01-May-2024

ସୋନପୁର (ମନୋରଞ୍ଜନ ତ୍ରିପାଠୀ ) କାଠମାଣ୍ଡୁରେ ଅନୁଷ୍ଠିତ ଅନ୍ତର୍ଜାତୀୟ ମଡେଲିଂ ପ୍ରତିଯୋଗିତା ଉଚ୍ଚ କୋଟିର ଥିଲା । ସେହି ପ୍ରତିଯୋଗିତାରେ ଭାଗ ନେଇ ଏବଂ ସଫଳତା ପାଇ ଖୁବ୍ ଉତ୍ସାହିତ ଲାଗୁଛି । ଦେଶ ଓ ମାଟିର ସମ୍ମାନ ବଢାଇ ଥିବାରୁ ଆମେ ଗର୍ବିତ ବୋଲି କହିଥିଲେ ସୁବର୍ଣ୍ଣପୁରର କୁନି ମଡେଲ୍ ହର୍ଷିତା ଏବଂ ଉତ୍ପଳା । ଉତ୍ପଳା ପିନ୍ଧିଥିବା ସ୍ଥାନୀୟ ବାନ୍ଧଶିଳ୍ପୀଙ୍କ ଦ୍ୱାରା ପ୍ରସ୍ତୁତ ପୋଷାକ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା ବୋଲି ସେ କହିଛନ୍ତି । ଉଭୟ ଭଉଣୀ ନେପାଳର ରାଜଧାନୀ କାଠମାଣ୍ଡୁ ଠାରେ ଅନୁଷ୍ଠିତ ଅନ୍ତର୍ଜାତୀୟ ମଡେଲିଂ ପ୍ରତିଯୋଗିତାର ବିଭିନ୍ନ ବିଭାଗରେ ପାରଦର୍ଶିତା ଦେଖାଇ ସୁବର୍ଣ୍ଣପୁରର ସୁନାମ ବଢାଇ ଥିବାରୁ ‘ମୋର୍ ସୋନପୁର’ ଅନୁଷ୍ଠାନ ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଇଛି । ହୋଟେଲ୍ ବ୍ଲୁ ଫ୍ଲେମ୍‌ରେ ଅନୁଷ୍ଠିତ ଏକ ବର୍ଣ୍ଣାଢ୍ୟ ଉତ୍ସବରେ ମାନପତ୍ର ଏବଂ ଟ୍ରଫି ପ୍ରଦାନ କରି ଉଭୟଙ୍କୁ ସମ୍ବର୍ଦ୍ଧିତ କରାଯାଇଥିଲା ।

ଏହି ଉତ୍ସବରେ ଅତିଥି ଭାବେ ଡିଆଇପିଆର୍‌ଓ ଅଶ୍ୱିନୀ ଭୋଇ, ବିଏସ୍‌କେୱାଇ ଜିଲ୍ଲା ସଂଯୋଜିକା ପ୍ରଜ୍ଞା ପରିମିତା ଦାଶ, ଫିଲ୍ମ ଅଭିନେତା ଜିତ୍‌, ସେଣ୍ଟ ଆନିସ୍ ସ୍କୁଲ୍‌ର ପ୍ରିନ୍ସିପାଲ୍ ଜିନ୍ ଜୋସେଫ୍‌, ଭାଇସ୍ ପ୍ରିନ୍ସିପାଲ୍ ସିଷ୍ଟର୍ ମୋଲି ଏବଂ ସଂସ୍କୃତି ଗବେଷକ ଚୌଧୁରୀ ବିଭାର ପ୍ରମୁଖ ଅତିଥି ଭାବେ ଯୋଗ ଦେଇଥିଲେ ।  ଅନ୍ତର୍ଜାତୀୟ ପ୍ରତିଯୋଗିତାରେ ଟ୍ରଫି ଜିଣି ଉଭୟ ଭଉଣୀ କେବଳ ଯେ ସୁବର୍ଣ୍ଣପୁର ନୁହେ ରାଜ୍ୟ ଓ ଦେଶର ମାନ ବଢାଇଛନ୍ତି ବୋଲି ଅତିଥିଗଣ କହିଛନ୍ତି । ବିଭିନ୍ନ କ୍ଷେତ୍ରରେ ସୁନାମାଟିର ସୁନାଝିଅ ମାନେ ଆଗକୁ ଗଲେଣି ବୋଲି ଅତିଥି ମାନେ ଅଭିଭାଷଣରେ କହିଥିଲେ । ଏହି କାର୍ଯ୍ୟକ୍ରମକୁ ‘ମୋର୍ ସୋନପୁର’ ଅନୁଷ୍ଠାନର ସଂଯୋଜକ ମନୋଜ ବାରିକ ସଂଯୋଜନା କରିଥିବା ବେଳେ ବରିଷ୍ଠ ସାମ୍ବାଦିକ ବେଣୁଧର ପ୍ରଧାନ ଧନ୍ୟବାଦ ଅର୍ପଣ କରିଥିଲେ । ତେବେ ସମ୍ବର୍ଦ୍ଧନା ଉତ୍ସବର ମୁଖ୍ୟ ଆକର୍ଷଣ ସାଜିଥିଲା ହର୍ଷିତା ଏବଂ ଉତ୍ପଳାଙ୍କ ରେମ୍ପ ୱାକ୍ । ସମ୍ବଲପୁରୀ ମ୍ୟୁଜିକ୍‌ର ତାଳେ ତାଳେ ଉଭୟ ଭଉଣୀ ସୁନ୍ଦର ଭାବ ଭଙ୍ଗୀରେ ଫ୍ୟାସନ୍ ଏବଂ ମଡେଲିଂର ଯାଦୁ ଦେଖାଇ ଥିଲେ ।