21-Nov-2023

ବୀରମହାରାଜପୁର,( ବିନୋଦ ପାଣ୍ଡେ ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଉଫୁଲା ପଞ୍ଚାୟତର ଅନ୍ତର୍ଗତ ଟିଠିପାଲି ଠାରେ ଏକ ନୂତନ ପଞ୍ଚମୁଖୀ ହନୁମାନ ବିଗ୍ରହଙ୍କ ପ୍ରାଣ ପ୍ରତିଷ୍ଠା ପାଇଁ ସୋମବାର କଳସ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ମହାନଦୀ ପଠାରେ ଗଙ୍ଗା ମାତାଙ୍କ ଆବାହନ କରି ରୀତିନୀତି ପୂଜାର୍ଚ୍ଚନା କରାଯାଇଥିଲା। ବହୁ ସଂଖ୍ୟକ ମହିଳା ପୁରୁଷ ପୂର୍ଣ୍ଣ କଳସି ଧରି  ଘଣ୍ଟ, ଶଙ୍ଖ ଓ ସଙ୍କୀର୍ତ୍ତନ ସହ ଏକ ଆଧ୍ୟାତ୍ମିକ ପରିବେଶରେ ନଗର ପରିକ୍ରମା କରି ପୂଜା ମଣ୍ଡପ ସ୍ଥାପନ କରିଥିଲେ । ଏଥିରେ ପୂଜକ ରତନ ନନ୍ଦ, ପୂର୍ଣ୍ଣ ଚନ୍ଦ୍ର ମିଶ୍ର, ଗୋପାଳ ନନ୍ଦ ପୂଜା କାର୍ଯ୍ୟ ତୁଲାଇଥିବା ବେଳେ  ରାଜ କୁମାର ପାତ୍ର ଓ ଧର୍ମପତ୍ନୀ, ବେଲାରସେନ ପାତ୍ର ଓ ଧର୍ମପତ୍ନୀ ସୁରୁଖୁରୁରେ କର୍ତ୍ତା ଦାଇତ୍ୱ ତୁଲାଇଥିଲେ।ମଙ୍ଗଳବାର ଏଠାରେ ପଞ୍ଚମୁଖୀ ହନୁମାନ ବିଗ୍ରହଙ୍କ ପ୍ରାଣ ପ୍ରତିଷ୍ଠା, ତୁଳସୀ ରାମାୟଣ ପାରାୟଣ ସହ ସାମୁହିକ ହନୁମାନ ଚାଳିଶା ପାଠ ଓ ପରମେଶ୍ବର ମଲ୍ଲିକଙ୍କ ଦ୍ଵାରା ପ୍ରବଚନ କାର୍ଯ୍ୟକ୍ରମ ରହିଛି। ବୁଧବାର ଅନ୍ତିମ ଦିନରେ ସାମୁହିକ ଦୀପଯଜ୍ଞ ଓ ତୁଳସୀ ରାମାୟଣ ପାରାୟଣ ସହ କୁସ୍ତି ପ୍ରଦର୍ଶନ କରାଯିବାର କାର୍ଯ୍ୟକ୍ରମ ରହିଛି। ଏଥିରେ ମନ୍ଦିର ପରିଚାଳନା କମିଟି ସଦସ୍ୟଙ୍କ ସହ ସୁବ୍ରତ ପାତ୍ର,ପ୍ରୀୟବ୍ରତ ଅମାତ,ମଳୟ ଅମାତ, ମଣ୍ଟୁ ପାତ୍ର, ଚନ୍ଦନ ପାତ୍ର ଓ ଗ୍ରାମବାସୀ ସହଯୋଗ କରିଥିଲେ।