23-Apr-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ସଂପ୍ରତି ବଲାଙ୍ଗୀର ଜିଲ୍ଲାର ଭୋଟ୍ ପ୍ରଚାର ଏପ୍ରିଲ୍ ର ପ୍ରଚଣ୍ଡ ବର୍ଦ୍ଧିଷ୍ଣୁ ଗରମ ସତ୍ତ୍ୱେ ଜୋର୍ ଧରି ଆସୁଛି । ଜିଲ୍ଲାରେ ସକ୍ରିୟ ମୁଖ୍ୟତଃ ବିଜେଡି ବିଜେପି ଓ କଂଗ୍ରେସଦଳର ପ୍ରତିଦ୍ଵନ୍ଦିତାରେ ବିଗତ ପ୍ରାୟ ତିନିଥରର ୨୪ ବର୍ଷର କ୍ଷମତାସୀନ ବିଜେଡି ବନାମ ନବୀନଶାସନର ବିପକ୍ଷରେ ଏବେ ଆଣ୍ଟି ଇନକମ୍ବେସୀ ଫ୍ୟାକ୍ଟର୍  ବା ଶାସକ ବିରୋଧୀ  ପ୍ରତିକ୍ରିୟା ଉଠିଥିବା ସହ ବିଜେପି ବନାମ ମୋଦୀ ସପକ୍ଷରେ ପରିବର୍ତ୍ତନ ବା  ଅନ୍ତଃ- ସୁପର୍ ଲହର ସୃଷ୍ଟି ହୋଇଛି । ତେବେ ଚଳିତ ନିର୍ବାଚନରେ ଟିକେଟ ବଣ୍ଟନ ବେଳେ ଶେଷପର୍ଯ୍ୟନ୍ତ ରାଜ୍ୟରେ ବିଜେଡି- ବିଜେପି ମେଣ୍ଟ ଚର୍ଚ୍ଚା ଓ ଶେଷରେ ମେଣ୍ଟବିଫଳ ହେବାରୁ  ବ୍ୟାପକ ଦଳଡିଆଁ ଓ ବହୁ ଆଶାୟୀଙ୍କୁ ବଞ୍ଚିତ କରାଯାଇ ଆସୁଥିବାରୁ ଏହି ପରିପ୍ରେକ୍ଷୀରେ କଂଗ୍ରେସଦଳ ବଳକା ଆଶାୟୀଙ୍କୁ ଆପଣେଇ ନେଇ ଫାଇଦାରେ ରହିଛି । ଏଣୁ 'ଦ୍ବୟୋର୍ ବିବାଦେ ତୃତୀୟସ୍ୟ ଲାଭ' ନ୍ୟାୟରେ ଏହି ତ୍ରିମୁଖୀପ୍ରତିଦ୍ଵନ୍ଦିତାର ଗଣିତ କଂଗ୍ରେସର ସ୍ଥିତି ଓ ସମ୍ଭାବନାକୁ ଉଜ୍ଜଳ କରିଛି । ତେବେ ଏବଠୁଁ ଏଥିରେ ସରକାର ଗଠନର ଆଶା ପରିଲକ୍ଷିତ ହୋଇପାରିନାହିଁ । 

ବଲାଙ୍ଗୀର ଜିଲ୍ଲାର ବଲାଙ୍ଗୀର ଓ ସୁବର୍ଣ୍ଣପୁର ଦୁଇଟି ଜିଲ୍ଲାକୁ ନେଇ ଗଠିତ ବଲାଙ୍ଗୀର ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ୭ ଟି ବିଧାନସଭା ଆସନ ଓ ଲୋକସଭା ଆସନରେ ବିଜେପି ବିଗତ ଚାରିଥର ସାଂସଦ ହୋଇଥିବା ପ୍ରାର୍ଥିନୀ ବଲାଙ୍ଗୀରପାଟଣା ରାଣୀ ସଙ୍ଗୀତା କୁମାରୀ ସିଂଦେଓ ଏଥର ମଧ୍ୟ ଦଳୀୟ ଟିକେଟ୍ ପାଇ ଠିଆହୋଇଛନ୍ତି ।  ତେବେ ତାଙ୍କ ବିରୋଧରେ କିଛିମାତ୍ରାରେ ଦଳୀୟ ଅସନ୍ତୋଷ ଥିବାରୁ ପୂର୍ବପରି ଏଥର ମଧ୍ୟ 'ମୋଦୀ ଜରୁରୀ - ସଙ୍ଗୀତା ମଜବୁରୀ' ନାରାର ମୃଦୁଗୁଞ୍ଜନ ଉଠିଛି । ତାଙ୍କ ବିରୋଧରେ ଏହା ମଧ୍ୟ ଅଭିଯୋଗ ରହିଛି ଯେ ସେ ଓ ତାଙ୍କ ବିଗତ ପାଞ୍ଚଥର ପାଟଣାଗଡ ବିଧାୟକ-ମନ୍ତ୍ରୀ ହୋଇଥିବା କନକବର୍ଦ୍ଧନ ସିଂଦେଓ ଏହି ଲୋକସଭା ନିର୍ବାଚନ ମଣ୍ଡଳୀର ପ୍ରାୟ ସବୁ ବିଧାନସଭା ଆସନରେ ଜାଣିଶୁଣି ତାଙ୍କ ଅନୁଗତ ଦୁର୍ବଳ ପ୍ରାର୍ଥୀଙ୍କୁ ସୁପାରିଶ କରିଆସୁଛନ୍ତି। ଏହା ଅମୂଳକ ହେଇପାରେ । କେବଳ ଲୋଇସିଂହାକୁ ଛାଡିଦେଲେ, ଅନ୍ୟାନ୍ୟ ଚାରି/ ପାଞ୍ଚଟି ଆସନର ପ୍ରାର୍ଥୀଙ୍କୁ ଦେଖିଲେ, ଏହା ଅନୁମାନ କରାଯାଇପାରେ। ପାଟଣାଗଡରେ ନିଜେ କେଭି ଉଠିଥିବାବେଳେ ଅନ୍ୟାନ୍ୟ ତିନୋଟି (ସୋନପୁର, ବୀରମହାରାଜପୁର ଓ କଣ୍ଟାବାଞ୍ଜି) ରେ ଗତଥରର ପ୍ରାର୍ଥୀଙ୍କୁ ରିପିଟ୍ କରାଯାଇଛି । ଚଳିତଥର ବଲାଙ୍ଗୀର ଓ ଟିଟିଲାଗଡ ଆସନରେ ନବାଗତଙ୍କୁ ସୁଯୋଗ ମିଳିଥିବା ବେଳେ ଟିଟିଲାଗଡ ଆସନରେ ଠିଆହୋଇଥିବା ପ୍ରାର୍ଥୀଙ୍କୁ ନେଇ ଉଭୟ ଦଳୀୟ ଓ ଭୋଟରଙ୍କ ମହଲରେ ଏଭଳି ଅସନ୍ତୋଷ ଅଧିକ ପ୍ରକାଶ ପାଇଛି। ଏହି ଆସନରେ ମୁଖ୍ୟ ପ୍ରତିପକ୍ଷ ବିଜେଡିର ଗତ ଦୁଇଥରର ବିଧାୟିକା-ମନ୍ତ୍ରୀ ଏଥର ମଧ୍ୟ ତୃତୀୟଥର ପାଇଁ ପ୍ରାର୍ଥିନୀ ହୋଇଥିବାରୁ ସେଠାରେ ବିଜେପି ଭାବିଚନ୍ତି ଜଣେ ସୁସଂଗଠକ ଓ ବିଜୟ ସମ୍ଭାବନା ଥିବା ପ୍ରାର୍ଥୀଙ୍କୁ ଦେବାକଥା ଥିଲା । ପୁନଶ୍ଚ ଏହି ବିଧାନସଭା ନିର୍ବାଚନମଣ୍ଡଳୀର ସଂଲଗ୍ନ ବିଧାନସଭା ଆସନରେ ଏଥର ଖୋଦ୍  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାର୍ଥୀ ହୋଇଥିବାରୁ ଏହି ଆସନର ଗୁରୁତ୍ୱ ଆହୁରି ବଢିଯାଇଛି । ଆହୁରି ମଧ୍ୟ ଅନ୍ୟପାର୍ଶ୍ବର ବିଧାନସଭା ସଇଁନ୍ତଳା ଆସନରେ କଂଗ୍ରେସର ଜଣେ ପୂର୍ବତନମନ୍ତ୍ରୀ ତଥା ହେଭିଉଏଟ୍ କଂଗ୍ରେସ ଦଳ ଛାଡି ଏଥର ବିଜେଡିର ସାଂସଦ ପ୍ରାର୍ଥୀଭାବରେ ଲଢୁଛନ୍ତି । ଏହାସହିତ ବିଜେଡିର ପୂର୍ବର ଥରେ ବିଧାୟକ ତଥା ଦୁଇଥରର ସାଂସଦ ଏଥର ବଲାଙ୍ଗୀର ବିଧାୟକ ଭାବରେ ବିଜେଡିରୁ ଲଢୁଛନ୍ତି । ପାଟଣାଗଡ ଆସନରେ ବିଜେଡିର ପୂର୍ବତନ ବିଧାୟକ ତଥା ବିଧାନସଭା ଉପ-ମୁଖ୍ୟସଚେତକ ଏଥର ମଧ୍ୟ ବିଜେଡି ପ୍ରାର୍ଥୀ ହୋଇଛନ୍ତି । ସେପଟେ ସୁବର୍ଣ୍ଣପୁର ଜିଲ୍ଲାର ସୋନପୁରରେ ବିଗତ ଚାରିଥରର ବିଜେଡି ବିଧାୟକ ତଥା ମନ୍ତ୍ରୀ ଓ ବୀରମହାରାଜପୁର ଆସନରେ ପୂର୍ବତନ ବିଜେଡିମନ୍ତ୍ରୀ ଏଥର ପୁଣି ବିଜେଡିର ଟିକେଟ୍ ପାଇ ପ୍ରାର୍ଥୀ ହୋଇଛନ୍ତି । ଅଧିକନ୍ତୁ ବଲାଙ୍ଗୀର ଆସନରେ ରାଜ୍ୟର ଜଣେ ହେଭିଉଏଟ୍ ନେତା ଦୁଇଥର ବିଧାୟକ ଓ ବିରୋଧୀଦଳ ନେତା ବା କଂଗ୍ରେସର ବିଧାୟକଦଳ ନେତାଙ୍କ ପୁଅ ପୂର୍ବତନ ପରାଜିତ ସାଂସଦ ପ୍ରାର୍ଥୀ ଏଥର ମଧ୍ୟ କଂଗ୍ରେସଦଳର ପ୍ରାର୍ଥୀ ରହୁଛନ୍ତି । ଏଣୁ ବଲାଙ୍ଗୀର ଲୋକସଭା ନିର୍ବାଚନ ମଣ୍ଡଳୀ ଓ ବଲାଙ୍ଗୀର ଜିଲ୍ଲାର ଚଳିତ ନିର୍ବାଚନର ସ୍ଥିତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିଛି । 

ତଥାପି ଜିଲ୍ଲାରେ ମୁଖ୍ୟମନ୍ତ୍ରୀଙ୍କ ପ୍ରାର୍ଥୀତ୍ବ କେବଳ ତାଙ୍କୁ ଜିତାଇଦେବା ବ୍ୟତୀତ ଅନ୍ୟତ୍ର ମୋଦୀଲହରର  ଅନ୍ତଃସ୍ରୋତ ସୃଷ୍ଟି ହୋଇଛି । ବିଭିନ୍ନ ଖଟିରେ ରାଜନୈତିକ ବା ନିର୍ବାଚନକୁ ନେଇ ଲୋକଙ୍କ ମଧ୍ୟରେ ଚର୍ଚ୍ଚା ହୁଏ ଯେ' ସାନ ସାଁକାରର ହଲିଆ ହେବାରଠାନୁ ବଡସାଁକାରର ହଲିଆ ହେବାଟା ବନେ ଆଏ ' (ଅର୍ଥାତ୍ ସାନ ସାଉକାରର ହଳିଆ ହେବା ଅପେକ୍ଷା ବଡ ସାଉକାରର ହଳିଆ ହେବା ଶ୍ରେୟସ୍କର) ଏଥରୁ ଏହି ନିର୍ବାଚନର ଆଗାମୀ ଫଳାଫଳ ଅନୁମେୟ । 
ଉଲ୍ଲେଖନୀୟ ଯେ, ଚଳିତଥରର ନିର୍ବାଚନ ପ୍ରସଙ୍ଗବିହୀନ ଓ ଚିହ୍ନଭିତ୍ତିକ ଏବଂ ଦଳର ମୁଖ୍ୟନେତାମାନେ ଭୋଟରଙ୍କୁ ଆକର୍ଷିତ କରିଥିବାବେଳେ, ପ୍ରାର୍ଥୀଙ୍କର  ଗୁରୁତ୍ବ କମ୍ । ତଥାପି ଏହି ସମୀକରଣ ଓ ଫଳାଫଳର ଅନୁମାନ ବଦଳିଯିବା ଅସମ୍ଭବ ନୁହେଁ ।