14-May-2024

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ )
ଦେଶରେ ଏଥର ପ୍ରଥମ ଥର ପାଇଁ ସାଧାରଣ ନିର୍ବାଚନ ରେ ନିର୍ବାଚନ କମିଶନ ଦିବ୍ୟାଙ୍ଗ ଏବଂ ବୟୋବୃଦ୍ଧ ମାନଙ୍କ ପାଇଁ ପୋଷ୍ଟାଲ୍ ବେଲଟ ମାଧ୍ୟମରେ ମତଦାନ ସୁବିଧା ର ଆରମ୍ଭ କରିଛନ୍ତି I ଆଜି ଏହି କ୍ରମରେ ଜିଲ୍ଲାରେ ୪୦ ପ୍ରତିଶତ ରୁ ଅଧିକ ଅକ୍ଷମତା ଥିବା ଦିବ୍ୟାଙ୍ଗ ଏବଂ ୮୫  ବର୍ଷ ରୁ ଅଧିକ ବୟୋବୃଦ୍ଧ ମାନଙ୍କ ପାଇଁ ପୋଷ୍ଟାଲ୍ ବେଲଟ ମାଧ୍ୟମରେ ମତଦାନ ପ୍ରକ୍ରିୟା ଆରମ୍ଭ ହୋଇଯାଇଛି I ଏହି ବର୍ଗର ଯେଉଁମାନେ ମତଦାନ କରିବା ପାଇଁ ଆଗ୍ରହୀ ଅଥଚ ଶାରୀରିକ ଅକ୍ଷମତା ପାଇଁ ଭୋଟ ଗ୍ରହଣ କେନ୍ଦ୍ର କୁ ଯାଇ ପାରିବେ ନାହିଁ, ସେମାନେ ପୂର୍ବରୁ ୧୨- ଡି ଫର୍ମ ରେ ଏଥିପାଇଁ ଆବେଦନ କରିଥିଲେ l ଆଜି ଅତିରିକ୍ତ ଜିଲ୍ଲାପାଳ ତଥା ଅତିରିକ୍ତ ଜିଲ୍ଲା ନିର୍ବାଚନ ଅଧିକାରୀ ରାଜେନ୍ଦ୍ର ମାଝୀ ଙ୍କ ତତ୍ୱାବଧାନରେ ସୋନପୁର ନିର୍ବାଚନ ମଣ୍ଡଳୀ ପାଇଁ ୫ଟି ଟିମ୍ ଏବଂ ବୀରମହାରାଜପୁର ସଂରକ୍ଷିତ ନିର୍ବାଚନ ମଣ୍ଡଳୀ ପାଇଁ ୪ ଟି ଟିମ୍ ନିର୍ଦ୍ଧିଷ୍ଟ ଗାଁ ଗାଁ ବୁଲି ମତଦାନ ଗ୍ରହଣ କରୁଛନ୍ତି l ପ୍ରତି ଟିମ୍ ରେ ଦୁଇଜଣ ପୋଲିଂ ଅଫିସର, ଜଣେ ମାଇକ୍ରୋ ଅବଜାରଭର , ଜଣେ ଭିଡିଓ ଗ୍ରାଫର ,ଦୁଇ ଜଣ ସିକୁରୀଟି ଗାର୍ଡ ରହି ଶାନ୍ତି ଶୃଙ୍ଖଳାର ସହିତ ପୋଷ୍ଟାଲ ମତଦାନ ଗ୍ରହଣ କରୁଛନ୍ତି I ଏହି ପ୍ରକ୍ରିୟା ରେ ସମସ୍ତ ପ୍ରକାର ପାରଦର୍ଶିତା ଅନୁପାଳନ କରାଯିବ ବୋଲି ଅତିରିକ୍ତ ଜିଲ୍ଲାପାଳ  ସୂଚନା ଦେଇଛନ୍ତି l ଜିଲ୍ଲାର ଉଭୟ ବିଧାନସଭା ନିର୍ବାଚନ ମଣ୍ଡଳୀରେ ଏହି ବର୍ଗରେ ସମୁଦାୟ ୭୪ ଜଣ ମତଦାତା ରହିଛନ୍ତି l ୬୪-  ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀରେ ୧୨ ଜଣ ଵୟୋବୃଦ୍ଧ ଓ ୧୦ ଜଣ ଦିବ୍ୟାଙ୍ଗ ମତଦାତା ୧୨ ଡି ଫର୍ମ ରେ ଆବେଦନ କରିଛନ୍ତି l ସେହିପରି ୬୫ ସୋନପୁର ବିଧାନସଭା ନିର୍ବାଚନ ମଣ୍ଡଳୀରେ ୩୮ ଜଣ ଵୟୋବୃଦ୍ଧ ମତଦାତା ଓ ୧୪ ଜଣ ଦିବ୍ୟାଙ୍ଗ ମତଦାତା ଫର୍ମ ୧୨ ଡି ରେ ଆବେଦନ କରିଥିବା ସୂଚନା ରହିଛି l