18-Dec-2020

(ପ୍ରେରଣା ଖବର) କଟକ: ରାଜ୍ୟର ବିଭିନ୍ନ ଜିଲ୍ଲାରେ ଅନୁସୂଚିତ ଜାତି ଓ ଜନଜାତି ବର୍ଗର ଲୋକଙ୍କ ଜମି ଚଞ୍ଚକତା କରି ହଡ଼ପ କରାଯାଉଛି। ଏହି ଜମି ବହୁ କମ୍ ମୂଲ୍ୟରେ କ୍ରୟ କରିବା ପରେ ଉଚ୍ଚ ଦରରେ ବିକ୍ରି କରି କେତେକ ବ୍ୟକ୍ତି ମାଲାମାଲ୍ ହେଉଛନ୍ତି। ଏଭଳି ଅଭିଯୋଗ ନେଇ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ ହୋଇଛି। ସମ୍ବଲପୁରର ସମାଜସେବୀ କ୍ଷୀରୋଦ ଚନ୍ଦ୍ର ମଲ୍ଲିକଙ୍କ ପକ୍ଷରୁ ଦାୟର ଜନସ୍ବାର୍ଥ ମାମଲାରେ ଦର୍ଶାଯାଇଛି ଯେ ରାଜ୍ୟରେ କେତେକ ଜିଲ୍ଲାରେ ଶିଳ୍ପ କ୍ଷେତ୍ରରେ ଉନ୍ନତି ହେଉଛି। ଶିଳ୍ପ ପ୍ରତିଷ୍ଠା ପାଇଁ ବିଭିନ୍ନ ସଂସ୍ଥା ଜମି ଅଧିଗ୍ରହଣ କରୁଛନ୍ତି। ଏହି ଉଦ୍ଦେଶ୍ୟରେ ଚାଷ ଜମି ସବୁ ଅଧିଗ୍ରହଣ କରାଯାଉଛି। ଏଭଳି ଅଧିଗ୍ରହଣ ସଂପର୍କରେ ଜାଣିବା ପରେ ବହୁ ପ୍ରଭାବଶାଳୀ ବ୍ୟକ୍ତି ଅନୁସୂଚିତ ଜାତି ଓ ଜନଜାତି ବର୍ଗର ଲୋକଙ୍କ ଜମିକୁ ସାଧାରଣ ମୂଲ୍ୟ ଦେଇ ପ୍ରଥମେ କିଣି ନେଉଛନ୍ତି। ଏହାପରେ ଶିଳ୍ପ ପାଇଁ ଭୂମି ଅଧିଗ୍ରହଣ ସମୟରେ ଚଢ଼ା ଦରରେ ଏହି ଜମି ସବୁ ସଂପୃକ୍ତ ବ୍ୟକ୍ତି ବିକ୍ରି କରି ମାଲାମାଲ୍ ହେଉଛନ୍ତି। ଜମିର ମୂଳ ମାଲିକ ଥିବା ଅନୁସୂଚିତ ଜା‌ତି ଓ ଜନଜାତି ବର୍ଗର ଲୋକ କିନ୍ତୁ କିଛି ଫାଇଦା ପାରୁ ନାହାନ୍ତି। ଅନୁସୂଚିତ ଜାତି ଓ ଜନଜାତିର ଲୋକ ଅତି ସରଳ ହୋଇଥିବାବେଳେ ଏଭଳି ଘଟଣା ସଂକ୍ରାନ୍ତରେ ଅବଗତ ନୁହନ୍ତି। ଏଭିଳି ସ୍ଥିତିର ଫାଇଦା ନେଇ ଅନେକ ପ୍ରଭାବଶାଳୀ ବ୍ୟକ୍ତି ଓ ଦଲାଲ ବହୁ ଟଙ୍କା ରୋଜଗାର କରୁଛନ୍ତି। କିନ୍ତୁ ଜମି ହରାଉଥିବା ଅନୁସୂଚିତ ଜାତି ଓ ଜନଜାତି ବର୍ଗର ବ୍ୟକ୍ତି ଏହି ଅର୍ଥ ପାଇ ପାରୁନାହାନ୍ତି। ଶିଳ୍ପ ପାଇଁ ସେମାନଙ୍କ ଜମି ବ୍ୟବହାର ହେଉଥିବା ବେଳେ ସେମାନେ ଉପଯୁକ୍ତ କ୍ଷତିପୂରଣ ଓ ଥଇଥାନ ସୁବିଧାରୁ ମଧ୍ୟ ବଞ୍ଚିତ ହେଉଛନ୍ତି। ଅନୁସୂଚିତ ଜାତି ଓ ଜନଜାତି ଲୋକଙ୍କ ଜମି ଅନ୍ୟ ଅନ୍ୟ ବର୍ଗର ଲୋକ କିଣିବା ପୂର୍ବରୁ ଜିଲ୍ଲା ପ୍ରଶାସନର ଅନୁମତି ଆବଶ୍ୟକ। କିନ୍ତୁ ଅନେକ କ୍ଷେତ୍ରରେ ଏଭଳି ଅନୁମତି ଚଞ୍ଚକତା କରି ନିଆଯାଉଛି। ଆଉ କେତେକ କ୍ଷେତ୍ରରେ ପ୍ରଭାବଶାଳୀ ବ୍ୟକ୍ତିମାନେ ସେମାନଙ୍କ କର୍ମଚାରୀଙ୍କ ଦ୍ବାରା ଏପରି ଜମି କିଣି ନେଉଛନ୍ତି। ଅନୁସୂଚିତ ଜାତି ଓ ଜନଜାତି ବର୍ଗର ଲୋକଙ୍କ ଜମି ବିକ୍ରି ବେଳେ ଆଇନରେ ଥିବା ବ୍ୟବସ୍ଥାକୁ କଡ଼ାକଡ଼ି ଲାଗୁ କରାଯାଉ ନାହିଁ। ଫଳରେ ବହୁ ଗରିବ ଲୋକ ଜମି ହରାଉଛନ୍ତି ଓ ଉପଯୁକ୍ତ ଅର୍ଥ ପାଇ ପାରୁନାହାନ୍ତି। ସେମାନଙ୍କ ଜମି ଶିଳ୍ପ ପାଇଁ ଅଧିଗ୍ରହଣ ହୋଉଥିବା ବେଳେ କ୍ଷତିପୂରଣ ରାଶି ଅନ୍ୟମାନେ ନେଇ ଯାଉଛନ୍ତି। ଏଭଳି ସ୍ଥିତିରେ ଅନୁସୂଚିତ ଜାତି ଓ ଜନଜାତିଙ୍କ ଜମିର ସୁରକ୍ଷା ପାଇଁ ଉପଯୁକ୍ତ ପଦକ୍ଷେପ ନିଆଯିବା ଆବଶ୍ୟକ। ଗତ ୫ ବର୍ଷର ଅନୁସୂଚିତ ଜାତି ଓ ଜନଜାତିଙ୍କ ନିକଟରୁ ଜମି କ୍ରୟ ସଂପର୍କିତ ବିକ୍ରି କବଲା ତଥ୍ୟ ଦାଖଲ ପାଇଁ ହାଇକୋର୍ଟ ସରକାରଙ୍କୁ ନିର୍ଦ୍ଦେଶ ଦିଅନ୍ତୁ। ଏଥି ସହିତ ଭୂମି ଅଧିଗ୍ରହଣ କ୍ଷତିପୂରଣ ସଂପର୍କିତ ନିୟମାବଳୀ କାର୍ଯ୍ୟକାରୀ ପ୍ରସଂଗରେ ସରକାରଙ୍କ ନିକଟରୁ ଜବାବ ତଲବ କରାଯାଉ ବୋଲି ଆବେଦନକାରୀ ଦର୍ଶାଇଛନ୍ତି। ମାମଲାରେ ରାଜ୍ୟ ଅନୁସୂଚିତ ଜନଜାତି ଓ ଜାତି ଉନ୍ନୟନ ବିଭାଗ, ଗୃହ ବିଭାଗ, ସମ୍ବଲପୁର, ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, ଯାଜପୁର, ଅନୁଗୁଳ, ଢେଙ୍କାନାଳ, ରାୟଗଡ଼ା, ଗଞ୍ଜାମ ଜିଲ୍ଲାପାଳଙ୍କୁ ପକ୍ଷଭୁକ୍ତ କରାଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଆଶିଷ କୁମାର ମିଶ୍ର ମାମଲା ପରିଚାଳନା କରୁଛନ୍ତି।