21-Nov-2023

ବଲାଙ୍ଗିର(ଚିତ୍ରସେନ ବେହେରା)- ବଲାଙ୍ଗିର ଜିଲ୍ଲା ପୁଇଁନ୍ତଲା ବ୍ଲକ ଅନ୍ତର୍ଗତ ଗ୍ରାମ ପଂଚାୟତ ଉଚ୍ଚ ବିଦ୍ୟାଳୟ ଛତାପିପଲ ରେ ଏକ ସମ୍ବର୍ଦ୍ଧନା ସଭା ଆୟୋଜିତ ହୋଇଯାଇଛି । ବିଦ୍ୟାଳୟର ବିଜ୍ଞାନ ଶିକ୍ଷକ କୃଷ୍ଣଚନ୍ଦ୍ର ନାଏକ ଭାରତ ସରକାରଙ୍କ ବିଜ୍ଞାନ ପ୍ରଯୁକ୍ତି ଓ ଯୋଗାଯୋଗ ବିଭାଗ ଦ୍ୱାରା ପରିଚାଳିତ ଜାତୀୟ ଶିଶୁ ବିଜ୍ଞାନ କଂଗ୍ରେସ ର ରାଜ୍ୟ ସ୍ତରୀୟ କାର୍ଯ୍ୟକ୍ରମ ଯାହା ଭୁବନେଶ୍ୱର ର ଡୁନ୍ ଇଣ୍ଟରନେସନାଲ ସ୍କୁଲ ଠାରେ ତା.୧୮.୧୧.୨୩ ରୁ ୧୯.୧୧.୨୩ ରେ ଅନୁଷ୍ଠିତ ହୋଇଥିଲା, ତାଙ୍କ ଦୀର୍ଘ ଦିନ ଧରି ବିଜ୍ଞାନ ପ୍ରତି ନିଜର ସମର୍ପିତ କାର୍ଯ୍ୟ ପାଇଁ ରାଜ୍ୟ ପୁରସ୍କାର ସମ୍ମାନରେ ସମ୍ମାନିତ କରାଯାଇଛି । ତେଣୁ ତାଙ୍କୁ ପରିଚାଳନା କମିଟି ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ସୂଚନାଯୋଗ୍ୟ ଯେ ଶ୍ରୀ ନାଏକଙ୍କ ମାର୍ଗ ଦର୍ଶନ ରେ ବିଦ୍ୟାଳୟର ୧୨ ଜଣ ଛାତ୍ରଛାତ୍ରୀ ରାଜ୍ୟସ୍ତରୀୟ, ୩ ଜଣ କଲିକତାରେ ଅନୁଷ୍ଠିତ ପୂର୍ବ ଭାରତୀୟ ବିଜ୍ଞାନ ମେଳା ଓ ୨ ଜଣ ଛାତ୍ର ଭୋପାଳ ଓ ଗାନ୍ଧୀନଗର ରେ ଅନୁଷ୍ଠିତ ସର୍ବ ଭାରତୀୟ ବିଜ୍ଞାନମେଳାରେ ଯୋଗଦାନ କରିପାରିଛନ୍ତି । କେବଳ ନିଜ ବିଦ୍ୟାଳୟ ନୁହେଁ ତାଙ୍କ ତତ୍ୱାବଧାନରେ ମଲମୁଣ୍ଡା ଉଚ୍ଚ ବିଦ୍ୟାଳୟ, କେନ୍ଦ୍ରୀୟ ବିଦ୍ୟାଳୟ ବଲାଙ୍ଗିରର ଛାତ୍ର ଛାତ୍ରୀମାନେ ମଧ୍ୟ ସଫଳତା ହାସଲ କରିଛନ୍ତି । ସେ ବର୍ତ୍ତମାନ ପୁଇଁନ୍ତଲା ବ୍ଲକ ବିଜ୍ଞାନ ସଂଯୋଜକ ଭାବେ ଦାୟିତ୍ୱ ତୁଳାଉଛନ୍ତି । ତାଙ୍କ ସଫଳତା ପାଇଁ ବ୍ଲକ ଶିକ୍ଷା ଅଧିକାରୀ ଲୋକନାଥ ସୁନା, ଜିଲ୍ଲା ବିଜ୍ଞାନ ନିରୀକ୍ଷକ ରାଜେଶ ମିଶ୍ର, ଜିଲ୍ଲା ସଂଯୋଜକ ଆନନ୍ଦ ବଡପଣ୍ଡା, ପ୍ରଧାନ ଶିକ୍ଷକ ଭାଗିରଥୀ ବାଗ, ଶିକ୍ଷକ ଗୋବିନ୍ଦ ପଟେଲ, ଗୋବିନ୍ଦ ଥାଟି ଓ ଅନ୍ୟ ଶିକ୍ଷକ, ଅଭିଭାବକ ତଥା ଜିଲ୍ଲାର ବିଭିନ୍ନ ବିଦ୍ୟାଳୟର ଶିକ୍ଷକବୃନ୍ଦ ଶୁଭେଚ୍ଛା ଜଣାଇଛନ୍ତି ।