06-Jan-2024

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲାର ଜୀବନରେଖା କୁହାଯାଉଥିବା ଲୋୟରସୁକତେଲ ଜଳସେଚନ ପ୍ରକଲ୍ପ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦଘାଟନ କଲାପରେ ବିରୋଧି ଏହାକୁ ତେରଛାବାଣ ମାରି ସମାଲୋଚନା କରିଛନ୍ତି । ଉଦଘାଟନୀ ମଞ୍ଚରେ ବଲାଙ୍ଗୀର ସଦର ବିଧାୟକ ନରସିଂହ ମିଶ୍ର ଏକ ଅସଂମ୍ପୁର୍ଣ୍ଣ ପ୍ରକଲ୍ପକୁ ଉଦଘାଟନ କରିବାରେ କି ଲାଭ ବୋଲି ପ୍ରଶ୍ନ କରିଥିଲେ । ଏହାର ଠିକ ଦିନେ ପରେ କଂଗ୍ରେସଦଳର ଏଆଇସିସି ସଦସ୍ୟ ତଥା ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ମିଶ୍ର ସ୍ଥାନୀୟ ସାମ୍ବାଦିକ ଭବନରେ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ଶାସକ ବିଜେଡିଦଳକୁ ଟାର୍ଗେଟ କରିଥିଲେ । ସମରେନ୍ଦ୍ର ଅଭିଯୋଗ ଉଠାଇଥିଲେ ଯେ,ମୁଖ୍ୟମନ୍ତ୍ରୀଙ୍କ ଉଦଘାଟନୀ ଉତ୍ସବରେ ବିସ୍ଥାପିତ ତଥା ଚାଷିଙ୍କ କଥା ଅପେକ୍ଷା ରାଜନୀତି ବେଶି ଥିଲା ତଥା ଯେଉଁମାନେ ଲୋୟରସୁକତେଲ ପ୍ରକଲ୍ପ ବିଷୟରେ କିଛି ଜାଣି ନାହାଁନ୍ତି କି ବୁଡିଅଞ୍ଚଳକୁ ଯାଇ ନାହାଁନ୍ତି ସେମାନେ ଆଜି ବାହାବା ନେବାକୁ ବସିଛନ୍ତି ବୋଲି କହିଥିଲେ । ଏପରିକି ବିଜେଡି ଶାସନ ଯୋଗୁଁ ପ୍ରକଲ୍ପ ୨୩ବର୍ଷ ବିଳମ୍ବରେ ହେଲା ବୋଲି ଅଭିଯୋଗ କରିଥିଲେ । ତେବେ ଏହାର ଜବାବ ରଖିଛନ୍ତି ବିଜେଡିର ପୂର୍ବତନ ସାଂସଦ କଳିକେଶ ନାରାୟଣ ସିଂଦେଓ । କଳିକେଶ କହିଛନ୍ତି ଯେ,ବଲାଙ୍ଗୀର ଜିଲ୍ଲାର ବିକାଶକୁ ବିରୋଧି କଂଗ୍ରେସ ସହ୍ୟ କରିପାରୁନାହିଁ । ବଲାଙ୍ଗୀର ବିଧାୟକ ସରକାରଙ୍କ ସଫଳ ପ୍ରକଲ୍ପରେ ନିଜେ ବାହାବା ନେବାରେ ଲାଗିଛନ୍ତି । ଯେଉଁ ପ୍ରକଲ୍ପରେ ବିଧାୟକଙ୍କ କୌଣସି ସଂମ୍ପର୍କ ନାହିଁ ସେଥିରେ ରାତି ଅଧିଆ ଫଳକ ମାରି ବାହାବା ନେବାକୁ ବସିଛନ୍ତି । ବଲାଙ୍ଗୀରର ଦୁଇଟି ପ୍ରକଲ୍ପ ଯଥା ଲୋୟରସୁକତେଲ ଓ ବାଇପାସ ପ୍ରକଲ୍ପରେ କାହା ଛତ୍ରଛାୟା ତଳେ ଜମିମାଫିଆମାନେ ଜମି କିଣି ଜମି ଅଧିଗ୍ରହଣରେ ବାଧକ ସାଜିଥିଲେ ତାହା ଲୋକ ଜାଣିଛନ୍ତି ବୋଲି କଟାକ୍ଷ କରିଛନ୍ତି । ସେହିପରି ବଲାଙ୍ଗୀରର ସମଲେଶ୍ୱରୀ ମନ୍ଦିର ଭାଙ୍ଗିଗଲା ବେଳେ ରାଜପରିବାର ତରଫରୁ ଆମେ ୨ଲକ୍ଷ ଟଙ୍କା ମରାମତି ପାଇଁ ଦେଇଥିଲୁ । ମୁଖ୍ୟମନ୍ତ୍ରୀଙ୍କୁ ଅନୁରୋଧ କରି ୫ଟି ଉପକ୍ରମରେ ସମଲେଶ୍ୱରୀମନ୍ଦିର,ପାଟଣେଶ୍ୱରୀମନ୍ଦିର,ଗୋପାଳଜୀ ମନ୍ଦିର ଓ କୋସଳକଳାମଣ୍ଡଳ ପଡିଆ ପାଇଁ ଆସିଥିବା ଅନୁଦାନକୁ ନେଇ ବାହାବା ନେବାକୁ ରାତି ଅଧିଆ ଚୋରଙ୍କ ଭଳି କଂଗ୍ରେସ ମାର୍ବଲ ଲଗାଉଛି ବୋଲି କହିଛନ୍ତି । ବାକି ରହିଲା ଲୋୟରସୁକତେଲ ପ୍ରକଲ୍ପ । ଲୋୟରସୁକତେଲ ପ୍ରକଲ୍ପ ମୁଖ୍ୟମନ୍ତ୍ରୀଙ୍କର ଏକ ବଡ ଉପଲବ୍ଧୀ । ଏହି ପ୍ରକଲ୍ପ ଆଜି ଶେଷ ହୋଇ ଉଦଘାଟିତ ହୋଇଛି । ଚାଷିଙ୍କ ଜମିକୁ ପାଇପଲାଇନରେ ପାଣି ଦିଆଯିବାକୁ ଯୋରସୋର କାମ ଚାଲିଛି । ବିସ୍ଥାପିତଙ୍କ ତ୍ୟାଗରେ ହୋଇଥିବା ପ୍ରକଲ୍ପରେ ବିସ୍ଥାପିତଙ୍କୁ ଉଚିତ କ୍ଷତିପୂରଣ ଓ ଥଇଥାନ ପାଇଁ ସରକାର ବ୍ୟବସ୍ଥା କରୁଛନ୍ତି । କଂଗ୍ରେସନେତା ନିଜ ପରିବାର କଥା ଚିନ୍ତା କରି କରି ସମୟ ନାହିଁ ଅନ୍ୟ ପାଇଁ କଣ ଚିନ୍ତା କରିବେ ବୋଲି ପାଲଟା ଅଭିଯୋଗ କରିଛନ୍ତି । ରାଜ୍ୟ ସରକାର ବଲାଙ୍ଗୀର ଜିଲ୍ଲାର ବିକାଶ ପାଇଁ ଏତେ ପ୍ରକଲ୍ପ ଦେଇଛନ୍ତି ଯେ,ସେଥିରେ ବିରୋଧି ଛାନିଆଁ ହୋଇଗଲେଣି ବୋଲି କଳିକେଶ ଜବାବ ରଖିଛନ୍ତି ।