06-Jan-2024

ବିନିକା(ହିମାଂଶୁ ଶେଖର ପୁଟେଲ): ବିନିକା ସହରରେ ନୂତନ କରି ପ୍ରତିଷ୍ଠା ହେବାକୁ ଯାଉଥିବା ଜଗତ ଜନନୀ ମାଁ ଦୁର୍ଗାଙ୍କ ଭବ୍ୟ ମନ୍ଦିର ପ୍ରତିଷ୍ଠା ସମାରୋହରେ ଯୋଗଦେବାକୁ ଥିବା ଶ୍ରଦ୍ଧାଳୁ ଭକ୍ତଙ୍କ ମନୋରଞ୍ଜନ ସକାଶେ ମହିଷାସୁର ଦରବାର ଅନୁଷ୍ଠିତ ହେବ । ଏଥିପାଇଁ ଆଜି ଅପରାହ୍ନରେ ପୁରୁଣା ବସଷ୍ଟାଣ୍ଡ ଦୁର୍ଗାପୂଜା କମିଟି ତରଫରୁ ମହିଷାସୁର ବରଣ କାର୍ଯ୍ୟକ୍ରମ ବେଶ ଉତ୍ସାହ ଉଦ୍ଦୀପନା ମଧ୍ୟରେ ସମ୍ପନ୍ନ ହୋଇଛି ।ସୂଚନା ଯୋଗ୍ୟ ଯେ ବିନିକା ସହର ମଧ୍ୟମ ସ୍ଥଳ ପୁରୁଣା ବସଷ୍ଟାଣ୍ଡ ପରିସରରେ ଦୀର୍ଘ ୫୨ବର୍ଷ ଧରି ମାଁ ଶକ୍ତିରୁପାଙ୍କ ପୂଜା ମହାସମାରୋହରେ ଅନୁଷ୍ଟିତ ହୋଇ ଆସୁଥିଲା ।କମିଟି କର୍ମକର୍ତ୍ତା ଓ ଅଞ୍ଚଳ ବାସୀଙ୍କ ସହଯୋଗ କ୍ରମେ ଦେବୀ ଦୁର୍ଗାଙ୍କ ମନ୍ଦିର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଛି ।ଚଳିତ ମାସ ୧୫ତାରିଖରୁ ୨୪ତାରିଖ ପର୍ଯ୍ୟନ୍ତ ମାଁ ଦେବୀ ଦୁର୍ଗାଙ୍କ ମନ୍ଦିର ପ୍ରତିଷ୍ଠା ଉତ୍ସବ ଅନୁଷ୍ଠିତ ହେବ।ଦେବୀଙ୍କ ଦର୍ଶନ ପାଇଁ

ଲକ୍ଷାଧିକ ଶ୍ରଦ୍ଧାଳୁ ଭକ୍ତଙ୍କ ସମାଗମ ହେବାର ଆଶଙ୍କା ରହିଛି । ଆଧ୍ୟାତ୍ମିକ ପରିବେଶ କୁ ସରଗରମ କରିବା ସହିତ ଶ୍ରଦ୍ଧାଳୁ ଭକ୍ତଙ୍କ ମନୋରଂଜନ ପାଇଁ ଆଜି ପୂଜା କମିଟି ସଭାପତି ସନ୍ତୋଷ କୁମାର ପଣ୍ଡାଙ୍କ ନେତୃତ୍ୱରେ କମିଟି କର୍ମକର୍ତ୍ତା ଓ ଅଞ୍ଚଳବାସୀ ଏକ ବାଇକ ଶୋଭାଯାତ୍ରାରେ ଅନ୍ତର୍ଡ଼ା ଗ୍ରାମକୁ ପହଞ୍ଚିଥିଲେ । ସ୍ଥାନୀୟ ଗ୍ରାମ୍ୟ ମଣ୍ଡପ ଠାରେ ଆୟୋଜିତ ବର୍ଣ୍ଣାଢ଼୍ୟ ଉତ୍ସବରେ ବ୍ରାହ୍ମଣ ମାନଙ୍କ ଦ୍ଵାରା ଶ୍ଳୋକ ପଠନ କରାଯାଇଥିଲା।ପରେ ପୂଜା କମିଟି ତଥା ଅଞ୍ଚଳ ବାସୀଙ୍କ ତରଫରୁ ସୁନିଲ କୁମାର ପାତ୍ର ମହିଷାସୁର ଭୂମିକାରେ ଅଭିନୟ କରୁଥିବା ଦୁର୍ଦ୍ଦାନ୍ତ ଖଳନାୟକ ତଥା ଅଭିନେତା ଗୋପାଳ ପଣ୍ଡାଙ୍କୁ ଉପଡ଼ୋକନ ଦେଇ ବରଣ କରିଥିଲେ ।ଏହି ଅବସରରେ ମହିଷାସୁର ପରିବାର ତରଫରୁ ନିମନ୍ତ୍ରଣ ପାଇଁ ଆସିଥିବା ଅତିଥି ମାନଙ୍କୁ ଆତିଥ୍ୟ ସତ୍କାର କରାଯାଇଥିଲା ।