20-Nov-2023

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ ):ଲୋକପ୍ରିୟ ଦୈନିକ ଓଡିଆ ଖବରକାଗଜ ‘ସକାଳ’ର ତୃତୀୟ ସ୍ୱନକ୍ଷତ୍ର ଦିବସ ଉପଲକ୍ଷେ ଜିଲ୍ଲା ସ୍ତରୀୟ ବିତର୍କ ପ୍ରତିଯୋଗିତା ଅନୁଷ୍ଠିତ ହୋଇଛି । ସ୍ଥାନୀୟ ପଟାଭାଡି ସ୍ଥିତ କୋଶଳ ଆବାସିକ ବିଦ୍ୟାଳୟ ପରିସରରେ ରବିବାର ଅନୁଷ୍ଠିତ ହୋଇଛି ଜିଲ୍ଲା ସ୍ତରୀୟ  ବିତର୍କ ପ୍ରତିଯୋଗିତା । ଏହି ପ୍ରତିଯୋଗିତାର ଜୁନିଅର ବିଭାଗରେ ୧୮ ଜଣ ପ୍ରତିଯୋଗୀ ଏବଂ ସିନିଅର ବିଭାଗରେ  ୧୪ ଜଣ ପ୍ରତିଯୋଗୀ ଭାଗ ନେଇଥିଲେ । ତୃତୀୟ ବର୍ଷ ପାଇଁ ଏହି ପ୍ରତିଯୋଗିତା ଅନୁଷ୍ଠିତ ହୋଇଥିବାରୁ ପ୍ରତିଯୋଗୀଙ୍କ ମନରେ ଏକ ସ୍ବତନ୍ତ୍ର ଉତ୍ସାହ ଦେଖିବାକୁ ମିଳିଥିଲା । ତେବେ   ଉଭୟ ବିଭାଗରେ ଛାତ୍ରୀ ମାନେ କମାଲ ଦେଖାଇଛନ୍ତି ।  ଜୁନିଅର ବିଭାଗରେ ସୋନପୁର ସରସ୍ବତୀ ଶିଶୁ ବିଦ୍ୟା ମନ୍ଦିରର ଛାତ୍ରୀ ଅନ୍ୟାଶା ଦିକ୍ଷିତ ପ୍ରଥମ,  ସୋନପୁର ସରକାରୀ ବାଳିକା ବିଦ୍ୟାଳୟର ଶ୍ରେୟା ଦାଶ ଦ୍ବିତୀୟ    ଏବଂ ଓଡିଶା ଆଦର୍ଶ ବିଦ୍ୟାଳୟର ଛାତ୍ରୀ ସ୍ଥିତପ୍ରଜ୍ଞା ମିଶ୍ର ତୃତୀୟ ସ୍ଥାନ ଅଧିକାର କରିଛନ୍ତ ।  ସେହିଭଳି ସିନିଅର ବିଭାଗରେ ଅର୍ପିତା ମିଶ୍ର ପ୍ରଥମ ସ୍ଥାନ ଅଧିକାର କରିଥିବା ବେଳେ ରୋହନ ସୁନା ଦ୍ବିତୀୟ ଏବଂ ସ୍ମୃତିମୟୀ ଦାଶ ତୃତୀୟ ସ୍ଥାନ ଅଧିକାର କରିଛନ୍ତି । ସିନିଅରରେ ବିଜୟୀ  ତିନୋଟି ଯାକ ପ୍ରତିଯୋଗୀ  ସୋନପୁର କଲେଜର ଛାତ୍ରଛାତ୍ରୀ । ପ୍ରଥମ ସ୍ଥାନ ଅଧିକାର କରିଥିବା ଉଭୟ ପ୍ରତିଯୋଗୀଙ୍କୁ ଭୁବନେଶ୍ୱରଠାରେ ହେବାକୁ ଥିବା ରାଜ୍ୟସ୍ତରୀୟ ବିତର୍କ ପ୍ରତିଯୋଗିତାରେ ଭାଗ ନେବା ପାଇଁ ସୁଯୋଗ ମିଳିବ । ଏହି ବିତର୍କ ପ୍ରତିଯୋଗିତାରେ ବିଚାରକ ଭାବେ ବରିଷ୍ଠ ଆଇନଜୀବୀ ଅଦ୍ୱେତ ପ୍ରସାଦ ପଣ୍ଡା, ଶିଶୁ ମଙ୍ଗଳ କମିଟିର ସଦସ୍ୟ ଶାନ୍ତନୁ କୁମାର କର୍ଣ୍ଣ  ଓ ଶିକ୍ଷାବିତ୍ କ୍ଷୀରସାଗର ବିଭାର ଯୋଗ ଦେଇଥିଲେ ।  ଏହି ଅବସରରେ ଆୟୋଜିତ ପୁରସ୍କାର ବିତରଣ ସମାରୋହର ମୁଖ୍ୟ ଅତିଥି ଭାବେ ସୋନପୁର ଏଡିଏମ ଅଞ୍ଜଳିନା ପ୍ରଧାନ, ଏବଂ ସମାଜସେବୀ

ଶ୍ରୀବତ୍ସ ମଲ୍ଲିକ ଯୋଗ ଦେଇ କୃତି ପ୍ରତିଯୋଗୀଙ୍କୁ ମାନପତ୍ର ସହ ଟ୍ରଫି ପ୍ରଦାନ କରିଥିଲେ । ତେବେ ସମସ୍ତ ପ୍ରତିଯୋଗୀଙ୍କ ଅଭିଭାଷଣ ପ୍ରଦାନର ଦକ୍ଷତାକୁ ଅତିଥିଗଣ ଭୂୟସୀ ପ୍ରଶଂସା କରିଥିଲେ । କୋଶଳ ଆବାସିକ ସ୍କୁଲର ଅଧ୍ୟକ୍ଷ ସଂଜୟ ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ କାର୍ଯ୍ୟକ୍ରମରେ ସକାଳ ଜିଲ୍ଲା ପ୍ରତିନିଧି ଧରଣୀଧର ମିଶ୍ର  ଅତିଥି ପରିଚୟ ପ୍ରଦାନ ସହ ସ୍ୱାଗତ ଅଭିଭାଷଣ ପ୍ରଦାନ କରିଥିଲେ । ଶିକ୍ଷକ ଅବିନାଶ ନାଏକ, ମଳୟ ଛନ୍ଦ, ଦୀପ୍ତିମୟି ପଲିଆ, ସାମ୍ବାଦିକ ସହଦେବ ମେହେର, ସରୋଜ ପଧାନ , ସ୍କୁଲର ସମସ୍ତ କର୍ମଚାରୀ ଏବଂ ଛାତ୍ରଛାତ୍ରୀ କାର୍ଯ୍ୟକ୍ରମ ଆୟୋଜନରେ ସହଯୋଗ କରିଥିଲେ । ଶେଷରେ ପ୍ରଧାନ ଶିକ୍ଷକ ପରମା ନାଏକ ଧନ୍ୟବାଦ ଅର୍ପଣ କରିଥିଲେ ।