18-May-2024

ବଲାଙ୍ଗିର-ଆସନ୍ତା ମେ ୨୦ରେ ନିର୍ବାଚନ ହେବାକୁ ଯାଉଛି । ସେଥିପାଇଁ ବିଜେଡି ଦଳର ପ୍ରାର୍ଥି କଳିକେଶ ନାରାୟଣ ସିଂଦେଓ ପ୍ରଚାରର ଶେଷପର୍ଯ୍ୟାୟରେ ଏକ ସାମ୍ବାଦିକ ସମ୍ବିଳନୀ ଜରିଆରେ ଲୋକଙ୍କୁ କିଛି ନିବେଦନ କରିଛନ୍ତି । କଳିକେଶ କହିଛନ୍ତି ଯେ,ବଲାଙ୍ଗୀରକୁ ବ୍ୟାଙ୍କକ ନୁହଁ ବରଂ ଏକ ବିକଶିତ ବଲାଙ୍ଗୀର, ସ୍ୱଚ୍ଛ-ସୁନ୍ଦର ଓ ଅପରାଧମୁକ୍ତ ବଲାଙ୍ଗୀର ରୂପେ ଗଢିବାକୁ ସଂକଲ୍ପ କରାଯାଇଛି ବୋଲି କହିଛନ୍ତି । 
ଶୈଳଶ୍ରୀ ପ୍ୟାଲେସଠାରେ ୪.୩୦ରେ ଆୟୋଜିତ ଏହି ସାମ୍ବାଦିକ ସମ୍ବିଳନୀରେ ସେ କହିଛନ୍ତି ଯେ, ବଲାଙ୍ଗୀର ରାଜପରିବାର ଶହଶହ ବର୍ଷ ଧରି ବଲାଙ୍ଗୀର ବିଭିନ୍ନ ଅନୁଷ୍ଠାନକୁ ଜମିଦେଇ ଗଢିଛନ୍ତି। ପୃଥ୍ୱିରାଜ ହାଇସ୍କୁଲଠାରୁ ଆରମ୍ଭ କରି କୋସଳକଳାମଣ୍ଡଳ ପଡିଆ,ରାଜେନ୍ଦ୍ର କଲେଜ ଇତ୍ୟାଦି ସବୁକିଛି କରାଯାଇଛି । ବିରୋଧିଦଳର ବିଧାୟକ ଓ ପ୍ରାର୍ଥିଙ୍କୁ ଟାର୍ଗେଟ କରି କହିଛନ୍ତି ଯେ, ବିଧାୟକଙ୍କ  ପରିବାର ବଲାଙ୍ଗୀରର ସମସ୍ତ ବ୍ୟବସାୟ ଓ ତାହାର ଲାଭ ଖାଇବାକୁ ଗତ ୧୦ବର୍ଷ ହେଲା ଚେଷ୍ଟାକରିଛନ୍ତି । ବଲାଙ୍ଗୀରର ବାଲି, ଗେଟି ବେପାର ଠୁ ଆରମ୍ଭ କରି ଠିକା ପର୍ଯ୍ୟନ୍ତ ସବୁ ବ୍ୟବସାୟର ଫାଇଦା ସେମାନଙ୍କ ଭାଇ,ପୁଅ କିମ୍ବା ପୁତୁରା ପାଇଛନ୍ତି। ଅନ୍ୟମାନଙ୍କୁ ହଇରାଣ କରାଯାଇଛି । ବଲାଙ୍ଗୀରରେ ଗୁଣ୍ଡାଗର୍ଦ୍ଦି, ଟେଣ୍ଡରଫିକ୍ସିଂ, ବାଲିଘାଟ, ପଥରକ୍ୱାରୀ ଇତ୍ୟାଦିକୁ ତାଙ୍କ ପରିବାର ମାଡିବସିଛନ୍ତି । ଆମେ ବଲାଙ୍ଗୀରରେ ବ୍ୟବସାୟ ନୁହଁ ବିକାଶ କରାଇବାରେ ଲାଗିଛୁ ଓ ବଲାଙ୍ଗୀରକୁ ଦେବାର ଶିଖିଛୁ ନେବାର ଶିଖିନୁ । ତେଣୁ ବଲାଙ୍ଗୀରବାସୀ ବଲାଙ୍ଗୀର ବିଜେଡିଦଳ ସହିତ ରହିଛନ୍ତି ଓ ବୋଲି କହିଥିଲେ । ସେପଟେ ବଲାଙ୍ଗୀର ଜିଲ୍ଲାରେ ହୋଇଥିବା ଲୋୟରସୁକତେଲ ଜଳସେଚନ ପ୍ରକଲ୍ପ, ଭୀମଭୋଇ ମେଡିକାଲ କଲେଜ ଓ ହସ୍ପିଟାଲ, କ୍ୟାନସର ହସ୍ପିଟାଲ, ରାଜେନ୍ଦ୍ର ବିଶ୍ୱବିଦ୍ୟାଳୟ,ବାଇପାସ ରାସ୍ତା,ତୁଷୁରା ଏୟାରଷ୍ଟ୍ରିପର ବିକାଶକାମ,ବଲାଙ୍ଗୀର ସହର ଓ ଗ୍ରାମାଞ୍ଚଳରେ ଶୁଦ୍ଧ ପାନୀୟଜଳ ପ୍ରକଲ୍ପ, ପର୍ଯ୍ୟଟନସ୍ଥଳିର ଉନ୍ନତିକରଣ ଇତ୍ୟାଦି କରାଯାଇ ପାରିଛି । ବଲାଙ୍ଗୀର ସହରକୁ ଆମେ କ୍ଷମତାରେ ଥିବା ବେଳେ ୬୦କୋଟି ଟଙ୍କା ବ୍ୟୟରେ ତେଲନଦୀରୁ ପାଣି ଆଣିଥିଲୁ । ଏବେ ମୁଖ୍ୟମନ୍ତ୍ରୀଙ୍କ ଦୟାରେ ୧୪୦କୋଟି ଟଙ୍କା ବ୍ୟୟରେ ସହରର ପ୍ରତ୍ୟେକ ଘରକୁ ପାନୀୟଜଳ ପହଞ୍ଚାଇବାର ଉଦ୍ୟମ ଚାଲିଛି । ସହରରେ ସ୍ମାର୍ଟପାର୍କ, ଅଡିଟୋରିୟମ ଇତ୍ୟାଦି କରାଯାଇଛି। ସହରରେ ସ୍ୱତନ୍ତ୍ର ଡ୍ରେନେଜ ପାଇଁ ମାଷ୍ଟାରପ୍ଲାନ କରାଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲାଙ୍ଗୀର ଜିଲ୍ଲାକୁ ସ୍ୱତନ୍ତ୍ର ଧ୍ୟାନ ଦେଇଛନ୍ତି । ଚଳିତଥର ସେ କଣ୍ଟାବାଞ୍ଜି ଆସନରୁ ବିଧାୟକ ପ୍ରାର୍ଥି ହୋଇଛନ୍ତି ତେଣୁ ଜିଲ୍ଲାର ବିକାଶ ଦ୍ୱିଗୁଣିତ ହେବ। ବଲାଙ୍ଗୀର ୭୦% ଭୋଟର ଆମ ସହିତ ରହିଛନ୍ତି  ବୋଲି ଦୃଢୋକ୍ତି ପ୍ରକାଶ କରିଛନ୍ତି କଲିକେଶ । ଆଜିର ଏହି ସାମ୍ବାଦିକ ସମ୍ବିଳନୀରେ କଳିକେଶଙ୍କ ସହିତ ତାଙ୍କ ଭାଇ ମନ୍ମଥବିଜୟ ସିଂଦେଓ, ଅର୍କେଶନାରାୟଣ ସିଂଦେଓ, ମେଘନା ସିଂଦେଓ, ଜିଲ୍ଲାପରିଷଦର ଅଧ୍ୟକ୍ଷା ଦେବକୀ ସାହୁ ପ୍ରମୁଖ ମଞ୍ଚାସୀନ ଥିଲେ ।