08-Dec-2023

ବଲାଙ୍ଗୀର/ଟିଟିଲାଗଡ,୭ା୧୨-ଆୟକର ଫାଙ୍କି ଅଭିଯୋଗରେ ବୁଧବାର ଦିନଠାରୁ ବଳଦେବ ସାହୁ ଓ କମ୍ପାନୀଙ୍କ ମଦବ୍ୟବସାୟିକ ପ୍ରତିଷ୍ଠାନ ଉପରେ ଆୟକର ଚଢାଉ ଚାଲିଛି । ବୁଧବାର ଦିନ ଦିଲ୍ଲୀ,ରାଞ୍ଚି,ଭୁବନେଶ୍ୱର,ବୌଦ୍ଧ,ସମ୍ବଲପୁର,ବଲାଙ୍ଗୀର ଓ ଟିଟିଲାଗଡର ବିଭିନ୍ନ ସ୍ଥାନରେ ଆୟକର ବିଭାଗର ଟିମମାନେ ଚଢାଉ କରିଥିଲେ । ବୌଦ୍ଧ ଡିଷ୍ଟିଲାରୀ ପ୍ରାଇଭେଟ ଲିମିଟେଡ ଓ ଏହାର ସହଯୋଗୀଙ୍କ ଘରେ ଚଢାଉ ଆଜି ମଧ୍ୟ ଚାଲୁରହିଛି । ଗତକାଲି ବଲାଙ୍ଗୀର ସୁଦପଡା ଦେଶୀ ମଦଭାଟିରୁ ବିପୁଳ ପରିମାଣର ୫୦୦ଟଙ୍କିଆ ନୋଟ ଭର୍ତ୍ତି ଆଲମିରା ଜବତ ହୋଇଥିଲା । ଏଠାରେ ପ୍ରାୟ ୨୦୦କୋଟି ଟଙ୍କା ଥିବା ଅନୁମାନ କରାଯାଉଛି । ସେହି ଟଙ୍କାକୁ ଆୟକର ବିଭାଗ ଜବତ କରି ରାତିରେ ବସ୍ତାରେ ଭର୍ତ୍ତିକରି ଟ୍ରକଲୋଡରେ ବଲାଙ୍ଗୀର ଷ୍ଟେଟବ୍ୟାଙ୍କକୁ ନେଇଥିଲେ । ପ୍ରଥମେ ତିନିଟି ଟଙ୍କା ଗଣତି ମେସିନରେ ନୋଟକୁ ଗଣାଯାଉଥିବା ବେଳେ ଆଜି ମୋଟ ୬ଟି ମେସିନରେ ନୋଟ ଗଣତି ଚାଲିଛି । ୧୦ଜଣ କର୍ମଚାରୀ ଏହି ନୋଟକୁ ଗଣୁଛନ୍ତି । ଆୟକର ବିଭାଗ ସୁଦପଡା ଭାଟି ଦାୟୀତ୍ୱରେ ଥିବା ମ୍ୟାନେଜର ରାଜେଶ ସାହୁ ଓ ବଣ୍ଟି ସାହୁଙ୍କୁ ନେଇ ପଚରାଉଚୁରା କରୁଛି । ଆଜି ଦ୍ୱିତୀୟଦିନରେ ମଧ୍ୟ ସୁଦପଡା ଭାଟି ଓ କ୍ଲବପଡାରେ ଥିବା ଭୋଲା ସାହୁଙ୍କ ଘରେ ଆୟକର ବିଭାଗ ଚଢାଉ କରୁଛି । ଆନେକ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରାଯାଇଥିବା କୁହାଯାଉଛି । ସେହିପରି ଟିଟିଲାଗଡରେ

ବୁଧବାରଠାରୁ ନେହେରୁନଗର ସ୍ଥିତ ମଦବ୍ୟବସାୟୀ ଦୀପକ ସାହୁ ଓ ତାଙ୍କ ଭାଇ ସଂଜୟ ସାହୁଙ୍କ ଘରେ ଚଢାଉ କରୁଛି । ବୁଧବାର ଦିନ ସଂଜୟ ସାହୁଙ୍କ ଘରୁ ପ୍ରାୟ ୨୦କୋଟି ଟଙ୍କା ଜବତ କରିଥିବା ଏକ ବିସ୍ୱସ୍ତ ସୂତ୍ରରୁ ଜଣାପଡିଛି । ବଲାଙ୍ଗୀର ଜିଲ୍ଲା ସମେତ କଳାହାଣ୍ଡି,ସୋନପୁର,ବୌଦ୍ଧ ଜିଲ୍ଲାରେ ଏହିକମ୍ପାନୀର ଦେଶୀମଦ ଭାଟି ଚାଲୁଛି । ସରକାରଙ୍କୁ ଟିକସ ଫାଙ୍କି ମଦବ୍ୟବସାୟୀ ହଜାର ହଜାର କୋଟି ଟଙ୍କାର ଲାଭବାନ ହେଉଛି । ଏବେ କେବଳ ଆୟକର ଫାଙ୍କିର ତଦନ୍ତ ବେଳେ ବଲାଙ୍ଗୀର ଭଳି ସ୍ଥାନରେ ୨୦୦କୋଟି ନଗତ କେସ ଜବତ ହେବା ଘଟଣା ଲୋକଙ୍କ ମଧ୍ୟ ଆଲୋଚନାର ବିଷୟ ହୋଇଛି । ସରକାରୀ ବ୍ୟବସ୍ଥା ଭିତରେ ଗଳାବାଟ ଖୋଲି ସରକାରଙ୍କ ଆଖିରେ ଧୂଳି ପକାଇ କୋଟି କୋଟି ଟଙ୍କାର ରାଜସ୍ୱ ହଡପ କରୁଥିବା ସ୍ପଷ୍ଟ ହୋଇଛି । ଆୟକର ବିଭାଗର ୩୦ଜଣିଆ ଟିମ ଆଜି ମଧ୍ୟ ଚଢାଉ ଜାରିରଖିଛନ୍ତି । ତେବେ ଭିତରେ କଣ ସବୁ ଚାଲିଛି ସେନେଇ କେହି ଗଣମାଧ୍ୟମକୁ ବିଶେଷ ସୂଚନା ଦେଉନାହାଁନ୍ତି । ଆଜି ବଲାଙ୍ଗୀର,ଟିଟିଲାଗଡ,ବୌଦ୍ଧ,ସମ୍ବଲପୁର ଓ ରାଉରକେଲାରେ ଚଢାଉ ଚାଲୁରହିଥିବା ଜଣାଯାଇଛି ।