03-Dec-2023

ବୀରମହାରାଜପୁର,( ବିନୋଦ ପାଣ୍ଡେ ): ମଦମୃତ୍ୟୁ ଭଲି ଅଘଟଣ ରୋକିବାକୁ ପ୍ରଶାସନ ପକ୍ଷରୁ ଦେଶି ମଦ ଭାଟି ମାନଙ୍କ ପାଇଁ ଏକ ଗାଇଡଲାଇନ ପ୍ରସ୍ତୁତ କରିଛନ୍ତି। ଏହି ଗାଇଡ ଲାଇନ ଅନୁଯାୟୀ ଲାଇସେନ୍ସ ପ୍ରାପ୍ତ ମଦଭାଟି ରୁ ତିଆରି ମଦ କେବଳ ସିଲ ପଲିଥିନ ପ୍ୟାକେଟ ବିକ୍ରି ହେବ। ଏହା ସହ ମୁଖ୍ୟ ଦୋକାନରୁ ଶାଖା ଦୋକାନକୁ ପଠାଇବା ବେଳେ ଦୋକାନର ନାମ, ମଦ ପ୍ରସ୍ତୁତି ହେବାର ତାରିଖ ପ୍ରସ୍ତୁତି କର୍ତ୍ତାଙ୍କ ନାମ , ଅବକାରୀ ଅଧିକାରୀଙ୍କ ଠାରୁ ମିଳିଥିବା କୋଡ଼ ନମ୍ବର ଓ ଚିହ୍ନଟ ମାର୍କ ଆଦି ଉଲ୍ଲେଖ କରିବା ସହ ପ୍ୟାଙ୍କିର ପନ୍ଦର ଦିନ ମଧ୍ୟରେ ବ୍ୟବସାୟ କରିବାକୁ ନିର୍ଦ୍ଦେଶ ରହିଛି। ଯଦି ବିକ୍ରି ନହେଲେ ତେବେ ପନ୍ଦର ଦିନ ମଧ୍ୟରେ ଉକ୍ତ ମଦକୁ ନଷ୍ଟ କରାଯାଇ ତା' ଉପରେ ପ୍ରମାଣ ପତ୍ର ଦେବାର ନିର୍ଦ୍ଦେଶ ରହିଛି।  ଏସବୁ ବ୍ୟବସ୍ଥାକୁ ତଦାରଖ କରିବାକୁ ଅବକାରୀ ବିଭାଗର ଜଣେ ସବ ଇନ୍ସପେକ୍ଟର ରେଙ୍କର ଅଧିକାରୀ ନିୟମିତ ବ୍ୟବଧାନରେ ତଦାରଖ କରିବା କଥା। ହେଲେ ବୀରମହାରାଜପୁର, ଲୁତୁରପଙ୍କ , ପିତାମହୁଲ, ସୁବଳୟା, ଖଣ୍ଡହତା,ମୁର୍ଷୁଣ୍ଢୀ ଓ ଉଫୁଲା  ଅଞ୍ଚଳରେ ଏହାର ଖୋଲାଖୋଲି ଉଲଂଘନ କରି ମଦ ବେପାର ଚାଲିଛି।  ଦେଶୀ ମଦ ଭାଟି ମାନଙ୍କରୁ ପ୍ରସ୍ତୁତି ହେଉଥିବା ମଦ ପ୍ୟାକେଟ ରେ ପ୍ରସ୍ତୁତି ତାରିଖ, ବ୍ୟାଚ ନମ୍ବର , ପ୍ୟାକିଙ୍ଗ ତାରିଖ ପ୍ରସ୍ତୁତି କର୍ତ୍ତାଙ୍କ ଠିକଣା ଆଦି କୈାଣସି ତଥ୍ୟ ଉଲ୍ଲେଖ କରାଯାଉ ନାହିଁ। ମଦର କୈାଣସି ସଠିକ ଦର ମଧ୍ୟ ନିର୍ଦ୍ଧାରଣ କରାଯାଇନାହିଁ। ଯାହା ଫଲରେ ଉକ୍ତ ଅଞ୍ଚଳର ମଦ ଭାଟି ମାଲିକ ମାନେ ମନ ଇଚ୍ଛା ଦର ନେଉଥିବା ଅଭିଯୋଗ ହୋଇଛି। ବୀରମହାରାଜପୁର  ଭାଟିରୁ ବିଭିନ୍ନ ଗ୍ରାମକୁ ମଦ ଆସୁଛି । ସେହିପରି  ପିତାମହୁଲ ଭାଟିରୁ ସୁବଳୟା ଓ ଲୁତୁରପଙ୍କ ମଦ ଭାଟି ରୁ ଖଣ୍ଡହତା ବ୍ରାଞ୍ଚକୁ ମଦ ଆସିବା ସହ ବିଭିନ୍ନ ଗ୍ରାମକୁ ମଦ ଚୋରାଚାଲାଣ ହେଉଛି । ଏବଂ ଏଠାରେ ବିକ୍ରି ହେଉଥିବା ଖୋଳା ମଦ ଓ ପାଉଚ ମଦରେ କୈାଣସି ତଥ୍ୟ ନଦେବାର କାରଣ ସଂପର୍କରେ ଉକ୍ତ ଭାଟି ମ୍ୟାନେଜର ଙ୍କୁ ପଚାରିବାରୁ ଐସା ଚଲତା ହେ ସବ ଜାନତେ ହେଁ ବୋଲି କହିଥିଲେ। ବୀରମହାରାଜପୁର ଅବକାରୀ ଅଧିକାରୀଙ୍କୁ ଯୋଗାଯୋଗ କରାଯିବାରୁ ସମ୍ଭବପର ହୋଇପାରିନାହିଁ। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ବିହିତ ପଦକ୍ଷେପ ନେବାକୁ ଦାବି ହେଉଛି।