ ବିଭାଗର ଅଧିକ୍ଷଣ ଯନ୍ତ୍ରୀ ନାଗରିକ କମିଟି ଦ୍ୱାରା ପ୍ରସ୍ତୁତ ତିନି ଦଫା ସମ୍ମଳିତ ଦାବିପତ୍ର ଗ୍ରହଣ କରିଥିଲେ । ପ୍ରଥମ ଦାବି ଥିଲା ଗ୍ରାହକମାନଙ୍କୁ ଉତ୍ତମ ସେବା ଯୋଗାଇ ଦିଆଯାଇ ଲୋ ଭୋଲଟେଜ୍ ଓ ପାୱାର କଟ୍ ବନ୍ଦ ହେଉ । ଦ୍ୱିତୀୟରେ ବିଦ୍ୟୁତ ତାର ଦ୍ୱାହି ଦେଇ ଅନାବଶ୍ୟକ ବୃକ୍ଷ କର୍ତ୍ତନ ବନ୍ଦ କରାଯାଉ । ତୃତୀୟରେ ସ୍ମାର୍ଟ ମିଟର ଶୋଷଣର ପ୍ରତୀକ ହୋଇଥିବାରୁ ତାହାକୁ ଲଗାଇବା ବନ୍ଦ କରାଯାଉ । ଅଧିକ୍ଷଣ ଯନ୍ତ୍ରୀ ଏହା ଉପରେ ଉତ୍ତର ରଖିଥିଲେ ମଧ୍ୟ ତାହା ସନ୍ତୋଷଜନକ ପ୍ରତୀୟମାନ ହୋଇନଥିଲା । ନାଗରିକ କମିଟି ଦାବି କଲା ଯେ ପ୍ରଥମେ ଟାଟା ପାୱାର ସ୍ମାର୍ଟ ସେବା ଯୋଗାଉ ଯେପରି କି ଲୋ ଭୋଲଟେଜ୍‌, ଅଧିକ ସମୟ ପାୱାର ଫେଲ, ପାୱାର କଟ୍ ଓ ଅଧିକ ବିଲିଂ ଜନିତ ସମସ୍ୟା ରହିବ ନାହିଁ । ତାପରେ ସ୍ମାର୍ଟ ମିଟର କଥା ଉଠାଇବ । ଉପଯୁକ୍ତ ପରିଚାଳନା ଓ ଉତ୍ତମ ସେବା ଯୋଗାଇ ନ ପାରିଲେ ବଲାଙ୍ଗିର ଛାଡୁ । ଦିଆଯାଇଥିବା ଦାବିମାନଙ୍କ ଉପରେ ବିହିତ ତଥା ସନ୍ତୋଷଜନକ ପଦକ୍ଷେପ ଗ୍ରହଣ କରାନଗଲେ ପରବର୍ତ୍ତୀ ସମୟରେ ସମସ୍ତ ବର୍ଗର ଜନସାଧାରଣଙ୍କୁ ସାମିଲ କରି ବ୍ୟାପକ ଜନ ଆନ୍ଦୋଳନ କରାଯିବ ବୋଲି ବଲାଙ୍ଗିର ନାଗରିକ କମିଟି ଚେତାବନି ଦେଇଛି । ଏହି କାର୍ଯ୍ୟକ୍ରମରେ ଗୌର ଚନ୍ଦ୍ର ପୁରୋହିତ, ଶରତ ଚନ୍ଦ୍ର ମହାକୁର, ବିରଂଚି ବହିଦାର, ଗୋପବନ୍ଧୁ ପୁରୋହିତ, ନିତ୍ୟାନନ୍ଦ ମିଶ୍ର, ସୁନିଲ ଚନ୍ଦ୍ର ବିଶ୍ୱାଲ, ଋତୁରାଜ ସିଂ, ଡ. ପ୍ରମୋଦ କୁମାର ମିଶ୍ର, ଆଇନଜୀବୀ ଅଶୋକ କୁମାର ମିଶ୍ରଙ୍କ ସମେତ ଶହ ସଂଖ୍ୟାରେ ସଭ୍ୟବୃନ୍ଦ ସକ୍ରିୟ ଅଂଶଗ୍ରହଣ କରିଥିଲେ ।