21-Nov-2023

ବଲାଙ୍ଗୀର-ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକ,ସଦରବ୍ଲକ ଅଞ୍ଚଳର ଚାଷି ଦୀର୍ଘ ୨୦ବର୍ଷ ହେଲା ଦାବି କରୁଥିବା ସୋନଗଡ ଜଳସେଚନ ପ୍ରକଲ୍ପ ଶେଷରେ ଅନୁମୋଦିତ ହୋଇଛି । ରାଜ୍ୟସରକାର ସୋନଗଡ ନଦୀରେ ସିକୁଆଁ-ସିଲେଟକାନୀଠାରେ ୪୯କୋଟି ଟଙ୍କାର ଏକ ଭୂତଳ-ଜଳସଂରକ୍ଷଣ ପ୍ରକଲ୍ପ କରିବାକୁ ଅନୁମୋଦନ କରିଛନ୍ତି । ଏହା ସହିତ ଏଠାରେ ୫୬କୋଟି ଟଙ୍କାର ଏକ ମେଗା ଉଠାଜଳସେଚନ ପ୍ରକଲ୍ପ ମଧ୍ୟ ହେବାକୁ ଯାଉଛି । ଏହି ଘଟଣା ଜଣାପଡିବା ପରେ ଚାଷିଙ୍କ ମଧ୍ୟରେ ଖୁସି ଦେଇଛି । ଆଜି ଦେଓଗାଁ ନିକଟସ୍ଥ ସୋନଗଡ ନଦୀଖଣ୍ଡିରେ ସୋନଗଡ କ୍ରୀୟାନୁଷ୍ଠାନ କମିଟି ଓ ଦେଓଗାଁ ତଥା ସଦର ବ୍ଲକର ଶତାଧିକ ଚାଷି ସମ୍ମିଳିତ ହୋଇ ରାଜ୍ୟସରକାରଙ୍କୁ କୃତଜ୍ଞତା ଜଣାଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫ଟି ଅଧ୍ୟକ୍ଷ ଭି.କେ.ପାଣ୍ଡିଆନଙ୍କୁ ଚାଷିମାନେ ଧନ୍ୟବାଦ ଜଣାଇଛନ୍ତି ।  ଗତ ଅଗଷ୍ଟମାସରେ ଦେଓଗାଁ ବ୍ଲକ ଜରାସିଂହାକୁ ୫ଟି ସଚିବ ତଥା ବର୍ତ୍ତମାନର ୫ଟି ଅଧ୍ୟକ୍ଷ ଭିକେ ପାଣ୍ଡିଆନଙ୍କ ଗସ୍ତ ସମୟରେ ଏହି ଅଞ୍ଚଳର ଚାଷିମାନେ ଲିଖିତ ଭାବରେ ଏହି ପ୍ରକଲ୍ପ ପାଇଁ ଦାବି ଜଣାଇଥିଲେ । ଏହା ପରେ ବିଜେଡିର ବରିଷ୍ଠନେତା ଅନଙ୍ଗଉଦୟ ସିଂଦେଓ,ପୂର୍ବତନ ସାଂସଦ କଳିକେଶନାରାୟଣ ସିଂଦେଓ,ଜଳସମ୍ପଦ ବିଭାଗର ମନ୍ତ୍ରୀ ଟୁକୁନୀ ସାହୁ,ମୁଖ୍ୟମନ୍ତ୍ରୀଙ୍କ ମୁଖ୍ୟପରାମର୍ଶଦାତା ଅସୀତ ତ୍ରୀପାଠୀ,ବିଜେଡିର ସାଧାରଣ ସଂପାଦକ ପ୍ରଣବପ୍ରକାଶ ଦାସ,ଜିଲ୍ଲା ପର୍ଯ୍ୟବେକ୍ଷକ ସୁଶାନ୍ତ ସିଂ,ଯୁବନେତା ଅର୍କେଶନାରାୟଣ ସିଂଦେଓ ମୁଖ୍ୟମନ୍ତ୍ରୀଙ୍କ ଦପ୍ତର ସହିତ ଯୋଗାଯୋଗ ରଖି ଆଲୋଚନା କରିଥିଲେ । ଏହା ସହିତ ରାଜ୍ୟସରକାରଙ୍କ ଉନ୍ନୟନ କମିଶନର ଅନୁ ଗର୍ଗ,ଜଳସଂପଦ ବିଭାଗର ସ୍ୱତନ୍ତ୍ର ସଚିବ ତ୍ରୀବିକ୍ରମ ପଧାନ ପ୍ରମୁଖ ଏହି ପ୍ରକଲ୍ପ ପାଇଁ ଯଥେଷ୍ଟ ସାହାର୍ଯ୍ୟ କରିଥିବା ସୂଚନା ଦିଆଯାଇଥିଲା । ତେଣୁ ଏହି ଅଞ୍ଚଳର ଚାଷିଙ୍କ ତରଫରୁ ଏମାନଙ୍କୁ ଆମେ କୃତଜ୍ଞତା ଜଣାଉଛୁ ବୋଲି ସୋନଗଡ କ୍ରୀୟାନୁଷ୍ଠାନ କମିଟିର ଆବାହକ ଲକ୍ଷ୍ମଣକୁମାର ମେହେର କହିଥିଲେ । ଆୟୋଜିତ ସାମ୍ବାଦିକ ସାମ୍ବାଦିକ ସମ୍ମିଳନୀରେ ସୋନଗଡ କ୍ରୀୟାନୁଷ୍ଠାନ କମିଟିର ଆବାହକ ଲକ୍ଷ୍ମଣକୁମାର ମେହେର ପ୍ରେସକୁ ସମ୍ବୋଧିତ କରି କହିଛନ୍ତି ଯେ,ସୋନଗଡର ଏହି ପ୍ରକଲ୍ପ ଯୋଗୁଁ ଦେଓଗାଁ ବ୍ଲକର ୨୦ଖଣ୍ଡ,ସଦର ବ୍ଲକର ୬ ଖଣ୍ଡ ଓ ଗୁଡଭେଲା ବ୍ଲକର ୫ ଖଣ୍ଡ ଗ୍ରାମର ଚାଷି ପ୍ରତ୍ୟକ୍ଷ ଓ ପରୋକ୍ଷରେ ଉପକୃତ ହେବେ । ମୋଟ ୩୧ଟି ଗ୍ରାମର ଚାଷଜମିକୁ ପାଣି ଯାଇପାରିବ । ରାଜ୍ୟସରକାର ବୃହତ ଉଠାଜଳସେଚନ ପ୍ରକଲ୍ପ ଜରିଆରେ ଏହି ଗ୍ରାମମାନଙ୍କୁ ଜଳସେଚନ ବ୍ୟବସ୍ଥା କରାଇବେ । ପୂର୍ବରୁ ବର୍ଷାଦିନେ ନଦୀରେ ଜଳ ତଳକୁ ବହିଯାଉଥିଲା । ଏବେ ଏହି ପ୍ରକଲ୍ପ ହେଲେ ବର୍ଷସାରା ନଦୀରେ ପାଣି ରହିବ ।

ଧାନଚାଷ,ମୁଗ,ବିରି,ରାଶି,ଆଖୁ ଇତ୍ୟାଦି ଅନ୍ୟାନ୍ୟ ଚାଷ ମଧ୍ୟ ହୋଇପାରିବ । ଏହା ସହିତ ଗାଁମାନଙ୍କୁ ପାନୀୟଜଳ ମଧ୍ୟ ଯୋଗାଣ ହୋଇପାରିବ । ଏହି ପ୍ରକଲ୍ପ ଯୋଗୁଁ ଲୋକଙ୍କ ଆର୍ôଥକ ସ୍ତରରେ ଉନ୍ନତି ହେବା ସହିତ ଏହି ଅଞ୍ଚଳରୁ ବାହାର ରାଜ୍ୟକୁ ଯାଉଥିବା ଦାଦନ ସମସ୍ୟା ମଧ୍ୟ ଦୂର ହେବ । ଭୂତଳ ଜଳସ୍ତର ବଢିବା ସାଙ୍ଗକୁ ପରିବେଶ ମଧ୍ୟ ସନ୍ତୁଳନ ହେବ । ପ୍ରାଣୀସଂମ୍ପଦ ପାଇଁ ମଧ୍ୟ ଉପ ଯୋଗୀ ହେବ ବୋଲି ଶ୍ରୀ ମେହେର କହିଥିଲେ । ଆଜିର ଏହି ସାମ୍ବାଦିକ ସମ୍ବିଳନୀରେ କ୍ରୀୟାନୁଷ୍ଠାନ କମିଟିର ସଂପାଦକ ଶୈଳେନ୍ଦ୍ର ସାହୁ,ସିକୁଆଁର ପବିତ୍ରମୋହନ ପଧାନ,କୁଡାସିଂହାର ସୁଭାଷ ପଧାନ,ଭୁତିଆରବାହାଲର ଆଶିର୍ବାଦ ସାହୁ ପ୍ରମୁଖ ମଞ୍ଚାସୀନ ଥିବା ବେଳେ ସିକୁଆଁର ବରିଷ୍ଠନାଗରିକ ମୋହନ ପଧାନ,ହାତୀସରା ସରପଞ୍ଚ କେଲୋ ଡାଙ୍ଗ,ଅର୍ଡାର ଚାପବଗର୍ତ୍ତି,ପ୍ରମୋଦ ବହିଦାର,ସଂଜୀବ ପଧାନ,ମୁକେଶ ରଣା,ବଣମାଳି ବେହେରା,ଗଣେଶ ମେହେର,ରାକେଶ ଗଡତ୍ୟା,ହୃଦାନନ୍ଦ ଗଡତ୍ୟା,ଦିନବନ୍ଧୁ ବେହେରାଙ୍କ ସମେତ ଶତାଧିକ ଚାଷି ଉପସ୍ଥିତ ରହିଥିଲେ । ପ୍ରକାଶ୍ୟ ଯେ,ଏହି ପ୍ରକଲ୍ପ ପାଇଁ ଦେଓଗାଁ ଅଞ୍ଚଳବାସୀ ୨୦୨୧ ମସିହାରେ ସିକୁଆଁ ମନ୍ଦିରଠାରେ ଏକ ବିଶାଳ ଚାଷି ସମାବେଶ କରି ରାଜ୍ୟସରକାରଙ୍କ ପାଖରେ ଦାବି ରଖିଥିଲେ । ଏହା ସହିତ ବିଭିନ୍ନ ସମୟରେ ରାଜ୍ୟସରକାର ମନ୍ତ୍ରୀ,ପ୍ରତିନିଧିମାନଙ୍କ ପାଖରେ ମଧ୍ୟ ଦାବି ରଖି ଆସୁଥିଲେ । ଶେଷରେ ୫ଟି ଅଧ୍ୟକ୍ଷଙ୍କ ଦ୍ୱାରା ଏହା ସମ୍ଭବ ହୋଇପାରିଛି ।