06-Jan-2024

ବଲାଙ୍ଗୀର, ୬ା୧- ବିଶିଷ୍ଟ ସାରସ୍ୱତ ସାଧକ, କବି ଓ କଥାକାର ପଦ୍ମଶ୍ରୀ ବିଦ୍ୟାବାଚସ୍ପତି ଡ. ଶ୍ରୀନିବାସ ଉଦ୍‌ଗାତାଙ୍କ ଶନିବାର ୯୦ତମ ଜୟନ୍ତୀ ରାଧାରାଣୀପଡା ସ୍ଥିତ କବିକୁଟୀର ଠାରେ ପାଳନ କରାଯାଇଥିଲା । ବହୁ ବିଶିଷ୍ଟ ବ୍ୟକ୍ତି, କବି ଓ ଲେଖକ, ସାହିତ୍ୟପ୍ରେମୀ ତାଙ୍କ ବାସଭବନକୁ ଯାଇ ତାଙ୍କୁ ଫୁଲତୋଡା, ଉପାୟନ ଦେଇ ସମ୍ବର୍ଦ୍ଧିତ କରିବା ସହ ଦୀର୍ଘ ନିରାମୟ ଜୀବନ କାମନା କରିଥିଲେ । ୯୦ ବର୍ଷ ବୟସରେ ମଧ୍ୟ ଡ. ଉଦ୍‌ଗାତା ସାରସ୍ୱତ ଜଗତରେ ସକ୍ରିୟ ରହିଛନ୍ତି । ଏଯାବତ୍ ସେ ୩୩୫ ଖଣ୍ଡ ଓଡିଆ, ହିନ୍ଦୀ, କୋଶଲୀ ଏବଂ ଇଂରାଜୀ ପୁସ୍ତକ ରଚନା ଓ ଅନୁବାଦ କରିସାରିଛନ୍ତି । ସାରସ୍ୱତ କୃତୀ ପାଇଁ ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଛି । ଏହାବାଦ୍ ସେ ଜାତୀୟ, ପ୍ରାଦେଶିକ ସ୍ତରରେ ଅଗଣିତ ସମ୍ମାନର ଅଧିକାରୀ ହୋଇଛନ୍ତି । ଆଜି ନାଟ୍ୟଭୂଷଣ ଜଗଦାନନ୍ଦ ଛୁରିଆ, କବି ଓ ନାଟ୍ୟକାର ବିଜୟ କୁମାର ତ୍ରିପାଠୀ, ଶିକ୍ଷାବିତ୍ ସନାତନ ଠାକୁର, ପ୍ରକାଶକ ଅଜିତ ମହାନ୍ତି, ସ୍ରୋତସ୍ବତୀ ପ୍ରକାଶନୀ ପକ୍ଷରୁ  ସନ୍ଦୀପ କୁମାର କୁଅଁର, ଜିଲା ପ୍ରଶାସନ ପକ୍ଷରୁ ସହାୟକ ଜିଲାପାଳ ଘନଶ୍ୟାମ ମୁଣ୍ଡ, ଜିଲା ସଂସ୍କୃତି ଅଧିକାରୀ ରଶ୍ମିରଞ୍ଜନ ମିଶ୍ର, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସରୋଜ କୁମାର ସାହୁ,କଳା ସଙ୍ଗଠକ ଗୋପାଳ ପ୍ରଧାନ, ପ୍ରେସ କ୍ଳବ୍ ସଭାପତି ଅରୁଣ ମିଶ୍ର,  ସୁଭାଷ ଚିନ୍ତନ ର ସଂପାଦକ ଲକ୍ଷ୍ମୀନାରାୟଣ ପଟ୍ଟନାୟକ, ରାଜୁ ଶର୍ମା, ବୀରେନ୍ଦ୍ର କୁମାର ଝାଙ୍କର, ପ୍ରଶାନ୍ତ ମହାକୁର, ସତ୍ୟନାରାୟଣ ବେହେରା ସ୍ମାରକୀ ଦାତବ୍ୟ ନ୍ୟାସର ସୁଧାକର ବେହେରା, ସାମ୍ବାଦିକ ଶରତ ଚନ୍ଦ୍ର ମିଶ୍ର , ଆଇନଜୀବୀ ଅସୀତ କୁମାର ଷଢଙ୍ଗୀଙ୍କ ସହ ବହୁ ସାହିତ୍ୟିକ ଓ ସଙ୍ଗଠକ ତାଙ୍କ ବାସଭବନକୁ ଯାଇ ତାଙ୍କୁ ଅଭିନନ୍ଦନ ଜଣାଇଥିଲେ । ରାଜ୍ୟ ତଥା ରାଜ୍ୟ ବାହାରୁ ବହୁ ସାହିତ୍ୟିକ ତାଙ୍କୁ ଫୋନ୍ ଯୋଗେ ଅଭିନନ୍ଦନ ଜଣାଇ ତାଙ୍କ ଦୀର୍ଘ ଓ ନିରାମୟ ଜୀବନ କାମନା କରିଥିଲେ । ଏହି ଅବସରରେ ପଦ୍ମଶ୍ରୀ ଡ ଉଦ୍‌ଗାତାଙ୍କ ସ୍ତ୍ରୀ କବୟିତ୍ରୀ ସୌଦାମିନୀ ଉଦ୍‌ଗାତା, ପୁଅ, ବୋହୂ, ନାତି ଓ ଅନ୍ୟ ପରିବାର ସଦସ୍ୟ ଉପସ୍ଥିତ ଥିଲେ ।