19-Nov-2023

କଣ୍ଟାମାଳ( ଜୟ କୁମାର ମହାରଣାଙ୍କ ରିପୋର୍ଟ ): ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ପଲଶାଗୋରା ପଞ୍ଚାୟତ ଉଚ୍ଚ ମାଧ୍ୟମିକ ବିଦ୍ୟାଳୟ ଠାରେ ରବିବାର ଜିଲ୍ଲା ସ୍ତରୀୟ ଯୁବ ରେଡ଼କ୍ରସ ତାଲିମ ଶିବିର ଉଦଘାଟିତ ହୋଇଯାଇଛି |କଲେଜ ଅଧ୍ୟକ୍ଷ ଦେବେନ୍ଦ୍ର ନାରାୟଣ ପଣ୍ଡାଙ୍କ ସଭାପତିତ୍ବରେ ଆୟୋଜିତ ଉଦଘାଟନୀ ଉତ୍ସବରେ ମୁଖ୍ୟଅତିଥି ଭାବେ କଣ୍ଟାମାଳ ବିଧାୟକ ତଥା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ମହୀଧର ରଣା ଯୋଗଦେଇ ରେଡକ୍ରସ ପତାକାକୁ ଉତ୍ତୋଳନ କରିବା ପରେ ଶିବିରକୁ ଅନୁଷ୍ଠାନିକ ଭାବେ ଉଦଘାଟନ କରିଥିଲେ |ପରେ ଅଧ୍ୟକ୍ଷ ଶ୍ରୀ ପଣ୍ଡା ଙ୍କ ସଭାପତିତ୍ବରେ ସଚେତନତା ସଭାରେ ମୁଖ୍ୟଅତିଥି ଶ୍ରୀ ରଣା, ସମ୍ମାନିତ ଅତିଥି ଭାବେ ଜିଲ୍ଲା ରେଡକ୍ରସ ସମ୍ପାଦକ ଅଧ୍ୟାପକ ପ୍ରବୀର କୁମାର ଦାସ, ଜିଲ୍ଲା ରେଡକ୍ରସ ସଂଯୋଜକ ସୁରେଶ୍ୱର ଯୋଶୀ ମଞ୍ଚାସିନ ରହି ରେଡକ୍ରସ ର ବିଭିନ୍ନ କାର୍ଯ୍ୟ ବିଷୟରେ କହିଥିଲେ |ପରେ ରେଡକ୍ରସର ବିଭିନ୍ନ ତାଲିମ ଦେଇଥିଲେ |ଶିବିରରେ ଜିଲ୍ଲାର ସମସ୍ତ ଉଚ୍ଚ ମାଧ୍ୟମିକ ଓ ଡିଗ୍ରୀ କଲେଜର ରେଡକ୍ରସ

ସଂଯୋଜକ ଓ ତିନି ଜଣ ଲେଖାଏଁ ରେଡକ୍ରସ ବିଭାଗୀୟ ଛାତ୍ରଛାତ୍ରୀ ଯୋଗଦେଇଥିଲେ |କାର୍ଯ୍ୟକ୍ରମ ପରିଚାଳନାରେ ପଲଶାଗୋରା କଲେଜର ଯୁବ ରେଡକ୍ରସ ପରାମର୍ଶଦାତା ନାରାୟଣ ପ୍ରଧାନ, ତର୍କ ଓ ଦର୍ଶନ ଶାସ୍ତ୍ର ଅଧ୍ୟାପକ ବିଶେଶ୍ୱର ପାଣିଗ୍ରାହୀ, ଶିକ୍ଷା ଅଧ୍ୟାପକ ରାଧେଶ୍ୟାମ ପ୍ରଧାନ, ଅଧ୍ୟାପିକା ପ୍ରଜ୍ଞା ପରମିତା ମିଶ୍ର, ଅନାମିକା ମହାରଣା, ଗ୍ରନ୍ଥାଗାରିକ କୈଳାଶ ଚନ୍ଦ୍ର ବାରିକ, କିରାଣୀ ରମାକାନ୍ତ ସାହୁ, ଅମ୍ବିକା ପ୍ରଧାନ ସହ କଲେଜର ସମସ୍ତ କର୍ମଚାରୀ ସହଯୋଗ କରିଥିଲେ |ଅର୍ଥନୀତି ଅଧ୍ୟାପିକା ପ୍ରଜ୍ଞା ପରିମିତା ମିଶ୍ର ଧନ୍ୟବାଦ ଅର୍ପଣ କରିଥିଲେ |